Yook 79
God yaningko kankooni ye yook Asafbed wongkoon.
1 O God, eb yaa yikaadban ye ambibkin maa maadan kuu ebbed nub yaa kondewen ye okad aom ana nangme awudiriwen,
kwane yimbed eb kurikuri boyambib karadmo kuu monmare yon dowod yeman kerundiwen,
kwane yimbed Yerusalem aom ambib monmare arewa keriwen kii.
2 Yimbed eb demedan yi bob id kuu ayari on yi animan yeman bangkandiwen,
kwane eb karadmodan yi bob id kuu okad yiri dingkan yiman keriwen.
3 Yimbed Yerusalem aom kuu nimakarub yeenembiri ye umkanbed ok areb bune awanewandoon,
kwane bob id mangkanabaneen ye karuwiibban keroon.
4 Nub kuu nub dia doriibdanbed dandi yeman kerenib,
nub yaa ambon baande damangkandimaib.
5 O Yariman, aron komoyiib nub yaa norin keendembaraneeb? Aron korem dee?
Aron komoyiib koren areb kerewen kumbed norin niminiib wandaneeb?
6 Eb yaa yikaadban ye ambibkin maa maadan yi ari kuu eb norin ondukne.
Eb yaa baandimokban ye ambibkin maa maadan yi ari kangkon eb norin ondukne.
7 Amborom kuu yimbed Yekob ye awoya ari nub korem yenbandenib
nuwambibkin monmariwen kowe.
8 Nub awoya yiri yi ambarakmi yaambed nub yaa bon kere dabab kondaab,
kwane eb mimyob kowi kara kuu kirod nub yaa mene awandok,
amborom kuu nub kuu ben kubune miin yirimo kerundiwen kowe.
9 O nub Bobni Yaa Burudande Bindi Ye God, nub yaa awande,
ewaningko nambiriyiib keruni dowadbed.
Nub kuu bondan yaa burudande bindeneb nuwambarakmi are nonondande,
ewaningko ye dowadbed.
10 Eb yaa yikaadban ye ambibkin maa maadan kee
nub dowad “Yi God kuu kuna?” ande kamimaib kuu ebbed kebene.
Yimbed eb demedan yenbande umkan kowiwen kuu ebbed kakman kowaneeb kuu,
yi yaa korokbebko yikaadkerime, nub kerebiri arimbed.
11 Yimbed nub yena awingke benwiniwendan yi wareki kuu yangmadandaab.
Kane kane dukni yeman andiwendan kuu eb aromkono darewoobbed ben angka nongkobe.
12 O Yariman, nub dia doriibdan yi ari kuu
yimbed eb yaa dabdi yeman kere dabab bangkabdiwen kuu
neman inandunde ediib kerunde.
13 Eb nimakarub nub kuu eb kereek amun ari ye sibi areb kowe, yi yaa neman inandunde ediib kerundaneeb kuu,
ewaningko aron korem kankoonembaranuub,
awoya yaro dobere dobere yaro wananiib korem kuu
ewaningko kankooni ye weng dakmembaraniib kui.