3
Juan benne rugadi indaha ridhalie neda ge Jesús‑ni
(Mt. 3:1-12; Mr. 1:1-8; Jn. 1:19-28)
1 Tti chi uka tsinu (15) ida rinnabia Tiberio César‑ni itúba Roma, Poncio Pilato‑ni nna rinnabiana daka Judea‑ni, Herodes‑ni nna rinnabiana daka Galilea‑ni, betsini Felipe‑ni nna rinnabiana daka Iturea lhe daka Traconite lhe. Benne tee lábie Lisanias nna rinnabie daka Abilinia.
2 Anás‑ni lhe Caifás‑ni nna ankakana ka bixxudi xeni. La'ania nna belisa Tata Do Yebáha Juan, xi'in Zacarías‑ni, dona lo yu bisi ata lanú benne se'e.
3 Nianna utena itúba daka ro'o yoo Jordán‑ni rigixxi'enna ka benne kini odúna ke ge nu ruinke nna odaxxuke neda ge Tata Do Yebáha nna gadike inda, kini anáchu dhi benneha elha xen lasi ge ka tulha ruinke.
4 Ukaba attiba ra profeta Isaías‑ni tti unnebie lo ka yetsi ge Tata Do Yebáha, ree:
Lo yu bisi ata lanú benne se'e, niha riyieni tsi'i ttu benne rinnebie idisa, ree:
“Gwalegixxa tse neda ge benne anke Xxanari'iha;
gwalolixxa neda kini dhabie.
5 Iyába ata re ka xieru‑na nna esákana.
Ka i'iya‑na lhe ka sitta xua xea‑na lhe eságabakana kini eyaka lapa.
Ka neda kwalha‑na nna ese'e lhixxakana;
anágaba ka neda anka satsa‑na, eyaka lapakana,
6 kini anáchu nna iyá ka benne ilákanie benne idhelha Tata Do Yebáha kini odilábie ke.”
7 Ixeru ka benne ririake ki rugadi Juan‑ni ke inda, nianna rana ke:
―¡Aalexa nu ruin satsa! ¡Lebi'i ankale ttiba ka belha‑na! ¿Nú chi rana le deki gwalále lo elha disa tsitsi nu chi dabigana ute Tata Do Yebáha gele?
8 Gwaluni nu dika ixú ganna xa. Aníha kini ule'e deki gwalí chi ankale benne bodúna le ge nu ruinle nna bodaxxule neda ge Tata Do Yebáha. Abittu tse'ele ulaba lhi'u lele akinle: “¡Ri'itu gwalábatu, kumu de ankatu benne datiatu Abraham‑ni!” Netiru ria, Tata Do Yebáha ganna aka lebie, gwakaba gebie eyonie ka íyya du'uya nii kini eyakakana benne datia Abraham‑ni; a laa kila iyasanie le.
9 Anágaba nna chigaba du tse iyyatteha kini ichúna itupa lhu ka yaga. Laxkala iyába ka yaga ka nu abittu utekana nu xixxi tse, ka nuha chúbakana nna iru'unakana tsiakana lo giha. Aníha‑ba nuha satele ganna abíba uinle nu dika ixú.
10 Ka benneha nna rinnaba tisake Juan‑ni, ráke:
―Ganna aníha nna, ri'itu, ¿bíla anka nu uintu ganna?
11 Juan‑ni nna bekabina geke, rana:
―Ganna ttu benne se'e chupa xobie, teeki utebie ttu nuha len attu benne abittu xobie tee; lhe ganna ttu benne tee lena robie, teeki kidhie nuha ugwebie benne abittu gebie tee.
12 Bisingaba ttu chupa ka gwekixa kini gadikana inda. Nianna rákana Juan‑ni:
―Maestru, ri'itu nna, ¿bíla anka nu uintu ganna?
13 Lana nna rana kana:
―Abitturu ukixale yani lo nu chi ga'anna ukixale.
14 Unnaba tisagaba ttu chupa ka soldadu, rákana:
―Ri'itu nna, ¿bíla anka nu uintu?
Lana nna bekabina gekani, rana:
―Abittu uniasinle ka benne. Bittu uinle aníha ki kuale nu tee geke. Bittugaba kwenta usiale ikike deki benke ttu bixa. Gwaleyaka xenba lele ttixaruba gaxale.
15 Ka benne tupa niha nna rudo tsitsiba nagake kumu ribedake Cristu benne chi ga'anani Tata Do Yebáha idhelhe nna iyábake rulaba lhi'u leke rakakanie: “¿Si laaba Juan‑niba nuní anke Cristu?”
16 Ttaka Juan‑ni nna unnena rana iyába ka benne tupa niha:
―Gwalí galá neti tti rugadia ka benne inda, suna indaba rixúti, ttaka si dala attu benne tsitsirula ra lebie tti neti. Neti nna labí elha ralhaa idhasia lo ka gwaracha geeha. Benneha nuha ugadie le Espíritu ge Tata Do Yebáha lhe ugadie le gi lhe.
