Yook 94
1 O Yariman, eb kuu arewa kamenabi yaa kakman kondi ye God,
o arewa kamenabi yaa kakman kondi ye God, eb angkadere.
2 O okaddan yaa Wengyundi Korok, yaro doreneb,
kerengkandan komo kamenabiwen kuyaambed kakman ingkande.
3 O Yariman, miin arewa kamenabidan kee komarewa?
Miin arewa kamenabidan kuu aron komoyiib kubembaraniib?
4 Yi kuu nubbedmo yimin andi ye weng yemoon dakmenabimaib,
miin arewa kamenabidan korem kuu kerengkan weng dakmimaib kumbedmo.
5 O Yariman, yi kuu eb nimakarub ben yob beengkemoon areb kerundimaib,
yi kuu ebbed yumbon kondewendan yaa dabab wayirimaib.
6 Yi kuu iribdaniib owoddaniib yeene nongkobimaib,
kwane yi kuu anenabdan kuman yenbandaiwe duknimaib.
7 Yimbed kwane yedmimaib, “Nubbed komo kamuub kuu Yariman ma wedmendokban,
Yekob ye God kuu yangmadande doreen.” andimaib.
8 Israeldan yi inameniibbandan, yiib kuu kaadkerime!
Awon korokdan kui, yiib kuu komo aron arimbed kaadkeraniib?
9 Kerendem ongmoon ye God kuu wengambirindebankowoo?
Indob ongmoon ye God kuu wedmindebankowoo?
10 Ambibkin maa maadan didangkimaan ye God kuu ongkandindebankowoo?
Nimakarub kedmengkandimaan ye God kuu kaadkerindokowoo?
11 Yariman kuu nimakarubbed komo komo meenimaib kuu yekaad,
kwane yi kuu inumni mimo areb kangkon yekaad.
12 O Yariman, ebbed didangkewenman kuu amun kerunewen.
Eb amob yaambed kedmengkanewenman kangkon amun kerunewen.
13 Kuye karub kuu ye yaa dabab menebaneen kuu ebbed nen awanenaneeb,
miin arewa kamenabidan yi dowad dem nidke dowan keraneeb kumbed.
14 Amborom kuu Yariman kuu ye nimakarub yaa domondaanban,
yembed yumbon kondoondan yaa domondaanban kui.
15 Amaan ari kuu korok korokbed angkon ika yorokmo ye kerekmen yaambed wengyundaniib,
kwane kangdommo doriibdan korem kuu kuye wengyundi yorokmo yaambed dukmonaniib.
16 Kanembed ne dowad yaro miin arewadan yaa manmo keraneen?
Kanembed ne dowad ambarakmidan yaa manmo keraneen?
17 Yariman kuu ne yaa ma awawindo karen,
ne kuu aron yemoonban ari iwarimo kere bobnaan karen.
18 “Ne kuu kombarandamiin.” ande yedmaniin kuu
o Yariman, eb womoniyiibban ye mimyob dowaken kumbed angkumone nen kowaneeb.
19 Ne kuu uniyiib meeni darewoob keraan yaron kuu
ebbed ne yaa mimyob keewe ne meeni darewoob kankubuneewe kubiyiib keraan.
20 Ooni ye inamen unitab arewa ye karub kuu eb yaa daboknaneenoo? Dowan.
Manmo kerundi ye amob arewa ongmi ye karub kuu eb yaa daboknaneenoo? Dowan.
21 Yi kuu nedbenib yorokmodan yaa manmo kerimaib,
kwane yi kuu ambarakmindodan yaa dudanabe ambarakmiwen kowe dukni yeman ande wengyundimaib.
22 Kumban Yariman kuu ne aromne angkumonimbon keroon,
ne God kuu ne aromkonombon, yeyiib yaa wanaine kukbimaan.
23 Yi ambarakmi ye dowad kakman kondene
yi miin arewa kamenabi dowad monmaraneen,
Yariman nub Godbed yi yeene monmaraneen kui.