Yook 143
God yaningko kankooni ye yook Dewidbed wongkoon.
1 O Yariman, ne kurikuri wengamberewe.
Mimyob keewe awawe ande baandaan kuu wengamberewe.
Eb ma korondiyiibban weng awini kerekmeniib yorokomo kerekmeniib kuyaambed
ne yaa inanduwe.
2 Eb dememan ne kuu wengyundi dowad nen wanaab,
amborom kuu eb arinambo ari kuu karub maa ma yorokmo dobirindo kowe.
3 Kedi, bonman kuu nenbandoon,
kwane yembed neene kan okad yiri irewaroon,
kwane ongmoona kumun aom dobaraan,
unyeman anukbed dukniwendan kumun aom doriib areb keraan.
4 Kowe ne niindem aom kuu wuudne miin yiminban keraan,
kwane ne mimyob kuu unimbed yidne wonoon.
5 Ne kuu kurin kurin anuk ye aronki kuu meendobaan,
ebbed kurin anuk ambangkanabewen yaa kuu kube meendobeni
eb dingkimbed komo komo kamenabewen yaa andangke meendobaan kui.
6 Ne dingki kuu eb yaa benkoobe kurikuri keraan,
kwane ne niindem aom kuu okad amiibbanbed ok moom kerimaun areb eb kerekmen yaa moommo keraan.Selah
7 O Yariman, ne kingkin kuu kombarandamoon kowe,
kirodmo inanduwe.
Ne yaa kuu eb murubia kan yekne biknaab.
Kan yekne biknaneeb kuu bobkonombon yiri winiwen areb keraniin.
8 Ne kuu eb yaambed angkumone doriin kowe,
amkimo kuu korondebko eb womoniyiibban ye mimyob dowaken kuu ne yaa kanmonok.
Ne kingkin kuu eb yaa kankoone kabdaan kowe,
ne dowad kiwaan anam kuu korokbewe.
9 O Yariman, ne bondan yaambed ne nen burudande angka kowe.
Ne kuu eb kukbimaabbon aom doriin.
10 Eb kuu ne God kowe,
ne kedmengkawebko eb dowaken kuu ambangka.
Eb Kingkin amun kumbed
ne kuu okad dabonmo arimbed nen kinban wonok.
11 O Yariman, ewaningko dowad ne ongmewebko wadkera.
Eb yorokmo kerekmen yaambed ne dabab kandaan kuyaa ne nen burudande angka kowe.
12 Eb womoniyiibban ye mimyob dowaken yaambed ne bondan kuu kebene.
Ne yaa dabab kawimaibdan korem kuu monmare,
amborom kuu ne kuu eb dememan kowe.