Minkunga 81
Enati batu bama banguila
Nkunga Asafi kuidi pfumu minyimbidi ; kayimbidila mu ngitala yi basi Ngati.
1 Yimbidilanu Nzambi mu khini ;
niandi zingolo zieto !
Yamikinanu kuidi Nzambi yi Yakobi !
2 Tonanu miziki, sikanu zindungu ;
Bulanu minningu mu Ngitala ayi lu Lila.
3 Sikanu phoka yi dimemi va ntotukila ngondi yi mona ;
ayi Ngondi bu yidi yiduka ayi mu lumbu ki nyengo eto !
4 Yayi yidi nzengolo mu diambu di Iseli,
ayi tsikudukusu yi Nzambi yi Yakobi,
5 Wukindisa yawu banga nsiku mu diambu di Zozefi
mu thangu kanuanisa tsi yi Ezipite…
Kuna tuwa mbembo yoyi tusia sudika ko.
6 Tubidi : “Ndibotudi mfuna wubedi va mavangiti mawu.
Ayi babotudi pani kibedi mu mioko miandi.
7 Mu ziphasi ziaku, ngeyo wutela ayi ndikula
ndivana mvutu ku tsi dumu ki matuti
nditota ku minlangu mi Meliba.
8 Wanu beno batu bama, ayi ndiela kululubula :
enati beno luzola ku ndimba, a Iseli.
9 Kulendi ba kadi nzambi yi nzenza ko va khatitsikꞌaku.
Kulendi buongimina nzambi yi nzenza ko !
10 Minu ndidi Yave, Nzambi,
yoyi yilutotula mu tsi Ezipite ;
zibula bumboti munu aku ayi ndiela ku wuwesa.
11 Vayi batu bama basia zola ku ndimba ko ;
Iseli kasia kuthumukina ko.
12 Buna ndiba yekula mu mintima miawu mingolo ;
mu landakana zikhanu ziawu veka.
13 Enati batu bama bandima kuama,
enati Iseli wuzola landakana zinzila ziama !
14 Nganu mu nsualu ndieka tumbu kuba yekudila bambeni ziawu
ayi balula koko kuama kuidi bobo beti kuba lenda.
15 Bobo beti lenda Yave balenda
kukikulula va ntualꞌandi ayi nganu thumbudulu awu yela
zingilanga mu zithangu zioso ;
16 Vayi nganu ngeyo wudikulu mu ble yilutidi kitoko,
mu niosi yintotukila mu ditadi, ndiela kuyukutisila.”