Nu gwate ka apóstol ge Jesús‑ni
1
Jesús‑ni bodha'ane tisa idhelhe Espíritu ge Tata Do Yebáha
1 Lo yetsi nu sisi'a tte benia ttuha xa tata Teófilo, lo nuha utixxi'aya ge iyá tte nu udulo Jesús‑ni benie lhe iyá tte nu bele'enie ka benne lhe
2 axtaliba tti chi bisia sá beyapie deyye yebáha. Attili lani eyapie eyye, la'aniali chi bixúnie Espíritu ge Tata Do Yebáha kini bodha'ane bixa anka nu uin ka apóstoal, delába ka benne chi bekweeha.
3 Len ka apóstoal‑gaba nuha bele'e lo Jesús‑ni ixe lidú iki de tti chi uttieha. Aníha benie kini bela'a deki gwalí reki benbe. Delo chua (40) ubisaha bele'e lobie lenke lhe utixxi'agabanie ke gasina ki akake benne innabia Tata Do Yebáha ke.
4 Attili sa doe len ka benneha chi utixxi'e rabie ke:
―Labí eriaxxile lhe'esi Jerusalén‑ni. Kwedabale axtaliba ganna chi udhelha Tataha benne chi rabie deki idhelheha. Neti chiba utixxi'ania le ge benne idhelheha.
5 Gwalí galá Juan‑ni suna len indaruba begadie ka benne; ttaka lebi'i nna chi tte dabigana ugadi Tata Do Yebáha le Espíritu geeha.
Jesús‑ni beyapie deyye yebáha
6 Ka benne tupa niha unnaba tisake Jesús‑ni, ráke bie:
―Tata Xisi to, ¿si nnanna chi uinlu kini ri'i ka benne Israel edulori'i innabiari'i attu libe?
7 Labie nna bekabie geke ree:
―Lebi'i labí elha ralhale unale bí sá lhe bí ura aka nuní, kumu sunruba Tataha chi ga'ananie nukaxa aka nuní.
8 Ttaka ganna chi bisia Espíritu ge Tata Do Yebáha latile, la'ania nna inná tsitsi lele. Nianna tti iriale tsiale kixxi'ale kia lhe'esi Jerusalén‑ni lhe lhe'e adíru ka yiesi se'e itúba daka Judea‑ni lhe daka Samaria‑ni lhe. Axtaba ata riluxa yiesi lo yu‑ni tsiale kixxi'ale kia.
9 Iki de chi rabie iyá nuha, nianna tti beyapie deyye yebáha. Lake nna rulannibake se'eke. Nianna tti bebe ttu bea, bebena ata deyyeha nna lanúrue bilákanie.
10 Sa se'elake rugíake deyya Jesús‑ni gwetsáha, nianna ttiruba chi uka xxe chupa ka benne biyú ata se'ekeha, nukuke ka xo sitsi.
11 Nianna tti ra ka benneha ke:
―Lebi'i benne ge Galilea, ¿beaka se'ele gwelanni gwetsáha? Ki yule la kwinaba Jesús benne ugwekie lagwi gele nna beyapie deyye yebáha, la benneha‑gaba nuha esiabie attu sá. Ttiba bilenle beyapie deyye, aníha‑gaba esiabie.
Ka apóstoal bodúke Matías‑ni kini uinna sina nu ga'anna uin Judas‑ni
12 Nianna beyadi tteba ka apóstol ge Jesús‑ni iki I'iya Ata Daa Ka Ya Olivuha nna deyyake besinke lhe'esi Jerusalén‑ni. Jerusalén‑ni rena gaxxaba niha. Laxkala lattiba bedáke. Raxxíbana nu bedábakeha attiba chi ga'anna dháke lhe'e ka sá atti reyaka leke.
13 Tti besinke lhe'esiha, nianna beyapike lhe'e yo'o do gwetsá ata reya'an Pedruha lhe Juan‑ni lhe Jacobuha lhe Andrés‑ni lhe anágaba Felipe‑ni lhe Tomás‑ni lhe Bartolomé‑ni lhe Mateo‑ni lhe, anágaba Jacobo xi'in Alfeo‑ni lhe Simón, benne rágabakana Zelote lhe anágaba Judas xi'in benne tegaba lábie Jacobo.
14 Iyábake labí rudú siike, turo'oba rilhapike tisa rulisake Tata Do Yebáha, itupa lenke adíru ka benne nuilaha lhe anágaba María nan ge Jesús‑ni lhe ka betsieha lhe.
15 Ttu sá tupa ttiba ttu gayua galhia (120) ka betsi to geri'i, delába ka benne chi ria leke ge Jesús‑ni. Nianna tti udú lii Pedruha lagwi geke nna rabie ke:
16 ―Xa betsi to, teeba ki gwado tisa ge nu unne Espíritu ge Tata Do Yebáha lo ka yetsi geeha, tti bixúnie David‑ni kini unnena ge nu uni Judas‑ni, delába Judas nu uchena ka nu bedaxxukana Jesús‑ni.
17 Kumu lana ukana benne biselana ri'i. De nuha nna selagabana uinna sina nu chi ga'anna uinri'i.
18 ’Ttaka Judas‑ni len belhiu uxína ge nu satsa bennaha, len nuha uyo'ona ttu lo yu ata ugíana úda ikini lo yu nna bisú lhe'eni, nianna tti ure tinni ka tu'eniha.
19 Iyába ka nu lhe'esi Jerusalén‑ni binakana ge nu ukaha. Nianna utixxakana lá yu ata uttinaha Acéldama. Len tisa gekani dienna innána: Yu Ata Bilali Reni.
20 ’Ge Judas‑ni nuha rinne lo ka Salmo‑na ata dia ra:
Lhe'e lisiniha sii siibaniba eyaka;
lanú benne tse'e lhe'e nuha.
Lhe rágaba lo ka Salmo‑na:
Attu benne subila odaxxue sina geniha.
21-22 De nuha nna raka doelha odúri'i attu benne subi kini odaxxue ladi Judas‑ni, kini tsekie lenri'i kixxi'ari'i deki beyaka benba Jesús‑ni lo elhuttiha. Odúri'i ttu ka benne betenalhake ri'i itúba tti ugweki Jesús benne anke Xxanari'iha lenri'i, desdeba tti begadi Juan‑nie inda nna axtaliba tti beyapie deyye yebáha.
23 Nianna tti bekwekana chupa ka benneha: bekwekana José benne tegaba lábie Barsabás, benne rágabakana Justo. Bekwegabakana attu benne tee lábie Matías.
24 Nianna tti ulhapikana tisa len Tata Do Yebáha, rákane:
―Tata Xisi to, luba yulu ttixa anka lhe'e lasto ttu ttutu. Nnanna rinnabatu len kwinalu, delo chupa ka benne biyú se'e nii, ule'elu nú ka benne‑ni chi bekwelu
25 kini akake apóstol kixxi'ake ka tisa ge Jesús‑ni, uinke sina nu ralha Judas‑ni uinna. Kumu lana, de benna tulhaha, de nuha nna bennittiba sina geni. Laxkala diabana ataba ralhana tsiana.
26 Nianna tti bedelhake suerti kini ula'ana nuxa ka benneha saxxína. Nianna gwaxxíbana Matías‑ni. Laxkala la'ania tteba bisela Matías‑ni len ka benne sinea (11) anka apóstoal.