Minkunga 69
A Nzambi wuphukisa
Nkunga Davidi kuidi pfumu minyimbidi kayimbidila mu “LISI”.
1 Wuphukisa, a Nzambi,
bila minlangu mitudidi nate mu dinga diama.
2 Ndilembo diami mu nyamba wungolo ;
kuna kukambulu buangu ki singikila kulu ;
khotidi nate ku tsi nlangu widi thipula
mayo mambinini.
3 Mbeni vonga mu diambu di telanga lusadusu
dinga diama dieka yuma,
meso mama malembo vongi mu talanga Nzambi ama.
4 Bobo bakundendanga mu kambu bila
badi bawombo viokila zitsuki zi ntuꞌama ;
bawombo badi bambeni ziama mu kambu bila
bobo bantomba kumbunga.
Ndilembo kuiku mu vutula biobi ndisia yiba ko.
5 Ngeyo zebi buvungisi buama, a Nzambi
zinzimbala ziama zisiko zisuama kuidi ngeyo.
6 Bika batu bobo bantulanga diana mu ngeyo babika fua tsoni
mu diambu diama ! A Yave, Yave nkua ngolo yoso
bika bobo bakutombanga
babika ba dio kombolo mu diambu diama, a Nzambi yi Iseli.
7 Bila mu diambu diaku ndinkininina lenzo
ayi tsoni yifukidi zizi kiama ;
8 Ndieka nzenza kuidi bakhomba ziama ;
ayi nkibi kuidi bana ba ngudi ama.
9 Bila luzolo mu diambu di nzo aku lulembo nzinisa.
Ayi bifingu bi batu bobo bakufinganga
bibuidi va minu.
10 Bu ndieti dila ayi ndieti kifuisa nzala
mu diambu di lusambulu.
Buna mfueti kikinina lenzo
11 Bu ndieti vuata tsaku,
batu beti kukhitula savu.
12 Bobo bavuendi va muelo, minu bansekinina
ayi ndieti nkunga wu bakolo-mbungu.
13 Vayi, kuidi ngeyo, ndieti sambila, a Yave ;
mu thangu yi nlemvo aku,
mu luzolo luaku lunneni, a Nzambi
bika wuphana mvutu mu phulusu aku yi kiedika !
14 Wuthotula mu nyamba, kadi tala ti ndidiama.
Bika wukhula mu batu bobo beti kundenda
mu minlangu midi thipula !
15 Kadi tala ti khuka yi nlangu yimbina
voti tsi yi minlangu yi ndalumuna
voti dibulu ndinzibila munu andi.
16 Bika wuphana mvutu Yave
boso buididi mamboti ma luzolo luaku ;
mu kiadi kiaku kinneni ;
bika wubaluka kuidi minu.
17 Kadi suekila kisadi kiaku zizi kiaku ;
wuphani mvutu mu nsualu nsualu bila mu phasi ndidi.
18 Fikama ayi wukhudi ;
Khudi mu diambu di bobo beti kundenda !
19 Ngeyo zebi buevi ndidi wulenzo,
ndidi dio kombolo ayi ndidi mu tsoni
Bambeni ziama zioso zidi va ntualꞌaku.
20 Nlenzo wukosikisidi ntimꞌama
ayi wumbika kadi lusadusu
nditomba bambona kiadi, vayi kusia monika kadi mutu ko ;
mu diambu di mimbombi, vayi ndisia bakula kadi mutu ko.
21 Batudidi biyimbu mu bidia biama,
ayi banduikisa vini ki ngami
mu phuila yiba yama.
22 Bika meza batula va ntualꞌawu yikituka dikondi
yikituka mfutu ayi ntambu.
23 Bika meso mawu maba mu tombi
ayi mabika buela mona ;
ayi manima mawu maba ma komvama mu zithangu zioso.
24 Wuba dukuidila miangu miaku mi ngolo
ayi bika nganzi aku yi ngolo yiba buila.
25 Bika buangu kiawu kikitunga dikanga
kubika buela monika mutu wumvuanda mu zinzo ziawu zi ngoto.
26 Bila balembo yamisa batu bobo wulueka ;
beti yolukila ziphasi zi batu bobo wumonisa phasi
27 Wuba yekudila mambimbi va yilu mambimbi
kadi tala ti babaka kuku mu phulusu aku.
28 Bika bakubulu mu buku yi luzingu,
ayi babika tangu va kimosi ayi batu basonga !
29 Ndidi mu phasi ayi mu mabienga
bika phulusu aku, a Nzambi yikheba
30 Ndiela zitisanga dizina di Nzambi mu nkunga,
ayi ndiela kunkembisa
mu phutudulu matondo.
31 Buna diodi diela luta monisa Yave khini
viokila ngombi yimbakala,
viokila ngombi yidi ziphoka ayi bikodi bivasuka.
32 Nsukami wela mona ayi wela yangalala ;
beno lueti tomba Nzambi,
bika mintima mieno mizinga.
33 Yave weti wila nsukami
ayi kalenzanga ko batu bandi bakangama.
34 Bika Diyilu ayi ntoto binzitisa,
mimbu ayi bibioso bieti
diatanga muawu.
35 Bila Nzambi wela vukisa Sioni,
ayi wela buela tunga mavula ma Yuda,
buna batu bela kala muawu ayi kuma vua
36 Mela ba kiuka ki bana ba bisadi biandi,
ayi bobo beti zolanga dizina diandi
bela vuandanga mawu.