5
Benne anke Neru toha, benneha ralhe idhalie lo yetsiha
1 Nianna tti bela'ati benne doe lo xxila ata rinnabieha, daka ná benbie denie ttu yetsi tubi‑na. Lo kwe'eba yetsiha dia letra. Ro'o yetsiha ata riluxa retubinaha, niha taa gasi ka sellu kini abittu rugwelhakana iyali loni.
2 Bela'agabati ttu anjeli ra xxeni lebie, unnebie idisa, ree:
―¿Nú benne ralhe kuabie ka sellu taa ro'o yetsi‑ni lhe idhalie loni lhe?
3 Ttaka ni yebáha lhe ni yiesi lo yu‑ni lhe nigaba lhi'u yuha, labí bisela ttu benne dika idhalie lo yetsiha lhe nigaba ulabe nu dia loni lhe.
4 Neti nna yalhá ribesia dua kumu benne dika ralhe idhalie lo yetsiha lhe ulabe nu dia loni lhe, lanú bisela.
5 Ttaka ttu ka benneola sela lhe'e ka benne ttaperuaha, (24) rabie neti:
―Bittu kwesilu. Biyúruga, benne rákana Beesi, delába benne anke xi'in ttu ka benne datiake Judá lhe datiagabe David‑ni lhe, benneha chi udaabie lo ka nu a raka uyúkane nna labie ralhe kuabie gasi ka sellu taa ro'o yetsi‑na lhe idhalie loni lhe.
6 Nianna tti bela'ati lagwi ata du xxila do benne rinnabieha lhe lagwi ge ttapa ka nu anka baniha, delába ka nu rula'a attiba rule'e ka nimala lhe lagwi ge ka benneolaha, niha du ttu Neru to. Neru toha rule'ena attiba ttu neru chi bettikana nna sia gasi sitta ikini lhe sia gasi ka iyya loni lhe. Ka nuní ankakana gasi ka espíritu rixú lo sina ge Tata Do Yebáha. Ka espíritu‑ni nuha udhelhe itú tte yiesi lo yu‑ni.
7 Nianna tti ubiga benne anke Neru toha bedaxxue yetsi den ná ben benne doe lo xxila ata rinnabieha.
8 Tti bedaxxue yetsiha, itapaba ka nu anka baniha lhe iyába ttaperua (24) ka benneolaha, biyettake bedú xibike arlo benne anka Neru toha. Ka benneha denke ttu ttu ka arpa rudhesike lokani lhe denke ka copa ankakana ge oru, saa tíba lhe'ekani yala. Yala denkeha nuha rigu'inna ka tisa rilhapi ka benne chi ankake ge Tata Do Yebáha,
9 nna rulhake ttu le'a kubi, ráke:
Benne ankalu Neru to, lu ralhalu udaxxulu yetsi‑ni
nna itsúlu ka sellu taa ro'in‑ni,
kumu lu bettikana lu nna len reni gelu‑na chi uyo'olu
iyá looba ka benne se'e lhe'e iyába ka yiesi se'e yiesi lo yuha,
lhe ka benne rinne iyá looba tisa, kini akake ge Tata Do Yebáha.
10 Lu benlu ki akake ka nu rinnabia lhe akake ka bixxudi lhe,
kini ixúke len Tata Do Yebaa geri'iha,
lhe innabiake yiesi lo yuha lhe.
11 Nianna tti bela'ati nna biyienti tsi'i ixe juisiru ka anjeli se'eke abi'iba kwe'e xxila ata do benne rinnabiaha lhe kwe'e ttapa ka nu anka baniha lhe kwe'e ka benneolaha lhe,
12 rinneke idisa ráke:
¡Neru to bettikanaha,
benneha ralhe inná tsitsi lebie
lhe dhie elha tse rute Tata Do Yebáha
lhe anágaba ralhe ake benne yuu
lhe ake benne ruin tsitsi
lhe ake benne udú xibiri'i arloe
lhe anágaba ralhe inná xxeni lebie
lhe ilhapiri'i tisa lenbie lhe!
13 Nianna tti biyienti rinne iyá xea ka nu ben Tata Do Yebáha se'e yiesi lo yu‑ni lhe ka nu se'e lhi'u yuha lhe ka nu reki lhi'u lhe'e indatooha lhe anágaba ka nu se'e yebáha lhe, iyába ka nuní rákana:
Benne doe lo xxila ata rinnabie‑na lhe benne anke Neru to‑na lhe,
ka benne‑na nuná ralhake inne tseri'i geke
lhe udú xibiri'i arloke.
Lhe anágaba lake nuná akake ka benne dika inná xxeni leke
lhe inná tsitsi leke ttu dia lii lhe.
14 Ttapa ka nu anka baniha, delába ka nu rula'a ttiba rule'e ka nimalaha nna rákana:
―Amén.
Ka benneolaha nna bedú xibike nna rutsá loke benne anke Neru toha lhe benne doe lo xxilaha lhe.