Yook 34
Dewid ye yook. Abimelek ya arinambo ari warudki areb iraroona Abimelekbed nen kowoona wonoon kumbed wongkoon.
1 Ne kuu aron korem Yariman yaa amun kerunimamaniin,
kwane ye aningko kankooni weng kuu korondiyiibban dakmembaraniin.
2 Ne kingkiniib kumbed Yarimanbed komo komo kamenaboon ye weng yaa kerengkan kamaniin,
kwane kane kane yenambed ben kubuniwendan kuu wengamberekorib kubaniib.
3 Yiib kuu minibko Yariman ye yirin darewoob dakmendem,
kwane ye aningko kuu nub ibonmo kankoonem.
4 Ne kuu Yariman yaa awawe ande kurikuri keraana inanduwoon,
kwane nembed unimain korem yaa kuu ne nen obon keruwoon.
5 Kane kane ye yaambed yone dobiriwen kuu kubembiriwen,
kwane karak ye kubun kumbed yi murubia ma kebenaanban dowan.
6 Ne durud yewed aombed Yariman yaa baandaana wengamberewoon,
kwane dabab ne yaa meneboon korem yaa kuu yembed nen obon keruwoon.
7 Yariman yaa une bumangkimaibdan kuu ye engyumbed dorondandimaan,
kwane kuye engyumbed yi ben burudande angka nongkobimaan.
8 Yariman ye inamen ye ambod kande wedme amun kai kii andime.
Kane kane yembed kukbimaanbon aombed dobaraniib kuu amun kerundaneen.
9 Yarimanbed karadmo kerundoondan, yiib kuu ye yaa une bumangkime,
amborom kuu ye yaa une bumangkidan kuu yi yaa kuu ma dowan keraanban.
10 Laiyon ingkod kuu animaniibban keraniib kuu mungimo wuud keraniib kumban,
Yariman yaa awande ande kurikuri keridan kuu amunmo dobaraniib.
11 Ne danaya, mene ne yaa wengambirime,
kwanibko nembed Yariman yaa une bumangki ye kiwaan kedmengkanda.
12 Yiib kane kane wad dobiri yaa dowakeniib kerenib
aronki yemoon amunmo dobarandamibka,
13 yiib kuu weng arewa dakmi yaa kuu kangkadmenib
dudanabi weng yiib mongkodem aombed dembi kuu kebenenib
14 kami arewa yaa amonombenib amun amun kamenabenib
yena yoom yewenubmo dobiri kerekmen yaambed doberenib kuyaa meeni darewoob kerime.
15 Yariman ye indob kuu yorokmo kame doriibdan yaa kerenombirimaan, yi awandi dowad,
kwane ye kerendem kuu yi baandi yaa nandimaan.
16 Arewa kamidan yaa kuu Yariman ye murubia kande yangmad kerimaan,
kwane yi aningko araneene yenambed yi yaa ma meenaibban.
17 Yorokmodan kuu baandaiwe Yarimanbed wengambirimaan,
kwane yi yaa dabab menebaane yembed ben burudande obon kerundimaan.
18 Mimyob wandi miin yiminban kerimaibdan kuu Yarimanbed yi dia mene dobirimaan,
kwane kane kane yenambed ben kubune inamen korem monmarimaibdan kuu yembed ben burudande obon kerundimaan.
19 Yorokmoman kuu dabab yemoon menebimaan,
kumban Yarimanbed kuye dabab korem yaambed ye nen burudande obon kerunimaan.
20 Ye kono korem kuu oonimaan,
ma domokbaanban.
21 Arewa kamidan kuu arewambed monmaraneene duknaniib,
kwane yorokmodan yi bondan kuu wengyunde ukum kondaneen.
22 Kumban Yariman kuu ye demedan biddimaan,
kwane kane kane yembed kukbimaanbon aombed dobaraniib kuu yembed wengyunde ukum kondaanban.