Yook 109
Yook ambo bi ye karub yeman. God yaningko kankooni ye yook Dewidbed wongkoon.
1 O God, eb kuu nembed ewaningko kankoonimainman,
iwari keraab,
2 amborom kuu arewa kamenabe birandimaibdan kuu
ne yaa daawimaib,
yimbed ne dowad dudi wengbed dakmiwen kui.
3 Ne yaa arud wandembiri wengbed ne kanawanewandiwen,
kwane ne kuu yi yaa ma arewa kamindo kumbed yimbed nimaib.
4 Ne kuu yi yaa mimyob dowaken keendaan kumban yi kuu amonombe nembedmo arewa anduwiwen,
kumban ne kuu kurikuri kamendi ye karub.
5 Ne kuu yi yaa amun amun kamaine inanduwe arewa kamimaib,
kwane mimyob dowaken keendaan ye dowad arud wandembiriwen.
6 Arewaman maa kine nendebko ne bonman yaa manmo kerunok,
kwane ambarakmoon kii ande dedmonde yedmendi ye karub nenmenebko ne bonman ye dingki wiwi angka doborok.
7 Ne bonman kuu wengyunde wedmibko anam ambarakmoon kerok.
Kwane ye kurikuri kami kumbed amonombe ambarakmi yeman kerok.
8 Ye weeb kuu yemoonban kerok,
kwane ye korok keri ye yumbon kandoon kuu karub maambed kandok.
9 Ye dana meed kuu awodkiyiibban kerime,
kwane ye wonong kuu irib keruk.
10 Ye meed kuu kirinwanmo yare eekmenabidan kerime,
kwane yi ambib arewa kereen kuyaom kuu koronde ben angka kirarime.
11 Ye dungkumiib angkeen ye karubbed ye yiribman korem bok,
kwane yembed ambangkoon ye yiribman kuu noroddanbed dorebunbe bime.
12 Ye yaa mimyob dowaken keeni ye karuwiibban kerok,
kwane ye meed ari awodkiyiibban keraniib kuyaa kuu mimyob keendi ye karuwiibban kerok.
13 Ye awoya ari kuu nare dowan kerok,
kwane yi aningko kuu are dowan kerok, amaan ari dobaraniibdan kuu yi yaa nonondandundime.
14 Ye ambeya yi arewa kamenabi kuu Yariman yarinambo arimbed kwane angkimborok,
kwane ye ena yu ambarakmi kuu are dankaraib.
15 Kwane yi ambarakmi kuu aron korem Yariman ye murubia ari angkimborok,
kwananeen kuu yembed okaddan yaambed yi meenmi yeman kuu nare dowan keraneen.
16 Amborom kuu kuye karub kuu ma kubende amun kamande meenindo,
kwane kamboknondaniib awandok andidaniib miin yiminban keriwendaniib kuu
yembed yi yaa duknime ande yenbandimaan.
17 Ye dowaken darewoob kuu butun wengmo dakmembiri kowe,
kuye butun kuu ikakman ye yaa menebok.
Amun kerundi kuu ye dowakenban kowe,
amun keruni kuu ye yaa ambab kerok.
18 Ye kuu aronki mimim korem ebkad derenimaan areb butun kamimaan,
kwane aron yemoon ok animaan areb butun kamenabi kuu ye inamen aom aomderebimaan,
kwane aron yemoon animan kowiib ane aromnimaan areb butun kami yaa meeni dowaken darewoowiib kerimaan.
19 Kowe kuye butun kuu ebkad doboob ye ari dabunemoon areb kerok,
kwane kuye butun kuu kobaiknong boronemoon areb keremborok.
20 Ne yaa ambarakmoon kii ande dedmowe yedmewidan yaa kuu weng anuk angkeen kuu Yarimanbed kwane kamok,
ne yaa weng arewa daawimaibdan yaa kui.
21 Kumban, o Yariman Ambengkan, eb yirin kowi dowad ne yaa kuu amun amun kame.
Eb womoniyiibban ye mimyob dowaken kuu amun kowe, ne kuu arewa yaa burudande nende.
22 Amborom kuu ne kuu kamboknon kere awawe ande kamaan,
kwane ne niindem aom kuu durud yewed kandaan.
23 Ne kuu oobneya ye kuruwak wene biknemoon areb kubuniibban keraan,
kwane ne kuu ed yaa nuubbed wuure kankaremoon areb keraan.
24 Ne kuu animan koronde eb yaa kurikuri kerimain kumbed ne dangbo kuu wud kereni,
ne id kuu kad kombere konokonomo keraan.
25 Ne kuu ne yaa ambarakmoon kii ande dedmowe yedmewidan yi damangkawimbon keraan,
kwane yi kuu wedmewimaib kuu yi korok wamburukme damangkawimaib.
26 O Yariman ne God, ne awawe.
Ebka eb womoniyiibban ye mimyob dowaken kerekmen yaambed ne kuu arewa yaa burudande nende.
27 Kwane, eb dingkimbed ne dowad kwane ambangkaneeb ye yoman kuu yi yaa korokbendebko yikaadkerime,
kukuu, o Yariman, ebbed ne dowad kamaneeb kuu wedmaniib kui.
28 Yi kuu butun kamaniib kumban ebbed amun keruwaneeb.
Yimbed nenbandaniib kuu yi yaa karak kondaneeb kumban,
eb dememan ne kuu kubaniin.
29 Ne yaa ambarakmoon kii ande dedmowe yedmewidan kuu aningko arewayiib kerok,
kwane yi yaa kuu karakbed ebkad doboob areb kan derene bedmok.
30 Ne mongkodkonombed Yariman yaa eso darewoob andunaniin,
kwane kadaareb yemoon kidangkambed ye aningko kankoonaniin.
31 Amborom kuu ye kuu awawime andi ye karub ye dingki wiwi angka doberene awanenimaan,
ye yaa wengyunde bobni yeman andimaibdan yi dingki aom kuu burudande nendi dowad.