Yook 32
Dewid ye yook. Maskil ye yook.
1 Kane kane yi wabkad kami yaa are nonondandoon kuu yi kuu amun kerundoon,
kane kane yi ambarakmi kuu are nonondandoon kangkon.
2 Kane kane yaa Yarimanbed arewadan ande yedmindo kuu amun kerundoon,
kane kane yi niindem aom kuu dudanabiyiibban kui.
3 Ne ambarakmi dakmokban keraan kuu
amkimombed wene amnoom kuu wareki kamembirimain kumbed
wuudne aromkonoyiibban keraan.
4 Amborom kuu awingyawiib amnoomiib kuu
eb dingkimbed ne arewa kami naawonmo didangkawembirimaab,
kowe ne aromkono kuu dowan keroon,
am kaine niminmo kere mongkobon nuubnemoon areb keroon kui.Selah
5 Kwanoona ne kuu ne ambarakmi ben eb yaa dakmaan,
ne arewa kami kuu eb yaa ben bikderebindo kui.
Neka nemeren yedmaan, “Ne wabkad kami kuu
Yariman yaa dakmaniin.” andaan.
Kwane ebbed ne ambarakmi are nonondandeewe
ne ambarakmi dowad ne meendobi arewa kuu dowan keroon.Selah
6 Kwani kowe, kane kane eb kerekmen ye kiwaan ari doriib kuu
aroniib keroka yi korem eb yaa kurikuri kerime.
Anam kuu kwananiib kuu urok areb dabab yemoon menebaneen kuu
kubunokban keraniib.
7 Eb kuu ne biknimbon,
dabab menebaneen kuu ebbed ne nen burudande angka koweneb,
burudande bindi ye yook yemoon kai bangkawaneeb.Selah
8 Yarimanbed yedmoon, “Nembed eb dobiri dowad kiwaan amun korokbebdeni kedmengkabdaniin,
kwane nembed ongkabde oonebdaniin kii.
9 Hoos o donki yi inamen areb keraib,
yi kuu inameniibban kowe.
Kwane yi kuu korok ari abakiib mongkod aom buniib nong kuyiib kuyaambed awine nenwini kumbed yimin,
kwanaabban kuu ewiib yaa manaibban.” andoon.
10 Arewa kamidan yaa kuu kubiyiibban yemoon menebimaan,
kumban kane kane Yariman yaambed yone doriib kuu
ye womoniyiibban ye mimyob dowaken kumbed yi yaa kanawanewandimaan.
11 Yorokmodan, yiib kuu Yariman yaa dowaken kere kubime!
Kwane, niindem aom kangdommo doriibdan, yiib kuu ye yaa kube baandime!