Minkunga 88
Lusambulu lu mutu weka nduka fua
Nkunga bana ba Kole kuidi pfumu minyimbidi ; bayimbidila mu flute. Nkunga Hemani muisi Ezilakite.
1 A Yave, Nzambi yoyi yeti kuphukisa,
muini ayi builu ndieti yamikina va ntualꞌaku.
2 Bika lusambulu luama lutula va ntualꞌaku ;
balula dikutu diaku bu ndilembo yamikina.
3 Bila muelꞌama wufulukidi mu ziphasi
ayi luzingu luama lufikimini tsi yi bafua.
4 Ndidi mu ntanda wu batu bobo bankuenda ku diyilu
ndieka banga mutu kambulu zingolo.
5 Ndidi wuvuanda va ndambu lufua,
banga batu bavondo ; bobo badi baleka mu ku tsi bafua ;
bobo wunkambu buela tebukilanga moyo,
bobo wusia buela bela mayindu ko.
6 Ngeyo wuthula mu dibulu dinneni,
mu tombi kinkobo.
7 Miangu miaku mimbuila ayi zitu midi
Minu ndidiamusu kuidi ngeyo mu mayo maku moso.
8 Ngeyo wuphambisa mu bakundi bama bakiluzolo
ngeyo wukhitula kima ki khemi kuidi bawu.
Ndidi wukangama ayi ndilendi baka bu tinina ko.
9 Meso mama meka mbumbuluka
mu diambu di ziphasi ;
ngeyo ndintela ; a Yave, kadika lumbu
kuidi ngeyo ndinonuna mioko miama.
10 Wulenda kuaku monisa matsiminanga maku kuidi mutu wufua e ?
Bafua balenda fuluka ayi kuzitisa e ?
11 Balenda yolukila luzolo luaku mu tsi bafua
ayi kikhuikizi kiaku mu mbivusu e ?
12 Matsiminanga maku malenda zabakanga mu bibuangu bidi tombi
voti mavanga maku masonga mu ntoto wowo batu bazimbakana
mambu moso e ?
13 Vayi minu kuidi ngeyo ndinyamikina mu tomba lusadusu,
mu nsuka lusambulu luama lunkuiza va ntualꞌaku.
14 Bila mbi ngeyo Yave wundozidi e ?
Ayi bila mbi wulembo tsuekila zizi kiaku e ?
15 Tona mu bumuana buama minu ndidi mu phasi
ndidi wukangama mu lufua
Ndimona ziphasi mu tsisi aku
ayi ndieka wukambu diana.
16 Miangu miaku mingolo mimbuididi
tsisi aku yimbunga.
17 Mu lumbu kimvimba yawu yinzungidila banga khuka nlangu
yawu yitungu kumbina mvimba.
18 Ngeyo mu bandiatanga yama ayi mu bakiluzolo bama
tombi kiawu nkundi ama wukuikama.