Yook 37
Dewid ye yook.
1 Arewa kamidan yaa meendobembaraib,
kwane ambarakmidan yi dobiri amun yaa wungkandaib.
2 Amborom kuu yi kuu kereekbed aron doboobban nuubne koknemoon areb kerimaib,
kwane yi kuu arub koknimaan areb aron doboobban ari duknaniib kowe.
3 Yariman yaa angkumone doberenib amun amun kamenabime,
kwane okad kirikee doberenib korondiyiibban ye weng awinime.
4 Yiibkareb Yariman yaambed kubenime,
kwananiib kuu yembed yiib niindem aom meenmiib yeman kuu kondaneen.
5 Yiib wad dobiri kerekmen kumundin kuu Yariman yaa konime,
kwane ye yaambed yone dobirime. Kwananiib kuu yiib yaa awandaneen.
6 Yembed yiib yorokmo kerekmen kuu ben ongmaneene warewini ye namberemoon areb keraniib,
kwane yiib kangdod weng anam kuu kan ongmaneene aronkob yaa yuremoon areb keraneen.
7 Yariman yarinambo ari kuu iwari kerenib yembed kwananeen ande yodbirimban ema meedmime,
kwane kane kane arewa kamaniib kuu yimin keraneen kuyaa meendobembaraib,
yimbed inamen arewa ongmenib kwane ambangkaniib kuyaa kui.
8 Norina aruda yaa kuu deerewandekorib amonombime,
kwane meendobembaraib, meendobembaraniib kumbed arewa kamaniib kowe.
9 Amborom kuu arewa kamidan kuu yi yumbon yaambed nadme ben kiradmaneen kumban,
kane kane Yarimanbed ari kwananeen ande meedmaniib kuu okad kuyaom yumbon kandaniib.
10 Aron dukmenmo arimbed arewa kamidan kuu ma dobaraibban dowan,
kwane yiib kuu yi ande onmaniib kumban yi kuu ma wedmaibban.
11 Kumban yika kankubuniwendan kuu okad kuyaom yumbon kandenib
yewenubmo kube dobaraniib.
12 Arewa kamidan kuu yorokmodan yaa wunonwanon kamenib,
arud wande ningkambo kabang kamendimaib.
13 Kumban Yarimanbed arewa kamidan yaa ambon kamendimaan,
amborom kuu ye yekaad yi ben wengyundi yaron kuu menuun kowe.
14 Arewa kamidan kuu yi kerewang ben biangkenib
anangkab be angkokbimaib kuu,
kamboknondaniib awandime ande meeniibdaniib yaa ben kubudiri dowad,
kwane kangdommo doriibdan yenbandi dowad kui.
15 Kumban yikareb yi kerewangbed yi mimyob yaa dem nabangkaniib,
kwane yi anangkab kuu domabangkaniib.
16 Yorokmodanbed amunmo dobere yiribman yemoonban bemoon areb yiribman yemoonban be dobaraneeb kuu amun,
arewa kamidan yemoonbed birande yiribman yemoon bemoon areb yiribman yemoon kai be dobaraneeb arebban.
17 Amborom kuu arewa kamidan yi aromkono kuu monmaraneen,
kumban Yarimanbed yorokmodan yaa angkumone awandimaan.
18 Yariman kuu ambarakmiwen kii ande kadwondiyiibbandan yi weeb kuu yekaadkeroon,
kwane yi yumbon kandiwen kuu aron korem kwane angkimbaraneen.
19 Monmare arewa keri yaron ari keranuun kuu yi kuu karak kandaibban,
yongkonbi kere animaniibban aron keranuun kuned yi kuu animan yemooniib keraniib.
20 Kumban arewa kamidan kuu monmaraneene duknaniib,
kwane Yariman ye bondan kuu at wuung nong wuung areb,
erebnarimban dowan keraniib, amareng areb are wene kirodmo dowan keraniib.
21 Arewa kamidan kuu araben kandimaib kuu angkon ika inendimokban,
kumban yorokmodan kuu nindorokiibbed kondimaib.
