2 Tesalonaika
Pol re Tesalonaika kwomri tatame remne yuri basrasem siglow.
Kiyi late tuma.
Gwor siglow Pol eter basrasem. Re Tesalonaika kwomke temenem God rene omuteke habobem tatame remne newopitim. Re siglow pes remne basrasem. Gwor eter remne yuri basrasem siglow.
Jisas re sene yate tuma, Tesalonaika kwomri God rene omuteke habobem tatame rem welepe be metmenem. Rane rem op habom. Jisas re sam, re sene wayen sin God reri kwomke yim. Yin temenem, re sene yam. Eker Pol re gwor siglow basrasen remne op wem. Jisas re God reri kwomke yim, re sene be yatene. Re be yamentek, nowselri tame rem nugwape yaper wos kiyi nente tetane.
Nowselri keryen yen yaper re tete. Re Jisas reri peiktame tete. Re tetek, Jisas re sene ek yate. Re yate, re nemne potte. Opkap, be wos be wos tete, kem Jisas rene omuteke som habobet. Kem yaku yenbo som nenbet. Kem yaku kap pwoyte. Kem agerbo tatame remne kwobo som labet. Pol re remne etop basrasem.
Haneyen reri yuri tete yabel.
1
(Sapta 1-2)
1 Nem Pol, Sailas, Timoti, nem kemne gwor siglowke basrasbo. Kem Tesalonaika kwomri God rene omuteke habobo tatame, kem neremri Apiy Godkene Haneyen Jisaskene etepri tatame.
2 Nem selbo, Apiy God, Haneyen Jisas Krais rep kemne pap meten kwobo late. Rep kemne pap pultete, kem pap yenbo temente.
Tesalonaikari God rene omuteke habobem tatame rem mus metbem, rem taskurbem.
3 Gesmase, kwokwos kwokwos nem God rene kemne wese abo. Nem op nenbo, et yenbo. Mapurke nem op nenbo? Kem omuteke habobo wule nugwape nenbo. Pap meten heyar nenbo wule kem awosein awosein nugwape nenbo. Opkap nem God rene wese abo.
4 God rene omuteke be habobo tatame rem kemne yaper nenbo, kem mus nugwape metbo. Op metbo, kem taskuren omuteke habobo wule heyar som sebo. Eker nem kemne gabon okbop tebo. Keremri nenbokap, nem God reri agerbo kwomke tetane tatame remne nem etop wesowbo.
God re nemne wule yenbok heyar se pete tetane.
5 Rem kemne yaper nenbo, kem mus meten kem taskuren Apiy God rene som habobo. Opkap, God re kemne lan op webo. Kem wule yenbo nenbo. Aren panen sitene kwom, Heven, kem etek yite tetane. Op webo. Opkap nem mettene, God re nowselri tatame remne heyar se pete.
6 God re wule yenbo gwop nente. Re kemne yaper nenbo tame remne yaper sein nente tetane.
7 Kem mus metbo tatame, God re wem, kem neremkene kwuye meten egesite tetane. Haneyen Jisas re yate, nem ege ek site. Re eterri kwomri kitimenakene tame etemkene Heven mesegenen yate tetane. Rem ker bukrewaikene yate.
8 God rene be habobo tatame remne re yaper sein nente tetane. Haneyen Jisas reri Tuma Yenbo be meten nenbo tatame remne re kirkir yaper sein nente tetane.
9 Rem tokwo yaper potte. Rem Haneyen rene genek tete, rem reri bitmi, reri kitimena bukre, reri tuw malebokap sene be late tetane, rem yaper somsom temente tetane.
10 Krais re yate yabelke rem yaper tete tetane. Er yabel reri tatame rem rene sig bukre wete tetane. Rene habobo tatame rem rene tuma yenbo wete tetane. Nemri wem tuma kem heyar meten omuteke habobo, eker kerem mere, kem etemkene temente tetane.
Rem God rene wemetbem. Re Tesalonaikari tatame remne kitimena newote.
11 Yuri tete wos nem habobo, eker kwokwos kwokwos nem nemri God rene gwor tuma wemetbo. Re kemne ten wule yenbo nente wemkap, re kemne kwobo late, kem er wule heyar sete, kem tatame yenbo ek tete. Kemri yenbo nente selbokap, kemri omuteke habobokap, re eterri kitimenak kemne kwobo late, kem ek kebese nenkeipte.
12 Opkap tete, keremke nemri Haneyen Jisas reri sig bukre tete. Eterke kemri sig bukre tete. Nemri Godkene Haneyen Jisas Kraiskene rep kemne pap meten kwobo late, er wos ek tete tetane.