Minkunga 78
Mambu mavanga Nzambi
Nkunga Asafi.
1 A batu bama, wanu malongi mama !
Dimbanu mambu ma munu ama.
2 Ndiela zibula munu ama mu tuba zingana
ayi ndiela samuna mambu ma suama, mambu makhulu ;
3 momo tuwa ayi momo tuzaba
ayi momo bakulu beto batukamba ;
4 Tulendi masuekila ko bana bawu ;
tuela samuna kuidi tsungi yinkuiza
mavanga ma Yave mafueti zitusu,
lulendo luandi ayi matsiminanga momo kavanga.
5 Wuvana zithumunu mu diambu di Yakobi.
Wukubika Mina mu Iseli,
ayi wutumina bakulu beto
muingi bamilonga kuidi bana bawu ;
6 buna tsungi yinkuiza, yela zaba mawu
buela bana bobo babutuki ko
ayi bawu mamvawu mu thangu awu
bela yolukila bana bawu ;
7 buna bela tula diana diawu mu Nzambi,
ayi balendi zimbakana mavanga mandi ko,
vayi bela keba zithumunu ziandi ;
8 Balendi ba banga bakulu bawu ko ;
tsungi yikambulu bulemvo, ayi tsungi yi matingu ;
bobo mintima misia ba mifuana ko kuidi Nzambi
bobo pheve yisia yikuikama kuidi Nzambi ko.
9 Batu ba Efalayimi bobo baba ayi mimbasa,
bavutuka ku mbusa mu lumbu ki mvita.
10 Basi keba ko Nguizani yi Nzambi,
ayi bamanga zingila boso buididi Mina miandi.
11 Bazimbakana momo kavanga ;
matsiminanga momo kabamonisa.
12 Wuvanga bikumu va ntuala bakulu bawu
mu tsi yi Ezipite ; mu zunga ki Tsowani.
13 Wuvasa mbu ayi wuba viokila muawu ;
wutelimisa nlangu dio ngui banga baka.
14 Wuba diatisa mu dituti va muini,
ayi mu kiezila ki mbazu va builu bu mvimba.
15 Wubasa matadi mu dikanga,
ayi wuba vana nlangu wuwombo banga mbu ;
16 Wutotula mimvuila minlangu mu ditadi
ayi wukumbisa minlangu banga minlangu minneni.
17 Vayi babuela tatamana sumuka diaka va ntualꞌandi ;
batinguna Nzambi Yizangama mu dikanga.
18 Batota Nzambi mu luzolo lungolo,
mu lombanga mu kingolo bidia biobi batomba.
19 Batubidila Nzambi batuba :
“Nzambi beki kuandi bu kubikila meza mu dikanga e ?
20 Bu kabula ditadi dingolo, mbadi nlangu wutotuka
ayi mimvuila mikumba mu buwombo
vayi buna wulendi kuandi kutuvana bidia e ?
Wulendi kuandi kubika zimbizi mu diambu di batu bandi e ?”
21 Yave bu kaba wa, wufuema ngolo,
mbazu andi yilema mu diambu di Yakobi
ayi miangu miandi mibuila Iseli.
22 Bila basia wilukila Nzambi ko,
voti basia tula diana diawu mu khudulu andi ko.
23 Muaki wuvana lutumunu kuidi matuti ma yilu
ayi wuzibula mielo mi diyilu ;
24 Wunokisa mana mu diambu di batu muingi badia ;
wuba vana zitheti zi diyilu.
25 Batu badia dipha di zimbasi ;
wuba fidisila bidia bioso biobi balenda dia.
26 Wuvevumuna phemo yi Esite mu diyilu.
Wudiata ku ntuala phemo yi Sude mu lulendo luandi.
27 Wuba nokisila zimbizi banga mbungi-mbungi ;
zinuni zieti dumuka banga nzielo yi mbu.
28 Wuba buisila biawu va khatitsika ka kiawu ;
muyenda zinzo ziawu zioso zingoto.
29 Badia nate bayukuta kuwombo ;
ayi wuba vana biobi baleba mu kingolo.
30 Tuamina batamba bidia biobi baleba mu kingolo mbusa,
buela bikidi mu miunu miawu.
31 Nganzi yi Nzambi yi babuila ;
wuvonda bobo baluta ba zinitu zingolo mu bawu ;
wuvonda bana ba matoko ma Iseli.
32 Ka diambu ko mambu moso momo, batatamana vola masumu
ka diambu ko matsiminanga mandi, basia wilukila ko.
33 Buna wumanisa bilumbu biawu mu phamba
ayi mimvu miawu mu tsisi.
34 Kadika khumbu kaba kuba vondanga, tombanga baba kuntombanga,
balukanga nsualu-nsualu diaka kuidi niandi.
35 Batebuka moyo ti Nzambi niandi wuba dibanga diawu
ayi Nzambi Yizangama niandi nkudi awu.
36 Vayi buna bankamba mambu ma lueki mu miunu miawu
bamvuna mu ludimi luawu.
