Yook 9
Yook ambo bi ye karub yeman. “Dana Bobnoon” ye yook ye kiwaan yaambed wingki yeman. Dewid ye yook.
1 O Yariman, ne niindem aom kumundin kumbed ewaningko kankoonaniin,
kwane binangke eb kuu anam andi yeman korokbendewen kuu dakmaniin.
2 Eb yaa dowakeniib kubiyiib kerubdaniin,
Korem Burudandoon Arimbed Ye God, ne kwane ewaningko yaa kubebdeni wingkaniin.
3 Eb angkaderewen kowe, ne bondan kuu yiminban kere ika winiwen,
kwane yi kuu kirobe dukne winiwen.
4 Amborom kuu eb kuu kangdod yumbon ari kuu dibere yorokmombed wengyundimaab kowe,
ne inamen kuu ebbed wengyunde ee yimin andewen.
5 Ebbed ambibkin maa maadan yaa kamkono weng kondeneb, arewa kamiibdan kuu ben monmarewen,
kwane yi aningko kuu arewen kumbed dowan keroon, aron korem ye dowad.
6 Aron korem ye monmari kuu bondan yaa meneboon,
kwane yi kambong kuu ebbed monmarewen,
kedi, yi aningko kuu nonondande dowan keroon kii.
7 Kumban Yariman kuu aron korem oonembaraneen,
kwane ye dibere kangdod kondimbon kuu nekwoon.
8 Ye kuu okad yiridan ben yorokmombed wengyundaneen,
kwane ye kuu ambibkin mimimdan yaa konomdangmo wengyundaneen.
9 Yariman kuu dabab wayiroondan yi ben kukbimbonman,
kwane ye kuu yobdood meneboon yaa aromkonoyiib dobirimbonman.
10 O Yariman, eb yikaaddan kuu eb yaambed yonenib ebbed kwananeeb ande inamen kowaniib,
amborom kuu eb ande miniwendan kuu eb kuu yi yaa angkurom korokbaabban kowe.
11 Yariman kuu Sayion arimbed oone dobirimaan, ye yaa kubene wingkime,
kwane yembed komo ambangkoon kuu ambibkin mimimdan aom yaa dakmime.
12 Amborom kuu kumka o kuman kamiibdan yaa kakman inandi ye God kuu dabab meneboondan yaa meenimaan,
yi kuu ye yaa kwane baandimaan kowe yi yaa akmen naknod kere nonondandimokban kui.
13 O Yariman, ne bondanbed durud yewed ke kawiwen kee wedmende.
Mimyob keeweneb bobni ye ambongko yaa kee nenkone burudande.
14 Kwanebko, Saiyon ye mungkan Yerusalem yu kuuk ambongkodem aombed
ewaningko kankooni weng korem dakmeni,
bobni yaa burudande bindi ye kiwaan ebbed ongmewen ye dowad kuba.
15 Ambibkin mimim kuu yi bondan kirobime andi ye dem nidkiwen kuu yika kuri kirobiwen,
kwane yi yon kuu yika yi kawaad nong kowe bikniwen kumbed awindoon.
16 Yariman kuu ye wengyundi yorokmo kumbed ye inamen korokboon,
kwane arewa kamidan kuu yika yi dingkimbed komo ambangkiwen kumbed kawaad nongbed awindemoon areb keriwen.
Higaiyon. Selah
17 Arewa kamidan kuu ika bobkonombon yiri wananiib,
God yaa wunekare nonondandiwen ye ambibkin mimimdan korem kui.
18 Kibikee kamboknondan kuu awandiyiibban kumban Godbed aron korem yi yaa nonondandaanban,
Godbed kwananeen ande meeni ye inamen kuu kibikee yobdood meneboondan yaa kuu dowan, kumban aron ari kuu kuye inamen kuu ika awinaniib.
19 O Yariman, yaro dembe.
Korondaawa kangdod aom kuu karubbed eb kan kubunaib.
Ambibkin mimimdan kuu eb kerebiri arimbed kangdod kerunde.
20 O Yariman, yi kuu ongmendebko unime.
Korokbendebko, ambibkin mimimdan kuu nimakarub dokmenmo kuu yikaadkerime. Selah