8
1 Saulo‑ni nna uyu'uba leni bettikana Esteban‑ni.
Ka benne chi ria leke ge Jesús‑ni ridú nookana ke
La sá tti bettikana Esteban‑ni, la'ania udulokana berio lákana ka benne chi ria leke ge Jesús‑ni se'eke lhe'esi Jerusalén‑ni. Ttu elha disa xxeni nuha uka la'ania. Iyábake ugwadhike diake itúba daka Judea‑ni lhe daka Samaria‑ni lhe. A sunruba ka apóstol ge Jesús‑ni beya'an lhe'esi Jerusalén‑ni, labí biriake.
2 La'ania ttu chupa ka benne biyú, ka benne gwa rudo tsitsiruke tisa ge Tata Do Yebáha, ka benneha gwalhidhake Esteban‑ni nna uresi xxattake geni tti gwakatsike naha.
3 Sauloha nna danalhabana ruinna utse'e loona ka benne chi ria leke ge Jesús‑ni. Kua suba ra'ana lhe'e ka yo'o, kini rache na'ayana ka benne nuila lhe ka benne biyú lhe, nianna tti radheana ke lisiyya.
Felipe‑ni rigixxi'ana ge Jesús‑ni daka Samaria
4 Ttaka ka benne biriake lhe'esi Jerusalén‑ni, delába ka benne ugwadhiha, ka benneha ataba diake rigixxi'ake ka tisa ge Jesús‑ni.
5 Felipe‑ni nna diana bisinna lhe'e ttu ka yiesi xeni ge Samaria‑ni. Niha udulona rigixxi'enna ka benne se'e niha ge Cristuha.
6 Ka benneha nna, tti riyienkanie nu ra Felipe‑ni lhe tti rilákanie ka milagru ka nu rebaninri'i geni ruinnaha, nianna iyábake ritupake rudo tsitsiba nagake ge nu rigixxi'anaha.
7 Ixeba ka benne yu'u espíritu satsa latike, gwa reyakabake nna ka espíritu satsaha nna ribesi'abakana tti reriakana latike. Anágaba nna ixegaba ka benne daa yatti latike lhe ka benne ridá natsa lhe gwa reyakagabake.
8 Laxkala ttu elha gwedeaka lasi xxeni nuha uka lhe'esi Samaria‑ni la'ania.
9 Ttaka lhe'esiha‑gaba do ttu nubiyú tee láni Simón. Ttuha‑li chi ruin nuha ge elha gwesá nna gwa udaabana uxí yiena ka benne ge Samaria‑ni, kini ugía leke geni. Ruinna deki ankana ttu nu ra xxeni leni.
10 Gebani rudo naga iyá xeabake, ka benne elha lhe ka binto lhe, nianna ráke:
―Benne‑ni nuní rape nu xxeni ra le Tata Do Yebáha.
11 Rudo tsitsiba nagake geni kumu isába chi ridí yiena ke kini ria leke ge ka elha gwesá ruinnaha.
12 Ttaka tti biyienkanie rigixxi'a Felipe‑ni gasina akake benne innabia Tata Do Yebáha ke lhe rigixxi'agabana ge Jesucristuha lhe, la'ania nuila lhe nubiyú ka benneha ugía leke geni, nianna tti udike inda.
13 Iyágaba Simón‑ni ugía leni ge nu ra Felipe‑ni nna udigabana inda. Iki de tti chi udina indaha nna udulona gwanalhana benneha. Ataba diabie diana nna rugía ya'abana tti rilenna ka milagru lhe adíru ka nu rebaninri'i geni ruin benneha lhe.
14 Tti bina ka apóstol se'e Jerusalén‑ni deki chi bedaxxu ka benne ge Samaria‑ni tisa ge Tata Do Yebáha, nianna udhelhake Pedruha lhe Juan‑ni lhe kini ugíakana niha.
15 Tti bisinkana Samaria‑ni nna udulo ttebakana unnabakana len Tata Do Yebáha kini benneha nna utebie Espíritu geeha len ka benne chi ria leke gebie se'e Samaria‑ni,
16 kumu ni ttú ka benneha labí chi bisia Espírituha tsu'e latike. Sunruba lá Jesús benne anke Xxanari'iha, sunruba lá benneha bedettike tti udi ka benneha inda.
17 Niala nna tti uxxua ná Pedruha lhe Juan‑ni iki ka benneha kini uxíke Espíritu ge Tata Do Yebáha.
18 Tti bilani Simón‑ni rixxua ná ka apóstoal iki ka benneha, la'ania nuha ridíke Espíritu ge Tata Do Yebáha, nianna tti betesana belhiu len ka benneha,
19 nna rana ke:
―Anágaba neti gwalutegaba nu tsitsi ra lele‑na len neti kini ganna chi ixxua náya iki nuxaba benne, la'ania nna dhígaba benneha Espíritu ge Tata Do Yebáha.
20 Pedruha nna bekabina geni, rana na:
―¡Nu reha ugía len belhiu gelu‑na kumu lu rakinlu deki ukare'aba len belhiu nna chiba go'olu elha tse nu rute Tata Do Yebáha!
