Yook 11
Yook ambo bi ye karub yeman. Dewid ye yook.
1 Yarimanbed kukbimaanbon aombed dobirimain.
Kowe, inamen arewaman, eb kuu kanekob ne yaa kuu ke yedmewewen kei,
“Ayari on areb ewaangko ari wanwene.
2 Kedi, wedme. Arewa kamembiridan kuu yi ana ben yekbad yaa dedmobenib,
yi anangkab angkokbimaib.
Yi kuu kumun aombed niindem aom yorokmo kere doriibdan yaa
baradmande doriib.
3 Kwane, ambokab yiri ye inamen monmarimaib kowe,
yorokmodan kuu komo keraniib?” andewen, komarewa kii?
4 Yariman kuu ye kurikuri ambib karadmo aom doreen,
kwane Yariman kuu ye dibere oonimbon Ewen ari dibeen.
Ye kuu nimakarub korem yaa ongme keendombirimaan,
ye indob kuu nimakarub yi niindem aom andangkimaan.
5 Yariman kuu yorokmodan yi niindem aom andangkimaan,
kumban arewa kamembiridaniib yenbandi yaa dowaken keriwendaniib yaa kuu ye kingkinbed arud wandembirimaan.
6 Arewa kamembiridan yaa kuu amoyidkowiib bod sulfaa yumbuyiib
kiradmaneene am areb yi ari kirobaneen.
Kwane, nimin kaiyiib ye nuub kumbed yi yaa wurumembirimbon aom nongkobaneen.
7 Amborom kuu Yariman kuu yorokmo,
ye dowaken darewoob kuu yorokmo kamime anded,
kwane kangdommo doriibdan kuu ye murubia wedmaniib.