Minkunga 96
Bika nza yimvimba yisanisina Yave, ntinu andi.
1 Luyimbidila Yave nkunga wumona.
Luyimbidila Yave, ntoto wumbimba.
2 Luyimbidila Yave,
zitisanu dizina diandi ;
yamikisanu phulusu andi
lumbu ka lumbu.
3 Yolukilanu nkembo andi muidi makanda
mambu mandi matsiminanga
muidi batu boso.
4 Bila Yave widi wunneni
ayi lutidi mu zitusu ;
tsisi kadi va yilu zinzambi zioso.
5 Bila zinzambi zi makanda zidi bitumba ;
vayi Yave niandi wuvanga diyilu.
6 Kiezila ayi nzitusu bidi va ntualꞌandi
zingolo ayi nkembo bidi mu buangu kiandi ki nlongo.
7 Luvana kuidi Yave,
e mabuta ma makanda ;
luvana kuidi Yave nkembo ayi ngolo.
8 Luvana nkembo kuidi Yave wufueni mu dizina diandi.
Lunata dikaba ayi lukota mu ziphangu ziandi.
9 Lubuongimina Yave mu kiezila ki bunlongo buandi.
Tita va ntualꞌandi, ntoto wumvimba.
10 Tuba muidi makanda :
“Yave weti yala.”
Nza yidi yikinda dio ngui ;
yilendi nikuka ko
bila Yave wela sambisa batu mu bufuana.
11 Bika diyilu dimona khini,
bika ntoto wuyangalala.
Bika mbu wutula biyoko ayi bibio bidi muna.
12 Bika zitsola zimona khini
ayi bibio bidi muna ;
buna minti mioso mi nsitu miyimbila
mu diambu di khini.
13 Miela yimbila va ntuala Yave, bila wulembo yizi,
wulembo yizi mu sambisa ntoto.
Wela sambisa nza mu busonga
ayi batu mu Kedika kiandi.