21 Lu labí elha ralhalu uinlu luesi sina ruintu‑ni kumu labí du itá lelu arlo Tata Do Yebáha.
22 De nuha nna bodúna lu ge nu satsa belaba lelu‑na nna unnaba len Tata Xisiha kini ni kina gaa gwadíbe elha xen lasi gelu de belaba lelu aná,
23 kumu neti rite dati lu yalhá ritisinlu nna labí raka lelu udhanlu nu satsa ruinlu‑na, kumu attisidiba xigabalu lo nuná.
24 Simón‑ni nna bekabina rana:
―¿Si bi gwa innále gwalinnabachi kia len Tata Xisiha kini abittu satea, ni ttú ka nu chi rale satea‑ni?
25 Pedruha lhe Juan‑ni lhe, iki de chi utixxi'ake lhe bele'eke ka tisa ge Tata Xisiha, nianna tti beyekike deyyake lhe'esi Jerusalén‑ni nna laka deyu'uke neda deyyakeha nna reteke lhe'e ixe ka yiesi to ge Samaria‑ni rigixxi'akanie ka benneha ge Jesús‑ni.
Felipe‑ni rigixxi'enna ttu nubiyú ge Etiopía ka tisa ge Tata Do Yebáha
26 Iki de nuha nna tti bodole'e lo ttu anjeli ge Tata Xisiha, rabie Felipe‑ni:
―Bedú tse nna ugía daka rreha, daka lo neda nu radi Jerusalén‑ni nna risinna lhe'esi Gaza, delába lo neda nu rite lo yu bisiha.
27 Felipe‑ni nna udá ttebana diana. Lo nedaha beti'ana ttu nubiyú ge Etiopía. Nuha ankana ttu nu tee ttu ladi xxeni geni, lana ridona gaxxaba kwe'e Candace, delába nuila nu rinnabiana ka nu Etiopía‑ni. Nubiyúha ankana nu denna belhiu ge yiesiha. Nuha dedána ugíana Jerusalén‑ni gwadú xibini arlo Tata Do Yebáha.
28 Deyu'ubana neda dedona lo carreta geniha nna rulabana lo ka yetsi ben Isaías benne uke profeta ge Tata Do Yebáha.
29 Nianna tti ra Espíritu ge Tata Do Yebáha Felipe‑ni:
―Ugía nna ubiga kwe'e carreta deyya naa.
30 Tti chi bisin Felipe‑ni gaxxa kwe'e carretaha, nianna biyieninna rulaba nubiyúha lo ka yetsi ben profeta Isaías‑ni. Nianna tti rana nubiyúha:
―¿Si gwa rite denlu nu rulabalu‑na?
31 Nubiyúha nna bekabina, rana:
―¿Bi rite dati nuní kumu lanú tee kixxi'enna neti bixa nuní ra lo yetsi‑ni?
Aníoka nna unnaba nubiyúha len Felipe‑ni kini tsapina lo carretaha nna dhona gaxxa kwe'eni.
32 Lo ka yetsi ge Tata Do Yebáha ata rulaba nubiyúha, niha dia ra:
Ttiba ttu neru, aníha‑ba chekana benneha die ata gattieha
lhe ttiba ttu neru re'eni to, siiba ridúna arlo ka nu richúkana xoniha,
aníha‑ba ben benneha, niruba ttu tisa a unnebie.
33 Tti lo ruyúe elha disaha, nurula bedíne;
bettibakane yiesi lo yu‑ni.
De nuha nna lanú nu aka geni kixxi'ana ge ka benne datiake benneha.
34 Nubiyú Etiopía‑ni nna unnaba tisana Felipe‑ni, rana na:
―Utixxi'entu neti, ¿nú ge nuní rinne profetaha tti rana aní? ¿Si la gebani nuní rigixxi'ana ak? ¿Ge attu benne subiba nuní rigixxi'ana ak?
35 Felipe‑ni nna udulona lo yetsi ata rulaba nubiyúha nna udulona rigixxi'enna na ge Jesús‑ni.
36 Laka deyu'ukana neda deyyakanaha, nianna tti betekana ata sia ttu inda nna ra nu Etiopía‑ni Felipe‑ni:
―Ne inda sia naa. ¿Si nuxa usuna ganna neti gadia inda?
37 [Felipe‑ni nna rana na:
―Ganna si lu itú iki itú lelu ria lelu, gwaka galá.
Nubiyúha nna bekabina rana:
―Ila, gwa riaba lasia deki Jesucristuha anke Xi'in Tata Do Yebáha.]
38 Nianna tti ben nubiyúha mandadu kini bekwedakana carreta geniha, nianna tti diakana ugwadi ixpabakana lhe'e indaha. Niha begadi Felipe‑ni nubiyúha inda.
39 Tti chi beriakana lhe'e indaha nna Espíritu ge Tata Do Yebáha beyalhi ttebe Felipe‑ni dechebie na attu ata subi. Nurua na bilani nu Etiopía‑ni. Ttaka nu Etiopía‑ni nna itta suba chi du leni deyyana.
40 Felipe‑ni nna lhe'esi Azoto‑niliba bedeaka xxena nna lhe'e iyába ka yiesi se'e niha ritena rigixxi'ana ge Jesús‑ni, axtaliba bisinna lhe'esi Cesarea.