18
(Mt. 26:47-56; Mr. 14:43-50; Lc. 22:47-53)
1 Chi gulull gunii Jesús de diidxré, ax zénegacny de xpɨnny par dets gueeu ni lá Cedrón. Ruy zub zieny de yag oliv ax biunény laadeb láani de yagqui.
2 Ne Judas ni baany entriagu laany, nánbɨ ruy, te pur zienzi güelt guzuguané Jesús de xpɨnny ruy.
3 Ax ruy bdzɨnné Judas tuby cuaa de suldad, cun tuby cuaa de ni rcualo yudoroo xte Jerusalén. Iratedeb ná ni bxiaald de bxoz ni rnabee ne de fariseu. Parzi ax ni caa spad ni caa lans ne ziyza güenédeb de linternɨ ne iraloteru de bal.
4 Per cun Jesús nánnacny xa teedny ax bdiiany rut zuguaany chiy gunabdiidxny laadeb:
—¿Tú rguíilytɨ?
5 Laadeb cuaibdeb:
—Dunnɨ rdíilynɨ Jesús de Nazaret.
Chiy raipy Jesús laadeb:
—Nareniy.
Ne néza Judas ni baany entriagu laany, nuuch glay de bɨnqui.
6 Deni gunii Jesús: “Nareniy”, chiy biaxandeb ne axt biabdeb lo yiu.
7 Chiy gubíi gunabdiidx Jesús laadeb:
—¿Tú rguíilytɨ?
Laadeb gubíi cuaibdeb:
—Dunnɨ rdíilynɨ Jesús de Nazaret.
8 Chiyru raipy Jesús laadeb:
—Aguniia laat dec nareniy. Ne belati nare rguíilytɨ, gulsaan su zé de bnietré.
9 Ziy guc par guzub de xtiidx Jesús chi guniiny: “Nic tuby de ni bnɨɨdxbiu nare quɨt ninitti.”
10 Chiy Simóny Bed guléeb spad ni caab ax btiiub diag naldí ni lá Malco, ni ná xmos bxoz ni rnabee de bxoz.
11 Per Jesús raipny Bed:
—Guluchuu spadquɨ xlatni. Belati Xtadnɨ Dios agunii teda guelziic, sdedani.
(Mt. 26:57-58; Mr. 14:53-54; Lc. 22:54)
12 Chiyru de suldadqui, cun xcomandantdeb ne cun de ni rcualo yudoroo xte Jerusalén gunaazdeb Jesús ax bldiibdebny.
13 Chiy nidoote güenédebny liz Anás ni rac xtadsuegrɨ Caifás ni ná bxozroo lo izqui.
14 Ne lagac Caifásreniy raipy de bɨny Israel dec güenru su gaty tubyzi bniety pur ira bniety Israel, xlat ni gaty iradeb.
(Mt. 26:69-70; Mr. 14:66-68; Lc. 22:55-57)
15 Simóny Bed cun stuby xpɨny Jesús güenalddebny. Per stuby xpɨnnyqui rumbee bxoz ni rnabeequi laab parzi ax biunétecbɨ Jesús.
16 Per Bed ruu puertisy biianbɨ. Chiyru bdiia xpɨny Jesús ni rumbee bxoz ni rnabeequi, ax guninéb ni cacualo ruu puertqui par biiu Bed.
17 Chiy gunaa ni cacualo ruu puertqui raipbɨ Bed:
—¿Nédxa liú noo tuby xpɨny Jesús?
Bed cuaibbɨ:
—Ɨng, gatllɨ xpɨntib naa.
18 Ne cun nald chiy, ax de mos ne de ni rcualo yudoroo xte Jerusalén baandeb bal par cadxáadeb. Ax néza Bed guzuguanédeb ruu balqui.
(Mt. 26:59-66; Mr. 14:55-64; Lc. 22:66-71)
19 Chiyru bxoz ni rnabeequi guzulo rnabdiidxbɨ Jesús pur de xpɨnny ne pur ni rseedny.
20 Chiy raipy Jesús laab:
—Nez lo ira bniety aguniia ni ná par iniia. Te pur púrpac láani de yudoo bseeda de bniety ne néza láani yudoroo xte Jerusalén rut rdxasaa ira bniety Israel. Ax xíteete xgaatsti gady iniitia.
