12
Ixe looba elha tse rute Espíritu ge Tata Do Yebáha lenri'i
1 Betsi to, nnanna raka lasia unale gasina anka ka elha tse rute Espíritu ge Tata Do Yebáha len ttu tturi'i.
2 Lebi'i gwa yúbale atti labí chi ria lele ge Jesús‑ni, gwanalha lo xuabale ka nu labí gwalíga ankakana diosi. Ka nuná biríaba anka ka nuná.
3 De nuha nna nnanna kixxi'ania le kini unale deki niru ttú benne labí aka kebie iki Jesús‑ni ganna chi yu'u Espíritu ge Tata Do Yebáha latie. Lhe anágaba lanú ttu benne do innábie deki Jesús‑ni anke Xxane ganna abíba chi yu'u Espíritu ge Tata Do Yebáha latie.
4 Ixe looba ka elha tse se'e, ttaka ttúba Espíritu ge Tata Do Yebáha rutebie ka elha tseha lenri'i.
5 Lhe ixe loogaba sina ge Tata Do Yebáha tee uinri'i, ttaka ttúba benneha anke Xxanari'i.
6 Anágaba ixe looba nu ruinri'i, ttaka ttúba Tata Do Yebáha raka lenie iyári'i kini raka geri'i ruinri'i nuha.
7 Kua ttu tturi'i rute Espírituha elha tse geri'i kini elha tseha ixuinri'i na len adí ka benne.
8 Kumu ttibanka len ttu benne rute Espírituha elha tse gebie kini rinnebie tisa nu rutena elha rieni ge ka benne,
attue nna la Espírituha‑gaba rutebie elha tse gebie kini rigixxi'anie ka benne ge nu rite danieha.
9 Attue nna la Espírituha‑gaba runi kini ruxxen tsitsi lebie ge Tata Do Yebáha;
attue nna la Espírituha‑gaba rutebie elha tse gebie kini reyonie ka benne rani.
10 Len adíke nna rute Espírituha elha tse geke kini ruinke ka milagru,
adíke nna rute Espírituha elha tse geke kini raka geke rigixxi'ake nu raka le Tata Do Yebáha una ka benne,
adíke nna la Espírituha‑gaba runi kini rite dákanie bí espíritu yu'u lati ka benne,
nna len adí ka benne nna rute Espírituha elha tse geke kini raka geke rinneke ka tisa subi ka nu labí rite dani ka benne;
adíke nna raka geke rigixxi'ake bixa diani ka tisa subiha.
11 Iyá nuní runi ttúba benne, delába Espíritu ge Tata Do Yebáha. Benneha nuha rigidhie elha tse len ttu ttu ka benne attiba rakaba lebie.
Ka benne ria leke Cristuha, meskiba ixeke raka, ttaka ttúba benne anka iyáke
12 Attiba latiri'i‑ni, meskiba ttúba ankana, ttaka ixe looba ka nu rapana, nna iyába ka nu rapanaha, meskiba raka ixekana, ttúba benne reyaka iyákana. Anágaba ka benne babake len Cristuha, meskiba ixeke raka, ttaka ttúba benne reyaka iyáke.
13 Kumu ri'i, sila ankari'i benne Israel o abittu, lhe sila ankari'i benne to'ori'i lo xxanari'i o sila reki lhaari'i lhe, iyábari'i ttúba Espíritu begadi Tata Do Yebáha ri'i kini bisinri'i ukari'i ttúba benne lhe ge ttúgaba Espírituha redí baari'i lhe.
14 Kumu latiri'i‑ni labí ttu looru anka nuní, ixeba nu rapana.
15 Laxkala ganna ni'aya‑ni gana xubenáya‑ni: “Neti de labí ankaa xubená, de nuha nna labí ankaa ge lati benne rape ri'i”, labí de innána aníha nna abitturu ankana ge lati benne rape naha.