22 Kane kane Yarimanbed amun kerundaneen kuu okad kumaom yumbon kandaniib,
kumban kane kane yembed butun kerundaneen kuu yumbon kuyaambed nadme ben kiradmaneen.
23 Kwane Yarimanbed karub maa ye dobiri kerekmen yaa amun ande dowakeniib keraneen kuu,
ye yon dodki kuu kangdommo kerunaneen.
24 Kuye karub kuu boknandaneen kuu kombaraanban,
amborom kuu Yarimanbed ye dingki yaa awinene ongmaneene kangdommo dobaraneen kowe.
25 Anuk kuu ne kuu kewedman kere kibikee ne kuu kiomnaan,
kuned ne kuu ma wedmaane yorokmodan kuu korem domondindo,
kwane ma wedmaane yi danambed animaniibban keroona ma kaamobenmo yarindo.
26 Yorokmodan kuu aron mimim nindorokiibbed munob bangkandenib araben kondimaib,
kwane yi dana kuu amun kerundi yeman.
27 Arewa yaa koronde amonombe amun kamime,
kwananiib kumbed okad kuyaom kuu aron korem dobaraniib.
28 Amborom kuu Yariman kuu wengyundi anam yaa dowakeniib kerunoon,
kwane kane kane ye yaa korondiyiibban ye weng awine doriibdan kuu yembed ma domondaanban.
Yi kuu aron korem dorondandaneen,
kumban arewadan yi dana meed kuu yumbon kuyaambed nadme ben kiradmaneen.
29 Yorokmodan kuu okad kuyaom yumbon kandenib
kuyaom aron korem dobaraniib.
30 Yorokmoman ye weng dakmimaan kuu inamen kangdommo,
kwane ye weng kuu wengyundi anam yaambed dakmimaan.
31 Ye God ye amob kuu ye niindem aom kowe,
ye yon kuu kereeb beresare kombirimokban.
32 Arewa kamidan kuu yorokmodan yi dowad biknimbon aombed yemyeb dibere meedmimaib,
yi wadkeri monmari dowad.
33 Kumban Yariman kuu yorokmodan domondaane bondan yi aromkono aom awunaibban,
kwane ye kuu yorokmodan domondaane bondanbed kangdod aombed wengyunde ukum kondaibban.
34 Yariman yaa meedmenib
ye kiwaan yaambed winime.
Yembed yiib aningko kankoonaneene okad kuyaom yumbon kandaniib,
kwane arewa kamidan kuu yi yumbon yaambed nadme ben kiradmaneen kuu yiibka wedmaniib.
35 Ne kuu wedmaane mimyob keendiyiibban kere arewa kamenabi ye karub kuu
at yeeb kumbed ye okad anam yirimbed kirod kaine yiminmo amnemoon areb kamoon.
36 Kumban aron doboobban arimbed bobnoon kuu korem dowan keroon.
Ne kuu ye ande onmaan kumban ye kuu ma wedmenindo.
37 Ambarakmiwen kii ande kadwondiyiibban yimo doriibdan yi dobiri yaa kuu ongme meene wedmendime,
kwane kangdommo doriibdan yi dobiri yaa andangke meene wedmime.
Amborom kuu kane kanembed yewenubmo dobiri ye kiwaan arimbed doriib kuu ari danayayiib awoyayiib keraniib.
38 Kumban ambarakmidan korem kuu monmaraneen,
kwane arewa kamidan yi danaya awoya kuu yi yumbon yaambed nadme ben kiradmaneen.
39 Yorokmodan ben bobni yaa burudande bindi ye kiwaan kuu Yarimanbed ongmoon,
yi yaa dabab minimaan kuu yembed awande dukmondimaan.
40 Yarimanbed yorokmodan kuu awandene arud ye barang yaambed ben angka nongkobimaan,
kwane yembed arewa kamidan yaambed dorondandene yi ben angka nongkobimaan,
amborom kuu yi kuu yembed kukbimaanbon aombed dobirimaib kowe.