21 Pur ningui, ¿xínii rnabdiidxbiu nare? Gunabdiidxbiu de ni abindiag ni guniia, laadeb nándeb xi bseedadeb.
22 Deni gunii Jesús ziy, tuby de ni rcualo yudoroo xte Jerusalén, gudapbɨ ruu Jesús raipbɨ laany:
—¿Ta zeec rcaby bniety lo bxozroo?
23 Jesús cuaibny:
—Belati nuu xi mal diidx guniia, gunii xi diidx malqui. Per bel güenquɨ guniia, ¿xínii rgapu ruua?
24 Chiy zectisy ni liibyny bxiaald Anásny lo Caifás ni ná bxozroo lo izqui.
(Mt. 26:71-75; Mr. 14:69-72; Lc. 22:58-62)
25 Per Bed zeczi cadxáab ruu balqui ax raipdeb laab:
—¿Nédxa liú noo xpɨny Jesús?
Bed cuaibbɨ:
—Ɨng, gatllɨ xpɨntib naa.
26 Chiyru tuby xmos bxozrooqui, ni rac xfamilni ni btiiu Bed diagni raipbɨ Bed:
—¿Ta gati gunáa liú cun laab láani de yag olivqui?
27 Bed gubíi guniib dec quɨt rumbeetibny. Hóracqui bcuarsee tuby bɨdygay.
(Mt. 27:1-2, 11-14; Mr. 15:1-5; Lc. 23:1-5)
28 Chi bieeny, chiyru bdianédeb Jesús liz Caifás par güenédebny ruu palacy xte gobernador. Per de bniety Israelqui quɨt níiutideb láani palacyqui te pur par laadeb bel níiudeb aquɨt naniatideb nez lo Dios, ax aquɨt nialeeti niquiindeb cen xte pascu.
29 Pur ningui, bdiia Pilat par guninéb laadeb raipbɨ laadeb:
—¿Xi baany bnietquɨ ningui zednétbɨ ruré?
30 Laadeb cuaibdeb:
—Belrulati niacbɨ tuby bɨnzaac quɨt niopnétinbɨ nez lobiu.
31 Chiy raipy Pilat laadeb:
—Gulchanéb, ax gulgaany guelgurtisy zec ni ná ley xtentɨ.
Laadeb cuaibdeb:
—Per dunnɨ quɨt rdxaptin guelrnabee par inabeen gaty bniety.
32 Ziy xquel guzub xtiidx Jesús chi gudixteeny xa xquel gatyny.
33 Pilat gubíi biiub láani palacy, gurɨdxbɨ Jesús ax gunabdiidxbɨny:
—¿Ta liúy Rey xte de bniety Israel?
34 Jesús cuaibny:
—¿Ta pur laacpacbiu runbiu guelrnabdiidxquɨ nare, o nuu de ni gunii ziy laabiu pur naa?
35 Chiy raipy Pilat laany:
—¿Tatix bɨny Israel nare dxa? Lagacquɨ de bɨnladxu ne de bxoz ni rnabee de bxoz bedné liú. ¿Xill baaniu?
36 Jesús ax cuaibny:
—Guelrnabee ni napa gati lo guɨchliutiré záni. Te pur belrulati lo guɨchliuré záni, ax napa de ni nidildy par quɨt niaba laznaa de ni rnabee lo de bniety Israel. Per ziy gati lo guɨchliutiré zá guelrnabee xtena.
37 Chiyru raipy Pilat laany:
—Zelo xtiidxu dec reyquɨpaclesa liú dxa.
Jesús cuaibny:
—Reyla nare, zecquɨ ni aguniibiu. Par ziy gula ax belda lo guɨchliu par zedniia ni ná didxldí. Ne irate de ni zenuu didxldí, rcuadiagdeb ni rniia.
38 Chiy raipy Pilat laany:
—¿Xílezaquɨy didxldí?
(Mt. 27:15-31; Mr. 15:6-20; Lc. 23:13-25)
Chi gulull gunii Pilat ziy, bdiiagacbɨ par gubíi güeninéb de bniety Israel, raipbɨ laadeb:
—Xíteete xfalti bnietré quɨt rdxialtia.
39 Per laat naptɨ costumbrɨ dec nare rldaa tuby pres lo laní xte pascu. Anre, ¿la rcaaztɨ ildaa ni ná Rey xte Israel?
40 Chiy gurɨxtia irate de bniety Israelqui:
—¡Laab quɨt ildátibiu! ¡Güenru bldábiu Barrabás!
Ne Barrabásqui tuby gubaaniy.