7
Israeldan 144,000iib
1 Kwanoone, wedmaane engyus kaningiib kuu okad kariyiib kiriyiib kangkayiib kaomiib korem yaa doriib. Yimbed nuub korem kaningiib kuu angkon awingkiwen, kwanubko nuub kuu okad yiri o karamok yaa o at awene yaa wuruwokban kerok andiwed.
2 Anuk yiri kuu engyus kaningiib keyaa okada karamoka monmari yaromkonoyiib kondoon. Kwane, engyu mamaa wedmaane ye kuu wad doreen ye God ye kumun kowi yemaniib awinoon kumbed aron yaro minimaun kangkambed yaro monoon. Kwane, yembed engyus kaningiib ke doriib keyaa naawonmo baande yedmoon,
3 “Okadiib karamokiib ayiib kuu monmaraibned, mokorondibko God ye demedan yaa ye kumuniib yi binad ari dengkuuwa.” andoon.
4 Kwanoone, wengambaraane Israeldan yi amyenimbon korem yaambed binad ari dengkoon kuu 144,000iib.
5 Yuda yamyenimbon 12,000iib kuu dengkenabendoon.
Ruben yamyenimbon 12,000iib kuu kangkon kwamune.
Ged yamyenimbon 12,000iib kuu kangkon kwamune.
6 Aser yamyenimbon 12,000iib kuu kangkon kwamune.
Naftalai yamyenimbon 12,000iib kuu kangkon kwamune.
Menase yamyenimbon 12,000iib kuu kangkon kwamune.
7 Simeon yamyenimbon 12,000iib kuu kangkon kwamune.
Livai yamyenimbon 12,000iib kuu kangkon kwamune.
Isekar yamyenimbon 12,000iib kuu kangkon kwamune.
8 Sebulun yamyenimbon 12,000iib kuu kangkon kwamune.
Yosef yamyenimbon 12,000iib kuu kangkon kwamune.
Benjamin yamyenimbon 12,000iib kuu kangkon kwamune.
Kadaareb Ebkad Kawanmo Inwariwen
9 Kwanoone, angkon wedmaane ne murubia arimbed kadaareb yemoon karub kanembed kimingke dandindeban wedmendaan. Yi kuu amyenimbon mimim korem yaambed weng mimim korem yaambed ambibkin mimim korem yaambed kad mimim korem yaambed Kingbed ye ooni ye dibirimbon ari dibeeniib Sibi Manayiib yi murubia ari dobiriwen. Yi kuu ebkad kawanmo deebiwen kumbed yuum biidiib awingkiwen.
10 Kwane, naawonmo baande yedmiwen,
“Nimakarub bobni yaa burudande bindi kuu
nub Godbed ye ooni ye dibirimbon ari dibeeniib
Sibi Manayiib kumbedmo yimin.” andiwen.
11 Engyus korem kuu King ye ooni ye dibirimbon yaayiib aamkono aamkono yaayiib dingkan kaning yaayiib kwane awanewandiwen. Kwane, King ye dibirimbon ye arinambo arimbed yi korem kuu yiri bumangkenib God yaningko kankoone
12 yedmiwen,
“Anam kwanok!
Aningko kankooniyiib nambiriyiib meeni kangdomiib eso andiyiib
aningko darewoob arimbed koniyiib yiminmo dobiriyiib aromkonoyiib
kuu nub God yaa kerok, aron korem korem.
Anam kwanok!” andiwen.
13 Kwaniiwe, aamkono mamaambed ne yaa kaamonoon, “Ebkad kawanmoyiib inwariwen kee kane awene, yi kuu kunayambed miniwen?” andoon.
14 Kwanandoone, nembed inandaan, “Aamkono, ebkaadee.” andaane yembed yedmoon, “Kekee yi kuu dabab miin arewa menebe yenbandoon aombed miniwen. Kwane, yi ebkad kuu Sibi Mana ye umkanbed oganabe kawanmo kerundoon.
15 Kwanikob,
yi kuu God ye ooni ye dibirimbon ye arinambo arimbed doberenib,
amnoomiib awingyawiib ye kurikuri boyambib darewoob aombed ye aningko kankoonembaraiwe,
King ye ooni ye dibirimbon ari dibeen kumbed yi yoom doberene yi yaa awande keendombirimaan.
16 Yi kuu angkon ika mungi bobnaibban,
angkon ika ok moom bobnaibban.
Aron nimin kuu yi yaa yaunban kere,
niminbed yaune bobnaibban.
17 Amborom kuu Sibi Mana king ye ooni ye dibirimbon ye wedangka doreen kumbed yi yaa sibi ooni ye karub areb kerundaneen kowe,
yembed wadkeri ye dem ok menebuun yaa be wananeen.
Kwane, Godbed yi indob yaa yi inok kuu korem aadmendaneen kii.” andoon.