Yook 75
Yook ambo bi ye karub yeman. “Monmaraib” andi ye yook ye kiwaan yaambed wingki yeman. Asaf ye yook. God yaningko kankooni ye yook.
1 O God, nub kuu eb yaa eso anduub,
amborom kuu eb kuu dia doreeb kowe.
Binangke eb yaa anam andi yeman ambangkanabewen kuu nimakarub kuu dakmimaib.
2 Ebbed kwane dakmeeb, “Nembed aron kuu kine kowaan,
yorokmo wengyundi ye karub kuu ne kei.
3 Kwane, okadiib yu nimakarub koremiib kiringmaniib kuu
nembed ambokab yiri kuu yobdoodmo awinaniin.Selah
4 Nembed kerengkandan yaa yedmaan, ‘Kibikbed ari kuu ma kerengkan kamaib.’ andaan,
kwane miin arewa kamenabidan yaa yedmaan, ‘Yiib aromkono yaa kerengkan kamaib.
5 Yiib aromkono yaa miin kerengkan kamaib.
Kwane yiib kuu wabkad kere kerengkan kamaib.’ andaan.” andoon.
6 Karub maa kane aron dembimaun angkambed o aron kubunimaun angkambed
o amiibban ye amboon angkambed karub maa yaningko kankoonaanban.
7 Kumban kukuu wengyundimaan ye God,
yembed maa kuu nen kubudere maamo yaningko kankoonimaan.
8 Yariman ye arud kuu wain ok kamokiib areb,
ambodmo kandene kook yeman yenayiib dabokne ongmene kabus aom bunoone daadere demboone,
onduknoone miin arewa kamenabidan okad yimin yimin yaa doriib kuu
yi korem kuu anenmo kawene kibin yirimo keriwen.
9 Kumban ne kuu God ye dowad aron korem dakmembaraniin,
kwane ne kuu Yekob ye God yaningko kankoone yook wingkaniin.
10 Yembed miin arewa kamenabidan yi aromkono kuu kan kubune dowan keraneen,
kumban yorokmodan yi aromkono kuu darewoob arimbed kerundaneen.