3
God Yeka Ye Weng Yaa Korondimokban Awinembirimaan
1 Kwani kowe, Yuudan kuu ambibkin yenadan burudande yumbon arimbed kandiwen dee? Kedi, kad wadmi kuu id amuniiwoo?
2 Anam kai! Kiwaan korem yaambed id darewoowiib kii! Meeni ibduruk kuu Yuudan kuu Godbed ooni dowad ye weng kondoon.
3 Kumban Yuudan yena kuu anam andindo kowe, komarewa meenanuub? Yi anam andiyiibban keriwen kumbed God yeka ye weng yaa ma korondimokban no awinembiri ye inamen kebenaniiwoo?
4 Dowan kii! Wedmem, God ye kuu anammo, nimakarub korem kuu dudanabidan. God Ye Weng aombed kamune yedme wongkoon,
“Eweng kuu yorokmo ande korokbendaneene,
yenambed eb wengyundaniib kuu ebbed burudande doraneeb kii.” andoon.
5 Kwane kowe, nub ambarakmi kumbed God ye yorokmo kiwaan kan dian kuroon kumban, nimakarub yi inamen yaambed “God kuu nub yaa ye norin arud kanmonoon kuu inamen yorokmomban.” ande yedmanuub dee?
6 Dowan kii! God kuu yorokmomban karen kuu, yembed okad yiridan korem wengyundindeban karen.
7 Karub maa kane kamune yedmaneen, “Ne aadikmenabi inamen abdon kumbed God kuu anam anammo yaambed doreen kuu dian korokbaneene ye nambiri kuu ika darewoob keraneen kowe, komande Godbed ne ambarakmi dowad wengyunde dabab kawaneen?” andaneen. Weng arewayee!
8 Karub yenambed wengamborokbande yedmimaib, “Pool awenembed yedmimaib, ‘Arewa kamem, kwananuub kumbed amun amun dembimaan.’ ” andimaib. Kwamune andanuuwoo? Dowan! Kwane andimaibdan kuu Godbed wengyunde dabab kondaneen kuu yimin kii.
Mim Kane Kuu Yorokmomban
9 Kwanekob, nub Yuudan kuu burudande doruwenoo? Dowan kii! Nub ongme korokbuwen kuu Yuudaniib Yuudanbaniib kuu ibmo ambarakmi ye dabderem aom doriib.
10 Kekane God Ye Weng aombed yedme wongkoon,
“Mim kane ma yorokmoyiibban, korem dowan kai.
11 Mim kane ma kaadkerindo,
mim kane God yaa ma onmokban.
12 Nimakarub korem kuu God yaa wengamberedandiwen,
yi korem kuu ambodiibban,
karub yena yaa ma awandokban,
korem dowan kai.”
13 “Yi weng dakmenabi kuu bobwum baeb areb,
yi ongbed birandimo kamimaib.”
“Yi weng mongkodkono mandakadbed dembimaan kuu niindok arud ambod areb.”
14 “Yi mongkodkono kuu amkidbi wengiib yewed kondi ye wengiib dembimaan.”
15 “Yi kuu kirodmo yena yenbandaiwe umkan kubudirimaan,
16 yi kuu monmare dabab darewoob kondimaib,
17 yewenubmo dobiri ye kiwaan kuu yi koron kii.”
18 “Yi kuu God yaa unimokban.” ande wongkoon.
19 Kedi, nub kuu nubkaad, Yuudan yi amobbed komo dakmoon kuu kane kane amob ye dabderem aom doriibdan yaa dakmoon. Kwamune keroon kumbed nimakarub yi windi kuu kebengkaneene okad yiridan korem kuu komande kwamune kamiwen ye id kuu God yaa korobe dakmenabaniib.
20 Amborom kuu mim kane kuu yembed Yuudan yi amob kongamki yaambed kuu Godbed ma ye kuu yorokmoman ande yedmaanban, kedi, amob yaambed nub ambarakmi korokbendaane wedmimaub kowe.
Yorokmo Keri Kuu Anam Andi Yaambed
21 Kumban yorokmo keri ye kiwaan Godbed ongmoon kuu kibikee korokboon. Kukuu Moses ye amob awini yaambedban, kumban keye kiwaan ye dowad Moses ye amob wengiib profesidaniibbed dakme korokbiwen.
22 Yorokmo keri ye kiwaan Godbed ongmoon kee, kane kane Yesu Keresu yaa anam andaniib kuu kuyaambed yi korem kandaniib. Nimakarub korem kuu yeka mamaamban, korem kuu ibmo keriwen,
23 amborom kuu nimakarub korem kuu ambarakmenib, God ye nambiri ari daane nandindeban kowe.
24 Kumban Yesu Keresumbed biddoon yaambed God ye mimyob dowaken kabamoonmo kondoon kumbed nimakarub kuu ben yorokmo keri ye kiwaan ari nongkobimaan.
25 Yesu ye umkan yaambed ye kuu ambarakmi are nonondandi yeman kuu Godbed dianmo korokboon. Kukuu anam andi yaambed kandi yeman. Godbed ke kwanoon kuu ye inamen yorokmo korokbi yeman, amborom kuu Yesu minindo yaron anukbed ambarakmiwen kuu ye kuu yodbirindo wedmendandoon, wengyunde dabab kondindo kowe.
26 Ke kwanoon kuu kibik keye aron kembed ye inamen yorokmo kuu kekane korokboon kowe, God kuu yorokmo doberemberene Yesu yaa anam andiwendan ben ambarakmi are yorokmo kerundoonman keroon.
27 Kwani keroonka, nub kuu komo yaambed kerengkanuub? Dowan! Keye dowad kuu komo? Nubbed Moses ye amob kuu awine kanduwenkowoo? Yii, nub anam anduwen kuned kii.
28 Kedi, nubbed kedmengkandimaub kuu, karub kane anam andaneen kuu Godbed yorokmo kerunaneen kumbedmo, Moses ye amob awine kandi yaambedban.
29 God kuu Yuudanmo yi Godoo? Ye kuu Yuudanban kangkon yi Godoo? Eyoka, Yuudanban kangkon yi God kuda,
30 amborom kuu God kuu mimo, ye kuu Yuudan kad wanabiwen yi anam andiwen kumbed yorokmo kerundene Yuudanban kad wanabindo yi kangkon yi ibmo anam andiwen kumbed yorokmo kerundi ye God kowe.
31 Kwani kowe, anam andi kee awine kanduwen kumbed Moses ye amob kuu idiibban keroon dee? Dowan kii! Kekwanimban kedi, keyiib kuu anam anduwendan nub kuu amob kuu awine kankoonuwen kii.