Yook 102
Durud yewed kandoonman ye kurikuri weng. Ye kuu miin yiminban kerekore mimyob wandoon ye weng Yariman yaa dakmoon.
1 O Yariman, ne kurikuri kee wengamberewe.
Ne awawe ande baandi kuu eb yaa monok.
2 Ne yiminban kere eb yaa baandaka
eb murubia ne yaa kuu kan yeknaab.
Eb kerendem kuu ne yaa kowe wengamberewe.
Kwane eb yaa baandaka kirod inanduwe.
3 Ne wad dobiri yaron kuu amareng anwenemoon areb,
kwane ne kono kuu amoyidkob denemoon areb keroon.
4 Ne niindem aom kuu kereek nuubne koknemoon areb keroon.
Kedi, ne animan ani kuu nonondandimain.
5 Ne wareki darewoob kamimain kumbed
yomiibban konokonomo keraan.
6 Ne kuu amboon angka on kanakana areb keraan,
kwane ne kuu ambib bobbon aom on kamim areb nembirimo dobaraan.
7 Amnoom kuu angkande kaimain kumban unuk angkindeban keraan,
kwane ne kuu wid angka ye on areb nembirimo keraan.
8 Aronki doboob kuu ne bondanbed ne yaa daawi yeman kerimaib,
kwane kane kane ne yaa damangkawimaib kuu naningko kande butun yeman kerimaib.
9 Kedi, ne kuu yikbod kumbed naniman areb kere aneni,
ne anande kaimain ye ok aom kuu ne inokiib kubudaraana animain.
10 Kwanimain kuu amborom kuu eb norin darewoob ne yaa wandewen kowe.
Kedi, ebbed ne nendane kan angka korarewen.
11 Ne wad dobiri yaron kuu oobneya ye kuruwak areb,
kwane ne kuu kereek nuubnemoon areb kere winimain.
12 Kumban, o Yariman, eb kuu eb dibere oonimbon arimbed aron korem diberembirimaab,
kwane eb yirin kuu nimakarub yaro dobere dobere yaro wananiib korem aom kwane angkimbaraneen.
13 Eb kuu dembeneb Saiyon yaa mimyob kowaneeb,
amborom kuu ebbed yu yaa awandi yaron kuu muneen kowe,
aron kinewen ari muneen kui.
14 Kedi, yu ambib ye bot bondanbed ben angka kirariwen kuyaa kuu eb demedan kuu mimyob keendimaib,
yu monmarundiwen ye ingkud kuyaa kuu korem mimyob kowimaib.
15 Ambibkin mimimdan kuu Yariman yaningko yaa une bumangkaniib,
kwane okad yiridan yi king korem kuu eb nambiri yaa une bumangkaniib.
16 Amborom kuu Yariman kuu angkon ika Saiyon yengbekore
ye nambiriyiib angkadaraneen.
17 Ye kuu kamboknondan yi kurikuri yaa inandundaneen,
yi kaamoni yaa kuu wunekaraanban.
18 Awoya awoya amaan ari yi dowad wongkibko,
yi kuu Yariman yaningko kankoonime andi ye weng kukei.
19 “Yariman kuu ambab ari ye dobirimbon karadmo arimbed yiri keendomboroon,
Ewen arimbed okad yiri wedme daroboon kui.
20 Kukuu wii aom kamobiwendan yi wareki wengamberekore,
dukni yeman andiwendan yaa ben angka nongkobanded.” kwane wongkime.
21 Kwananeen kuu Yariman yaningko kuu Saiyon aombed dakmenib
Yerusalem aombed ye aningko kankoonaniib.
22 Ambibkin mimimdaniib oonimbon mimimdaniib kuu
Yariman yaa kurikuri kamande nedbaniib kuu kwananiib kii.
23 Ne kuu weeb yemoonban dobaraan kumbed ne aromkono kuu yembed dookboon,
yembed ne wad dobiri yaron kuu nare dukmenmo keroon kui.
24 Kowe nembed yedmaan, “O ne God, ne mokaid doriin keyaombed ne nen angkanaab.
Eb weeb kuu nimakarub yaro dobere dobere yaro wananiib korem aom wenembirimaun.
25 Yimin andowoon yiri kuu ebbed okad yu ambokab ongmenabewen,
kwane ambidiib Eweniib kuu eb dingkimbed ongmenabewen.
26 Yi kuu monmaraneen kuned eb kuu dobaraneeb,
yi kuu ebkad korobob keremoon areb keraniib kui.
Yi kuu ebkad areb ebbed biangke ben kiradmekoreb
yeweb ben debendaneeb.
27 Kumban eb kuu kwane doreebmo doberembaraneeb,
kwane eb weeb kuu ma yimin wandaanban.
28 Eb demedan yi meed kuu uniyiibban kumbed dobaraniib,
kwane yi awoya kuu eb arinambo ari ye yumbon aom dobaraniib.