5
Nub Ewen Ari Dobiri Yeman
1 Nub id kuu okad kiri ye kombon areb kowe, yenambed kuye kombon monmaraniib kuu karub yi dingkimbedban Godbed aron korem korem ye ambib yenbenabekore Ewen arimbed nub dowad nongkoboon kuu nubkaadkeruwen.
2 Kumban nub id kuu kibik no okad yiri ye kombon kemaom doberemoon areb doruub kowe, Ewen ye ambib kande inwarem ande wareki kamuub,
3 amborom kuu kuye ebkad inwaranuub kumbed nub kuu kad dobmo dobaraubban kowe.
4 Kedi, nub kuu kuye okad kiri ye komboniib doruub kuu, warekaune dabawiib doruub, amborom kuu kad dobmo dobiri kuu nub dowakenban, nub dowaken kuu Ewen ye ambib inwarunduked yimin. Kowe, okad kiri ye bobni yeman kuu amonombe wadkeri aron korem yeman keraneen.
5 Kuye dowadmo nub kuu Godbed ongmenaboon. Kwane, yembed Kingkin Karadmo nub niindem aom kondoon, kukuu wonong mukod kowimaib areb, komo komo nub dowad menebaneen kuu dungkud kondoon.
6 Kwana kowe, nub kuu kangdommo meenembere kaadkeruwen kuu, nub kuu okad kiri ye id ke doruub kei, Yariman yambib kuu ambabbed doruub.
7 Kedi, nub kuu nub indobbed wedmuub yaambedban anam andi yaambed doruub.
8 Ke yedmaan kei, nub kuu kangdommo meenembere doberenub, nub id domonde Yariman yambiwoom doberem ande dowakeniib keruwen.
9 Kowe, nub meeni dedmoni darewoob awinuwen kuu okad kiri ye idiib doruub o keyaa domonde Godiib yaa wunuub kuu ye yaa kubi konem anduwed.
10 Amborom kuu nub korem kuu Keresu ye wengyundimbon yaa dobaranuub kumbed, nub mimim kuu okad kirimbed idiib doburuwen yaron aombed amun o arewa komo komo ambangkuwen kuye kakman kuu ibmo banuub kii.
Yesu Yaambed God Yaa Kunum Keruwen
11 Kwane, nub kuu Yariman God yaa anam ande uneni kuu nubkaadkeruwen kowe, nimakarub yaa ye weng daande nangkandande kamuub kii. Nub anam komarewa kuu God yekaad. Kwane, nub anam komarewa kuu yiib niindem aom dianmo wedmiwen, anam deeko?
12 Nub kuu yiib yaa nub kuu yiminmo ande kamokban, kumban nub komo ambangkaub kumbed nub dowad kubiyiib kere kerengkan kamime anduwed. Kwananiib kumbed yiib kuu karub yi niindem aom wedmimokban bunangkamo ye yiribman yaa kerengkan kamiibdan yaa inandaniib kii.
13 Kedi, nub kuu yenambed warudkidan andaniib kuu God ye dowad kwamune ambangkaub kumbed kii. Kwane, nub kuu yenambed inamen amundan andaniib kuu yiib dowad kwamune ambangkaub kumbed kii.
14 Kukei, Keresu ye mimyob dowaken kumbed dedmonaane kwamune ambangkimaub, amborom kuu karub mimombed nimakarub korem yi dowad bobnoon kowe, nimakarub korem kuu dukni yeman.
15 Kwane, Yesu nimakarub korem yi dowad bobnoon, wad doriibdan kuu yika yi dowad dobaraib, yi dowad kuu bobnoone Godbed nenkoonoonman ye dowad yaambed dobirime anded.
16 Kwana kowe, kibikbed ari kuu nub kuu okad kiri ye kerekmen yaambed nimakarub yaa wedmende inamen kowimban. Kurin anuk kuu kuye kerekmen yaambed Keresu yaa wedmene inamen kowimaub kumban, kibikee kuye meeni ye kiwaan yaa kuu koronduwen.
17 Kwana kowe, kane kanembed Keresu yaa anam ande dabokniwen kuu yi kuu yeweb ongmenaboon. Kurin yiri yeman kuu dowan, yeweb yeman yi yaa angkeen kii!
18 Kwamune kee korem kuu God yaambed meneboon. Yembed Keresu yaambed nub kuu ben kunum kerundekore, ben kunum kerundi ye deme nub yaa kondoon.
19 Kuye deme kukei, Godbed nimakarub yi ambarakmi kuu kakman kondi dowad kimingkainban andekore, Keresu yaambed okad kiridan ben kunum kerundoon kumbed, kuye weng kuu kanyare dakmime ande nub dingki dem aom kowoon.
20 Kwana kowe, nub kuu Keresu ye weng amun kan okad yena yaa wenebidan, Godbed nub yaambed okad kiridan yaa amonombe anam andime andemoon areb keruwen. Kowe, naawonmo nangkande yedmuub kuu, God yaa minibko kunum kerundok.
21 Godbed ma ambarakmiyiibbanman ongmoonkob nub dowad ambarakmi yeman keroon kumbed, ye yaambed nub kuu God ye yorokmodan keranuub.