Filipai
Pol re Filipai kwomri tatame remne basrasem siglow.
Kiyi late tuma.
Gwor siglow Pol re basrasem, re Filipai kwomke temenem Jisas rene habobo tatame remne newopitim. Kiyi Filipai kwom et Masedonia yokwo, Rom nowselke temenem. Er kwom som tetane, rem agerbo sig Kavala webo. Gwopte Kavala et Gris nowselke tetane.
Kiyi Pol re sip poten kersepkap ok kelaruke wum, Yurop yokwok yin re Filipaike yin God reri Tuma Yenbo etek wesowbem. (Aposel 16:8-40 etek late) Rane tatame rem reri tuma omuteke metem, rem Jisas rene habobo tatame tem. Yuri re agerbo kwomke yim, rem rene ake yaperke poten rasem. Etek temenem, re metem, rane tame rem Filipairi Jisas rene omuteke habobo tatame remne yikokon agerbo wule remne peikem. Eker re gwor siglow basrasen remne newopitim. Eter basrasem tuma re pap yaper be metem, re Haneyen Jisas rene metekwasen remne tuma basrasem.
Tewri Pol re Haneyen Jisas eterri yaku nenbem, re kel merinbem. Filipairi Jisas rene habobem tatame rem rene kel newopitim, re Haneyen eterri yaku welepe sene nenbem. Eker, Pol re gwor siglow basrasen remne wese am.
Re God Reri Tuma remne op basrasem. God re kemne bukre wos nenem. Krais eterke re kemri wule yaper poten septim. Krais eterke kem pow tem. Kem yaku wuri be nenem. Kem Jisas rene omuteke habom, etopwou nenem, kem pow ek tem. Kem Krais reri wule heyar sete. Eter nenbemkap kem etop nenbet. Kem kworer teitkwunen God reri yaku nenbet. Kem Krais eterkene temente, kem pap yenbo ten metekwaste. Pol re remne okbop ten etop basrasem.
1
1 An Pol, nes Timoti rekene nes Krais Jisas reri yaku nen tame. Kem Krais Jisas reri Filipai kwomke tetane tatame, kemri taresi tamekene yaku nen tamekene, nes kemne gwor siglow basrasbo.
2 Nemri Apiy God eter, nemri Haneyen Jisas Krais eter, rep kemne pap meten kwobo labet. Rep kemri pap pultebet, kem pap yenbo temente.
Pol re God rene wese am.
3 An kemne habobo wule an ari God rene wese abo.
4 An kemne aboyei habon God rene wemetbo, an metekwaskene rene wemetbo.
5 Gwopkap wule an metekwasbo. Kem God Reri Tuma omuteke meten yabelke, kem tobotan yin gwotepte mere, kem anne kwobo labo. Kem arenkene Krais reri Tuma Yenbo wesowbo yaku som kirkir nenbo.
6 An sanetene, God re kemne potbo yaku yenbo tobotan nenen yin yin Krais Jisas re sene yate yabelke re er yaku ek legete tetane.
7 Kem ari meseke mogulke tetane. An kemne etopkap habobo, et yenbo. God reri pap metbo wulek re anne yaku yenbo newon kem ari yaku nen tamesip tetane. Gwopte an ake yaperke tetane. Kiyi an kebese sewuren Krais eterri Tuma Yenbok ei wuran kwobo lan heyar wesowbem, an kemri kuwk teten yin kem anne kwobo som labo. An mak temenbo, kem anne kwobo som labo.
8 Krais Jisas eter re kemne metekwasen pap yewobokap, an kemne etopkap metekwasen tekatekabo. An kemne tuma sekene webo, God re etop sanetene.
9 An God rene op wemetbo. Kem pap yewobo wule som poten bukrewai tete. Er pap yewobo wule re purerekene ten kem wos yenbo wos yaper heyar se pete.
10 Opkap kem heyar habon wos yaper be nente, wos yenbowou nente. Op nenen yin yuri Krais re aboyei tatame remne se pete yabel tete, re kemne tuma be nente, re kemne tatame yenbo wete.
11 Jisas Krais re keremkene tetane, re kemne kwobo labo. Eker kem yenbo woswou nenbet. Op nente, tatame rem God rene pir wen reri sig yenbo wete tetane.