17 Chi den tse barkilu ge benneha kini uin tsebie xuxtilaha nna ganna chi bolhube sináha nna ottupe xuxtilaha nna oga'abie xuaha ata regua tsebie benneha. Nianna tti udelhe tee ge xuaha lo gi nu satíaba rite loniha, nu abittu reyola loniha. Lebi'i nuha udhake aníha.
18 Iyá nuní unne Juan‑ni tti belisana ka benne bele'enna ke ka tisa tse bete Tata Do Yebáha.
19 Anágaba nna utisagaba Juan‑ni Herodes nu rinnabiaha, kumu de bedo lenna Herodías nu anka nuila ge betsini Felipe‑ni lhe utisagabana na ge adíru ka nu satsa bennaha.
20 Ttaka betse'e loona, iki de iyá nu satsa chi ben Herodes‑ni nna bedienrula geni: bega'alana Juan‑ni lhe'e lisiyya de bedona na be ge nu ruinnaha.
Jesús‑ni udie inda
(Mt. 3:13-17; Mr. 1:9-11)
21 Uka nuha tti rugadi Juan‑ni iyába ka benne inda, la'aniagaba udi Jesús‑ni inda. Laka dubie rilhapie tisa len Tata Do Yebáha, nianna biyali yebáha.
22 La'ania nna ugwadi Espíritu ge Tata Do Yebáha, anke attiba ttu becha nna betedhobie iki Jesús‑ni. Nianna biyien tsi'i ttu benne rinnebie yebáha, ree bie:
―Lu ankalu Xi'inia rakati gelu. Lu ankalu benne ruinlu nu ru'u lasia.
Nii dia lá ka benne datiake Jesús‑ni
(Mt. 1:1-17)
23 Jesús‑ni chi ankanie ttiba rerua (30) ida tti uduloe sina ge Tata Do Yebáha. Ra ka benne deki lee uke xi'in José nna datiabie Elí.
24 Elí nna uke xi'ini Matat,
Matat nna uke xi'ini Leví,
Leví nna uke xi'ini Melqui,
Melqui nna uke xi'ini Jana,
Jana nna uke xi'ini José,
25 José nna uke xi'ini Matatías,
Matatías nna uke xi'ini Amós,
Amós nna uke xi'ini Nahum,
Nahum nna uke xi'ini Esli,
Esli nna uke xi'ini Nagai,
26 Nagai nna uke xi'ini Maat,
Maat nna uke xi'ini Matatías,
Matatías nna uke xi'ini Semei,
Semei nna uke xi'ini José,
José nna uke xi'ini Judá,
27 Judá nna uke xi'ini Joana,
Joana nna uke xi'ini Resa,
Resa nna uke xi'ini Zorobabel,
Zorobabel nna uke xi'ini Salatiel,
Salatiel nna uke xi'ini Neri,
28 Neri nna uke xi'ini Melqui,
Melqui nna uke xi'ini Adi,
Adi nna uke xi'ini Cosam,
Cosam nna uke xi'ini Elmodam,
Elmodam nna uke xi'ini Er,
29 Er nna uke xi'ini Josué,
Josué nna uke xi'ini Eliezer,
Eliezer nna uke xi'ini Jorim,
Jorim nna uke xi'ini Matat,
30 Matat nna uke xi'ini Leví,
Leví nna uke xi'ini Simeón,
Simeón nna uke xi'ini Judá,
Judá nna uke xi'ini José,
José nna uke xi'ini Jonán,
Jonán nna uke xi'ini Eliaquim,
31 Eliaquim nna uke xi'ini Melea,
Melea nna uke xi'ini Mainán,
Mainán nna uke xi'ini Matata,
Matata nna uke xi'ini Natán,
32 Natán nna uke xi'ini David,
David nna uke xi'ini Isaí,
Isaí nna uke xi'ini Obed,
Obed nna uke xi'ini Booz,
Booz nna uke xi'ini Salmón,
Salmón nna uke xi'ini Naasón,
33 Naasón nna uke xi'ini Aminadab,
Aminadab nna uke xi'ini Aram,
Aram nna uke xi'ini Esrom,
Esrom nna uke xi'ini Fares,
Fares nna uke xi'ini Judá,
34 Judá nna uke xi'ini Jacob,
Jacob nna uke xi'ini Isaac,
Isaac nna uke xi'ini Abraham,
Abraham nna uke xi'ini Taré,
Taré nna uke xi'ini Nacor,
35 Nacor nna uke xi'ini Serug,
Serug nna uke xi'ini Ragau,
Ragau nna uke xi'ini Peleg,
Peleg nna uke xi'ini Heber,
Heber nna uke xi'ini Sala,
36 Sala nna uke xi'ini Cainán,
Cainán nna uke xi'ini Arfaxad,
Arfaxad nna uke xi'ini Sem,
Sem nna uke xi'ini Noé,
Noé nna uke xi'ini Lamec,
37 Lamec nna uke xi'ini Matusalén,
Matusalén nna uke xi'ini Enoc,
Enoc nna uke xi'ini Jared,
Jared nna uke xi'ini Mahalaleel,
Mahalaleel nna uke xi'ini Cainán,
38 Cainán nna uke xi'ini Enós,
Enós nna uke xi'ini Set,
Set nna uke xi'ini Adán,
Adán‑ni nna uke benne ben Tata Do Yebáha.