Yook 83
God yaningko kankooni ye yook Asafbed wongkoon.
1 O God, komo keroon yaa kuu iwari keraab,
o God, iwari keraab, kwane kuyaa kuu yangmadandaab.
2 Kedi, eb bondan kuu yirinde baande kamiib,
eb yaa arud wandembirimaibdan kuu wabkad keriwen kui.
3 Yi kuu eb nimakarub yaa inamen bangbangbed nuubnaan kamiib,
kane kane yaa ebbed bobne komberewendan yaa kuu yimbed wunonwanon kamiib kui.
4 Yikareb yedmimaib, “Minibko nub kuu yi yeene monmarubko yi ambibkindan dowan kerok,
kwane yi korem yenbandubko ambibkin Israel andi kuu okaddanbed korem nonondandundime.” andimaib.
5 Yi kuu weng mimo kan kowe inamen ongmenib,
eb yaa bon keri ye amob weng ongmiwen.
6 Yi kuu Idomdaniib Ismaeldaniib
Moabdaniib Hagaadaniib
7 Gebaldaniib Amondaniib Amelekdaniib
Filistiadaniib Taiyadaniib kui.
8 Asiriadan kwangkon yi yaa dabokniwen,
aromkono darewoob arimbed kerundi dowad Lot ye awoya ari yaa kui.Selah
9 Midiandan arewa kerundewen kwamune areb yi yaa kerunde.
Sisera yoom Jabin yoom yaa ok Kison yirimbed arewa kerundewen kwamune areb yi yaa kerunde.
10 Yi ayoob kuu Endoo angkambed dukniwen,
kumban mangkindo oyareb andiiwe okad kuri dange deendiwen.
11 Eb bondan yi korok korok kuu ebbed Oreb yoom Seeb yoom yaa komarewa kamendewen kuu kwane arebmo kwane kamende.
Yi kuu Seba yoom Salmuna yoom ebbed yeene nongkobewen areb kerime.
12 Yi ayoob yedmiwen kuu, “God ye bidambib kumbed
Israeldanbed yi sibi kabungke kainderebi yeman kuu be nubka oonem.” andiwen.
13 O ne God, yi kwane ben buyokbayok kamebko ingkudmanandeb areb o
nati kurukab areb nuubbed awuune ben winimaan areb kerime.
14 Amotbed dura nengke korem denuun areb o
amot yumbumbed aangkombon denobenmo yaruun areb kuu
15 yi kuu amaa nuuwaa nambadaa areb eb arud wande yenbure wene.
Kwane yi kuu uniwon karakwon kerunde.
16 O Yariman, yi murubia ari korem kuu karakbed kebendebko,
eb ande onmime.
17 Yi kwamune yimin wandaanban ye karak kandenib yi niindem aom miin yiminban kerime,
kwane yi aningko yirimo kowebko duknime.
18 Yi kwamune yikaadkerime, ewaningko kuu Yariman,
ebbedmo kuu okad kumundin burudande arimbed ye God kui.