Yook 138
Dewid ye yook.
1 O Yariman, ne niindem aom kumundiniib kumbed eb yaa eso andaniin,
kwane god yena yi arinambo arimbed eb yaa wingkani ewaningko kankoonaniin.
2 Ne kuu eb kurikuri boyambib karadmo yaa amonombe bumangkeni,
eb womoniyiibban ye mimyob dowaken keewiyiib eb ma korondiyiibban weng awiniyiib ye dowad
ewaningko yaa eso andaniin,
amborom kuu ewaningkoyiib eb wengiib kuu arimbed kerundeewe miin darewoob keriwen,
kumkam yena korem arebban kowe.
3 Eb yaa baandaan kuu ebbed inanduwewen,
ebbed ne ongmeweewa arudkonomo kangdommo keraan kui.
4 O Yariman, okad yiri ye king korem kuu eb weng dakmaneewe wengambaraniib kuu,
eb yaa eso andaniib.
5 Kwane yi kuu Yariman ye kerekmen dowad wingkaniib,
amborom kuu Yariman ye nambiri kuu miin darewoob kowe.
6 Yariman kuu darewoob arimbed,
kumban yirimodan yaa kuu awandi dowad kereknimaan,
kumban kerengkandan kuu yekaad kuned ma awandaanban, yi yaa kuu ambab angka doreen kowe.
7 Ne kuu arewa dabab niindem aom yarebimain kumban,
ebbed ne kuu ongmewaawa wadkerimain.
Ne bondanbed ne yaa kuu arud wandimaib kuyaa kuu eb dingkimbed kebenimaab,
kwane eb dingki wiwimbed ne kuu arewa yaa burudande nendimaab.
8 Yarimanbed ne dowad ye weng kunduk kuu kwamune ambangkaneen.
O Yariman, eb womoniyiibban ye mimyob dowaken kuu aron korem kwane angkimbaraneen.
Eb dingkimbed deme andowewen kuu korondaab ambangke dowan kere.