Yook 28
Dewid ye yook.
1 O Yariman, eb yaa baandaan.
Ne aromkonombon, eb kuu ne yaa wunekaraab, inanduwe.
Amborom kuu inanduwaabban keraneeb kuu
ne kuu bobkonodem yiri kubune dangiwendan areb keraniin kowe.
2 Ne awawi dowad eb yaa baandaan kuu wengamberewe.
Ne dingki kuu eb kurikuri ambiwoom ye Yumbon Miin Karadmo Anam yaa benkoobe baandaan kui.
3 Ne kuu ambarakmidan yoom dabokne indore wanaab,
arewa kamimaibdan yoom kui.
Yi kuu angkodmendi weng yi dia doriibdan yaa dakmimaib kumban,
angkara kuu yi niindem aom kuu arud wandembirimaib.
4 Yimbed kwanimaib ye dowad man inende.
Kwane, yimbed arewa kamimaib ye dowad man inende.
Yi dingkimbed komo ambangkiwen kuu kwanemo man inende.
Kwane, kakman anam yi yaa man inende.
5 Amborom kuu Yarimanbed komo ambangkooniib
ye dingkimbed komo ongmenabooniib kuu yi ma meendobindo,
kowe yembed yi ben yiri kubunaneen,
kwane yembed yi ben ikakman ma ari nongkobaabban.
6 Yariman yaa amun kerunem!
Amborom kuu ne awawi ye dowad baandaan kuu wengamberewoon kowe.
7 Yariman kuu ne aromkono angkon ne kombe.
Ne inamen kuu ye yaa yone kowaine yembed awawimaan.
Kwane kowe ne niindem aom kuu kubimbed ware kandoon,
kwane ne kuu eso andi yookbed wingkaniin.
8 Yariman kuu ye karuwa nimaya yi aromkono,
kwane ye kuu yembed kinoon ye karub ye dowad aromne dorondandi ye karub.
9 Eb karuwa nimaya kuu ben burudande binde.
Ebbed kingkewendan kuu amun kerunde.
Yi ben dorondare oone.
Yi ben amukne, aron korem.