Pol re ake yaperke temenem, nugwape tatame rem Tuma Yenbo som metbem.
12 Ari gesmase, kem met. An ake yaperke tetane, God reri Tuma Yenbo wesowbo yaku et yike be keikeretene. Tatame rem God Reri Tuma som metbo.
13 An gwor ake yaperke tetane, opkap, Keryen Yen Sisar reri akek tetane ei nai tamekene agerbo gwotek tetane tatamekene rem aboyei rem op metem. An Krais reri yaku nen tame, eker rem anne ake yaperke poten rasem.
14 Etopwou bo. Nugwape gesmase rem mettene an gwotek tetane, eker rem be akbo. Rem Haneyen rene omutekewai habon mol pan tetebo, rem God Reri Tuma muresen wesowbo.
15 Etemri rane rem wuribai yaper tetane, rem ari sig yenbo teitkwunte selbo. Rem tuma naurate selbo, eker rem Krais reri tuma wesowbo. Rane rem wuribai yenbo tetane, rem wule yenbo sekene nente selbo, eker rem Krais reri tuma wesowbo.
16 Er tame rem sanetene, an Krais eterri Tuma Yenbo ei wurabo, eker rem anne pap yewon Krais reri Tuma Yenbo wesowbo.
17 Wuribai yaper tetane tame rem sig bukre potte habobo. Rem mettene, an ake yaperke tetane, eker rem anne wule yaper degerbokene nente habobo.
18 An be habobo! Tatame rem Krais reri tuma metbo, eker an okbop tebo. Metkereke wuribai tetane tame rem Krais reri tuma wesowbo, an okbop som tebo.
Pol re wem. An kelpe tementek, an Filipai remne kwobo labet.
19 An sanetene, kem God rene anne wemetbo, Jisas Krais reri Wow re anne kitimena newobo, eker God re anne kwobo lan an ake yaper mesegente. Opkap an okbop tebo.
20 Wos wuri an omuteke habon ari pap me tewo tewobo. God re anne webokap an yaper kap nente. Kwokwos kwokwos, gwotepte mere, an selbo, an mol pan teten reri yaku muresen nenbet. Opkap an le kelpe tete, o an sate, ari wuribaikene wesomkene Krais re sig bukre arennek potte.
21 An op habobo. An temente, an Krais eterke reri yaku som nente. An sate, an Krais eterke yin an somsom temente.
22 An le kelpe temente, an nugwape tatame remne kebese kwobo labet. An be kelowke yite? An be sanetene.
23 Kelow pes tetane. Aren an selbo, an sate, an Krais rekene yin temente. Et yenbosubuwai.
24 An kemne kirkir habobo, opkap an kelpe temente, an kemne kebese kwobo late.
25 An gwor omuteke habobo. An keremkene som temente. Opkap an kemne kwobo late, kem omuteke habobo wule heyar sen okbop tete. An etop habobo.
26 Ekeya, an kemne sene lasyate. An keremkene temente, kem anne okbop ten boteyatete. Kem Krais Jisas reri sig bukre wete.
Filipai tatame rem mus meten taskuren rem God rene habobo tatame sespe tem.
27 Bukre wos wuri tetane. Krais reri Tuma Yenbo kemne nente webokap, kem etopwou nenbet. Op nenbet, an kemne lasyate o, an be yate, an tumawou mette, an op mette. Kem muresen teten wuribai wuriwou ten kem yaku kirkir nenbo. Kem agerbo tatame remri wuribai lisokobo, rem Krais reri Tuma Yenbo omuteke kirkir metbo. An etop mette, selbo.
28 Kem peiktame remne kap akte. Kwokwos kwokwos kem mol pan tetete. Opkap kemri peiktame rem etop lan sanete, God re kemne kwobo labo, eker rem kemne mapurke teitkwunte. Kerem kem remne kebese teitkwunte. Rem etop sanete.
29 God re kemne yenbo wos nenem. Re kemne lebam, kem Krais reri yaku nenbo. Kem rene omuteke habobo, eker kem reri sigke mus kirkir metbo.
30 Kiyi kem lam, an peiktame remkene naibem. Gwopte kem metbo, an remkene som naibo. Kem anne ei wurate, nem remkene kirkir naite.