37 Mintima miawu misia ba mifuana kuidi niandi ko
basia ba bakuikama ko mu Nguizani andi.
38 Vayi niandi wuba nkua kiadi
wuba lemvukila mambimbi mawu
kasia babunga ko
thangu ka thangu wudekula nganzi andi
ayi kasia totula ko miangu miandi mioso.
39 Wutebuka moyo ti baba minsuni kaka ;
phemo yeti vioka yoyi yilendi vutuka ko.
Ayi wulendi buela vutuka ko.
40 Zikhumbu ziwombo bantingunina mu dikanga,
ayi bansoka mu bibuangu bikambulu batu.
41 Khumbu ka khumbu baba vutukilanga diaka tota Nzambi ;
bafuemisa mutu wunlongo wu Iseli kiadi.
42 Basia tebukila ko moyo lulendo luandi
mu lumbu kioki kaba kula mu mioko
mi mutu wuba yamisa ;
43 mu lumbu kamonisa bidimbu bi bikumu biandi mu Ezipite,
mambu mandi matsiminanga mu ndambu tsi yi Tsowani
44 wukitula minlangu miawu menga ;
basia buela baka bumina mu mimvuila mi minlangu miawu.
45 Wufidisa nkangu zinzinzi ziozi zibadia
ayi zinguanga ziozi zi babunga.
46 Wavana mimbutu miawu mu zitsola kuidi binzienzi
biobi basala kuidi makhoko.
47 Wumana bunga zindima ziawu zi vinu
mu mvula yi matadi
ayi minti miawu mi sikomole mu kiozi ki ngolo,
48 wuyekula bibulu biawu kuidi mvula yi matadi
ayi minkangu mi mamemi mawu kuidi lusiemo.
49 Wuba fidisila nganzi andi yi mbazu, miangu miandi mi ngolo
khakumusu, kimbeni weti bunga
50 Wukubika nsolo mu diambu di nganzi andi
kasia kuba tanina ko mu lufua ;
vayi wuba yekula mu minsongo ;
51 Wuvonda bana boso batheti bababakala ba Ezipiti
mimbutu mitheti mi zingolo mu zinzo zi ngoto zi Hami.
52 Vayi wutotula batu bandi banga mamemi ;
wuba tuadisa banga nkangu wu bibulu mu dikanga.
53 Wuba diatisila mu luvovomo ;
diawu basia mona tsisi ko
ayi mbu wumina bambeni ziawu.
54 Buna wuba kotisa mu yenda tsi andi yinlongo ;
ku tsi yi mongo wowo koko kuandi ku lubakala kukibakila.
55 Wukuka makanda ku ntualꞌawu ;
ayi wuba kabudila mintoto miawu banga kiuka
wuvuandisa makanda ma Iseli mu zinzo ziawu.
56 Vayi batota Nzambi ayi batinguna Nzambi Yizangama ;
basia keba zinzengolo ziandi ko.
57 Banga madisa mawu
basia ba bafuana ko ayi basia ba minu ko
balendi tudulu diana ko banga wuvenga.
58 Bamfuemisa mu bibuangu biawu bizangama
balemisa kiphala kiandi mu bitumba biawu
59 Nzambi bu kawa, buna wufuema ngolo
wutumbu loza mvimba Iseli.
60 Wuyekula, nzo ngoto mbuabununu yi Silo ;
nzo yoyo mu kakivuandisa ;
61 Wufidisa kesi yi lulendo luandi mu buvika,
ayi kiezila kiandi mu mioko mi mbeni.
62 Wuyekula batu bandi mu sabala,
wufuemina ngolo kiuka kiandi.
63 Mbazu yi zinisa bamatoko mawu,
ayi bandumba ziawu ziozi
zisia zaba babakala ko zisia baka ko minkunga
mi makuela ko.
64 Zinganga ziawu zinzambi zimana fuila mu sabala
ayi mafuola mawu masia baka bu didila ko.
65 Buna Yave wukotuka banga mutu wuba wuleka,
banga mutu kotukidi mu diambu di vinu kakololo.
66 Wuvutula bambeni bandi ku manima ;
wuzifuisa zitsoni ka zisukanga ko.
67 Buna wuloza zinzo zi ngoto zi Zozefi,
kasia sobula ko dikanda di Efalayimi ;
68 Vayi wusobula dikanda di Yuda,
mongo wu Sioni, wowo kazola.
69 Wutunga buangu kiandi kinlongo banga bibuangu bizangama,
banga ntoto wowo kakubika mu zithangu zioso zi kazimani.
70 Wusobula Davidi kisadi kiandi
ayi wumbonga mu ziphangu zi mamemi,
71 Wumbongila vana vaba mamemi momo kaba sunga
mu diambu di kaba nsungi wu batu bandi Yakobi,
wu Iseli kiuka kiandi.
72 Buna Davidi wuba nsungi awu
mu ntima wufuana ayi wuba diatisila
mu koko ku diela.