Yook 44
Yook ambo bi ye karub yeman. Maskil ye yook Korah ye awoyambed wongkiwen.
1 O God, nubka kub kerendembed wengamburuwen,
kwane nub awoyambed unyeman yiri yi dobiriwen yaron yaambed
ebbed komo kamewen kuu nub yaa daandiwen.
2 Eb dingkimbed ambibkin maa maadan ben angkanekoreb,
nub awoya ben kuri nongkobewen.
Ebbed nimakarub kuyaa dobiriwen kuu dore boknekoreb
nub awoya ongmendeewe amunmo dobiriwen.
3 Kedi, nub awoya kuu yi kerewang yaromkono yaambed burudande okad kandindo,
kwane yi dingkimbed nangbe burudandindo.
Kukuu eb dingki wiwi yaromkonombed kwane burudande okad kandewen,
kwane eb murubia ye nambirimbed nangbe burudandewen,
amborom kuu ebbed yi yaa dowakeniib kerundewen kowe.
4 Eb kuu ne God ne king,
Yekob ye awoya ari yi dowad inamen ongmaawe yi bondan yaa nangbe burudandimaib.
5 Eb yaambed dore nub bondan kuu ika yenbanden winimaub,
kwane ewaningko yaambed nub manmo kerimaibdan kuu nubbed nangbe burudandimaub.
6 Kedi, ne anangkab kuyaambed nangbe burudanda ande meenimokban,
kwane nembed nangbe burudandimain kuu ne kerewangbedban.
7 Anam kuu ebbed nub bondan yaa nangbe burudandi yaromkono kondimaab,
kwane ebbed nub yaa manmo keriwendan yaa karak kondimaab.
8 God, eb dowad kerengkan kamimaub, amkimombed wene amnoom,
kwane ewaningko aron korem kankoonimamanuub.Selah
9 Kumban kibikee eb kuu nub yaa wunekareneb ben yiri kubunewen,
kwane eb kuu nub ana nangmidan yoom ma wanaibban.
10 Nub bondan miniiwe ebbed nub ongmendeewe ikakman kirokmonuwen,
kwane nub yaa manmo keriwendan kuu nub yaa nangbe nub yiribman biwen.
11 Ebbed nub ongmendeewe sibi yeen anemoon areb keriwen,
kwane ebbed nub ben bokesawareewe ambibkin maa maa yaa wenebuwen.
12 Eb nimakarub kuu od embeng mana yeman ben berengkewen,
kwane yi ben berengkewen kuu ari ma idiib kerindo dowan.
13 Ebbed nub ben ongmendeewe nub dia doriibdan yi indob arimbed dedmone dandi yeman keriwen,
kwane yi kuu nub yaa damangkande ambon kamendimaib.
14 Ebbed nub ben ongmendeewe ambibkin maa maadanbed nub dowad nongdomatomdan andimaib,
yi kuu nub yaa mungkuwande korok waaburukmimaib.
15 Ne karak kuu ne arinambo ari angkimbirimaan, amkimombed wene amnoom,
kwane ne murubia kuu karakmo kerimaan,
16 amborom kuu ne yaa dedmone dawimaibdanbed damangkawimaib kowe,
ne bondan kui, inande dabab kawimaibdan kui.
17 Korem kee nub yaa kwane menebimaan kumban,
nub kuu eb yaa nonondandimokban kere
eb amob weng yaa korondimokban.
18 Nub niindem aom kuu eb yaa ma koronde ika winindo,
kwane nub kuu eb kiwaan ari koronde kimyen winindo.
19 Kumban ebbed nub kuu dore beengkeneb nuwokad kan amonombe dura anon arewa yi okad areb kerundewen.
Kwanekoreb, nub kuu kumun darewoob kumbed kebenendewen.
20 Nub kuu nub God yaningko nonondandunekorub
oworan yi god yaa bumangkuwen karen,
21 anam kuu God kuu kuyaa wedme yekaadkeroon karen,
ye kuu biknoon ye inamen korem yekaadkeroon kowe.
22 Kuned eb dowadbed amkimombed wene amnoom kuu bobni yaa wedmimaub,
kwane nub kuu sibi areb ogoodmo yenbandi kuu yimin andimaib.
23 O Yariman, yaro dembe! Komande angkimaab?
Ebkareb yaro dembe! Nub yaa aron korem wunekarundaab.
24 Eb komande murubia kan yereknekoreb
nub durud yewediib nub yaa yenbandiyiib ye dowad ma awandindo kerewen?
25 Nub kuu bobni ye dungkun yaa doruwen,
kwane nub id kuu okadbed yobdoodmo awineen.
26 Dembe, nub awande.
Eb womoniyiibban ye mimyob dowaken ye dowad nub bidde.