11
Tata Do Yebáha ridhelhe chupa ka benne kini kixxi'ake ka tisa geeha
1 Iki de nuha nna betekana ttu iyyaxtila len neti. Iyyaxtilaha rixúna kini rurixxibiari'i lenna. Nianna tti ra Tata Do Yebáha neti:
―Ugía gwarixxibia yotu kiaha lhe berixxibia bekúha lhe. Belabagaba balhaxa ka benne yu'uke rudú xibike lhe'e yotuha lhe.
2 Lali'a yotuha labí urixxibialu kumu chiba betea nuha len ka nu abittu ria lekani kia. Ka nuha tsekikana niha nna udhakabakana yiesi le'a kiaha attiba rakaba lekani delo chua bixxi chupa (42) beo.
3 Neti nna idhelhagabaa chupa ka benne kini kixxi'ake ka tisa kiaha delo ttu mili chupa gayua bixxi gayuna (1,260) ubisa, delába chua bixxi chupa (42) beo. Ka benneha nna ukuke xo ttipa geke nu unna liina deki du si'i leke.
4 Ka benne chupa kixxi'ake ka tisa ge Tata Do Yebáha, ka benneha nuha raxxína ke len chupa ka ya olivu lhe chupa ka candeleru ka nu sia arlo Tata Do Yebaa benne anke Xxana yiesi lo yu‑ni.
5 Ganna nuxa bixa udhakana ka benne chupaha, ka benneha nna kwea tteba ro'oke belha ge gi kini belha ge giha uttena ka nu abittu raka uyúkana ke, kumu aní teeki gatti nuxa bixa udhakana ka benneha.
6 Ka benne chupaha gwa teeba lo neda geke udheake yebáha kini abitturu iyya aka, laka rekike ugixxi'a nu raka le Tata Do Yebáha una ka benne lhe gwa tegaba lo neda geke ki eyoinke iyá ka indaha reni lhe gwa tegaba lo neda geke ki ugweke iyába nu se'e yiesi lo yu‑ni bixaba elha disa lhe balhaxaba lidú aka leke lhe.
7 Ganna chi uluxakanie utixxi'ake ka tisaha, la'ania nna nimala bartoha nu iria lhe'e belha'a chulhaha, itilha lenna ke nna dhaaba nuha loke, nianna tti uttina ke.
8 Tsunna ubisa nalha dhu'uya ka benne yattiha lagwi ge yiesi ra xxeni leniha, yiesi ata betákana Jesús benne anke Xxanakeha lo ya kurusiha. Yiesiha raxxína na len Sodoma o Egipto
9 nna ka benne anka iyá looba se'e lhe'e iyába ka yiesi se'e yiesi lo yu‑ni lhe ka benne rinneke iyá looba tisa lhe, ka benneha ilákanie ka benne yattiha dhu'uyake niha, nna labí dhielhake igatsi ka benneha.
10 Ka nu se'e yiesi lo yu‑ni nna edeakalakinna de chi utti ka benne chupaha. De elha gwedeaka lasi nna kwentaba ugwe luesikani bixaba nu tse, kumu de chi utti ka benne betsetsi xxattakanie lekaniha.
11 Ttaka iki de chi gwa dona tsunna ubisa nalhaha, Tata Do Yebáha nna belhidha benbe ka benne chupaha nna beyaka benbake attu libe. Iyába ka nu use'ekana begíakana ka benneha usi xxattakinna.
12 Nianna tti biyienkin benne chupaha tsi'i ttu benne unne idisa yebáha, ree:
―Gwaltsapi nii.
Ka benneha nna beyapi ttebake deyyake yebáha lhe'e ttu bea. Ka nu ritisikinna keha nna se'ebakana gwelanni.
13 Looraha nna bixú idí nna bise'e looba ttu latti yiesiha, delába delo ttu ttu gayua (100) ka yo'oha, tsii tsiikana bise'e lo. Gasi mili ka benne uttike loora rixúha, ka benne bexxaha nna usi xxattakanie de elha rasiha nna ráke:
―¡Xxeniba ra lelu, xa Tata Diosi benne dolu yebáha!
14 Elha disa nu berupaha chiba ute nuha. Nnanna nna chi tteba dabiga elha disa nu beyonnaha.
Anjeliha bekwesie trompeta nu gasiha
15 Anjeli gasiha nna bekwesie trompeta geeha. Nianna tti biyieni tsi'i ka benne yebáha rinneke idisa, ráke:
Yiesi lo yuha chiba aka nuha yiesi innabia Tata Do Yebaa benne anke Xxanari'iha
lhe ankana yiesi innabia Cristu benne chi ga'anani Tata Do Yebáha kini odilábie ka benne.
Lee innabie ttu dia lii.
16 Ttaperua (24) ka benneola se'e arlo Tata Do Yebáha, ka benne siake lo ka xxila ata rinnabiakeha, ka benneha bettudhi loke lo yu nna betsá loke bie
17 nna ráke:
Ixkixaru rugwetu lu xa Tata Do Yebáha getu,
benne ankalu Xxanatu lhe lu ra tsitsi xxatta lelu lhe.
Lu dolu nnanna lhe dolu ttuha lii lhe.
Rugwetu lu ixkixaru kumu nnanna chi rule'elu nu ra xxeni lelu‑na
nna chi udulolu rinnabialu.
18 Ka nu abí ria lekani luha bisa'abakinna lenlu,
ttaka nnanna chi bisia sá ule'elu elha rise'iki gelu‑na lenkana,
chiba bisia sá uinlu elhuxtisi ge ka nu yattiha
nna ka profeta bixuinlu ki utixxi'ake ka tisa gelu‑na
lhe ka benne chi riesinlu ki akake gelu
lhe iyába ka nu tee elha rasi gekani lenlu
ugwebalu kana nu tse ralhakana dhíkana,
meskiba ankakana nuxka'a lhe meskiba ankakana nu ra xxeni lekani lhe.
Anágaba utse'e lolu ka nu rutse'e lookana ka benne se'e yiesi lo yuha.
19 Nianna tti biyali yotu ge Tata Do Yebáha, delába nu do yebáha. Lhe'e yotuha bilá xua i'ina ata yu'u ka tisa bodha'an tsitsie len ka nu Israel‑ni. Nianna ugwapigaba edha lhe uyu'u be lhe bixú lhe ure xxatta iyya lhe.