Yook 46
Yook ambo bi ye karub yeman. Alamot ye kiwaan wingki yeman. Yook kuu Korah ye awoyambed wongkiwen.
1 God kuu nub ben kukbimaanbon angkon nub aromkono,
kwane dabab aron yaa kuu awandande nekwimbed doreenmo.
2 Kwana kowe, dowodki mananeene okad amonombanuun yaa o
aangko aangko dande karamok yiri kirobaniib yaa kuu nub kuu unaubban.
3 Karamok umbakiib kuwengiib ok kamokiib kamanuun o
kuye arud kumbed aangko aangko kiringmaniib kangkon unaubban.Selah
4 God ye siti aombed kubi kanminimaun ye ok awaan angkuun,
kuye siti kuu karadmombon, Korem Burudandoon Arimbed Ye God kuyaa doreen kui.
5 Kuyaom kuu Godbed doreen kii, kuye siti kuu komombed ma monmaraanban.
Warewinimbed God kuu awande oonendaneen.
6 Ambibkin maa maa kuu yirinde baandiiwe, angkon oonimbon maa maa kirobiiwe,
God ye baandi kuweng daandeene okad kuu okmo kereen.
7 Ana nangmidan yemoon ye Yariman kuu nuwiib doreen,
Yekob ye God kuu nub dorondandi ye karub.Selah
8 Yiib menenib Yariman ye ambangkanabi kee wedmime,
okad ari ke monmarenaboon kee wedmime.
9 Yembed okad yimin yimin yaa kuu ana nangmi kebenimaan,
kwane yembed anangkab domabangkene marad ben monmarene
kombe kuu amotbed denimaan.
10 Yembed yedmimaan, “Ne kuu God kowe iwari kerenib wedme meendobe kaadkerime.
Ne aningko kuu ambibkin korem ye nimakarubbed kankoonaniib,
kwane ne aningko kuu okad korem yaambed kankoonaniib.” andimaan.
11 Ana nangmidan yemoon ye Yariman kuu nuwiib yaa doreen,
Yekob ye God kuu nub dorondandi ye karub.Selah