16 Lhe ganna nagaa‑ni gana ka iyya loa‑ni: “Neti de labí ankaa iyya lo, de nuha nna labí ankaa ge lati benne rape ri'i”, labí de innána aníha nna abitturu ankana ge lati benne rape naha.
17 Ganna ttixka itúba latiri'i‑ni akana iyya lori'i, la'ania nna, ¿galasina iyieninri'i ganna ttixka? Lhe ganna itúba latiri'i‑ni akana nagari'i, la'ania nna, ¿galasina urenri'i len xinri'i ganna ttixka?
18 Ttaka Tata Do Yebáha kua ttu ttu ka nu sia latiri'i‑ni besiabe kana ataba ukaba lebie kwiakana.
19 Ganna ttu looba anka iyákana, ganna ttixka aníha nna abígaba latiri'i tee ganna ttixka.
20 Gwalí galá ixeba nu rapari'i, ttaka latiri'i‑ni ttu túbiba nuní raka.
21 Iyya lori'i‑ni labí aka gana ka nári'i‑ni: “Labí ixúti le.” Nigaba ikiri'i‑ni labí aka gana ka ni'ari'i‑ni: “Labí ixúti le.”
22 Gwanka ganna, ka nu sia latiri'i‑ni, ka nu rakinri'i deki labí tte rixuinri'i kana, ka nuníla ka nu rixúruinri'i
23 nna ka nu sia latiri'i‑ni, ka nu labí tte rugweri'i lidhakakani, ka nuníla ka nu ruyú tsitsiruri'i nna ka nu labí dika iláni ka benne, ka nuníla ka nu ruguku tseruri'i,
24 ttaka adí ka nu sia latiri'i‑ni, ka nuní labí riyasa uyú tsitsiri'i kana. Kumu Tata Do Yebáha anába chi benie latiri'i, ruyú tserue ka nu rakinri'i labí tte dakakana.
25 Aníha kini abittu lha'a lhe'e luesi ka nu sia latiri'i‑ni, sinuki uyú tsitsirula luesikani.
26 Ganna ttu ka nuní bixa satekana, la'ania nna iyágabakana uyúkana elha disa, lhe ganna ttu ka nuní ugweri'i lidhakakani, la'ania nna iyágabakana edú itta lekani.
27 Lebi'i nuná ankale lati Cristuha nna kua ttu ttule ankale benne chi babale latie.
28 Arlo iyále ka benne ria lele Cristuha chi bose'e Tata Do Yebáha ka benne kini uinke sina gebie.
Lade'a tte bose'ebie ka benne ankake apóstol.
Berupa nna bose'ebie ka benne ankake profeta.
Beyonna nna bose'ebie ka benne ki ule'ekanie adí ka benne.
Iki de nuha nna bose'ebie ka benne uinke ka milagru.
Delola nna danalha ka benne betebie elha tse geke kini eyoinke ka benne rani.
Nianna tti daa ka benne betebie elha tse geke ki ute náke len adí ka benne.
Nianna dedhá ka benne bete Tata Do Yebáha elha tse geke kini rixú liikanie rise'eke arlo adí ka benne chi ria leke Cristuha.
Iki deliba nuha nna tti daa ka benne raka geke rinneke ka tisa subi ka tisa ka nu labí rite dani adí ka benne.
29 Nianna laa innágari'i iyále ankale apóstol,
lhe laa iyágale ankale profeta lhe.
Anágaba laa iyágale raka gele rule'enle ka benne,
lhe laa iyágale raka gele ruinle ka milagru lhe.
30 Anágaba laa iyágale reyoinle ka benne rani,
lhe laa iyágale rinnele ka tisa subi ka nu labí rite dani ka benne.
Anágaba nna laa iyágale raka gele rigixxi'ale bixa diani nu ra ka benne rinneke ka tisa subiha.
31 Ttaka lebi'i gwaluinrula doelha ki dhile ka elha tse ka nu anka tseru. Neti nna ule'enia le attu neda tseru.