22
Udixhe cabe inaaze cabe Jesús
(Mt. 26.1-5, 14-16; Mr. 14.1-2, 10-11; Jn. 11.45-53)
1 Ma zeda yuba pascua, saa ro' sti ca judíu ra ro ca pan sin levadura.
2 Ne qué idxela ca xaíque sti ca sacerdote ne ca maistru de ley modo guuti ca Jesús, purti cadxibi ca ca binni que.
3 Oraque uyuu binidxaba ndaani ladxidó' Judas, Judas Iscariote, tobi de lade doce discípulu que,
4 uyé ra nuu ca xaíque sti ca sacerdote ne ca xaíque sti cani rapa ra yu'du ro', yegüí né laaca ximodo guluí' Jesús laaca'.
5 Nabé bieche ca' ne biaana né ca laabe udii ca laabe vueltu.
6 Bisiguenda be ne dede dxi que ma nisi cuyubi be ximodo uluí' be Jesús laaca sin ganna binni.
Ra gudó xhi né Jesús ca discípulu sti'
(Mt. 26.17-29; Mr. 14.12-25; Jn. 13.21-30; 1 Co. 11.23-26)
7 Dxi pe ro cabe pan sin levadura, dxi ruuti cabe dendxu huiini rusiga'de cabe Dios que,
8 na Jesús rabi Pedru ne Juan:
―Laché lachiguni chaahui ra idó' xhi nu pascua ri'.
9 Oraque na ca':
―Paraa racala'dxu guni chaahui du.
10 Para rabi be laaca':
―Biaa gu'ya tu, ora chindá tu ndaani guidxi zadxaaga tu tobi hombre nua ti rii nisa, lachinanda laa dede ra guiuu.
11 Ne lagabi xpixuaana yoo que, na Maistru paraa nga go xhi né ca discípulu sti pascua ri'.
12 Ne óraque zuluí' laatu ti cuartu ro' rairopa pisu ma nexhe chaahui'. Raqué laguni chaahui para idó' xhi nu.
13 Para biree ca uyé ca ne bidxela ca casi gudxi be laaca'. Ne raqué bini chaahui ca endaró xhi para pascua que.
14 Ora gunda hora go xhi cabe gurí né be ca apóstol stibe ruaa mexa'.
15 Ne rabi be laaca':
―Qué ganna tu pabiá' napa gana gahua xhie nia laatu pascua ri ante gate'.
16 Purti gabe ca' laatu, qué zahua rua' ni dede ora ma bidxiña dxi guni mandar Dios, dxi ma bihuinni xi irá riní' pascua.
17 Ne óraque ucuaa be ti copa. Bidii be diuxquixe Dios ne na be:
―Laicaa ndi', lagué' irá tu.
18 Purti gabe ca' laatu, ma qué zee rua' nisa uvas dede ora ma bizulú guni mandar Dios.
19 Ne óraque ucuaa be pan, bidii be diuxquixe Dios ne gudiizi be ni lú ca', rabi be laaca':
―Ndi nga cuerpu stinne ni chi udiee pur laatu. Laguni casi cayuni nu ri' para guietenaladxi tu naa.
20 Ne zaqueca bi'ni né be copa que. Biluxe si gudó xhi cabe, ucuaa be ni, ne na be:
―Copa ri nga rini stinne ni chi ixii pur laatu. Ne ra ixii ni zaguixhe Bixhoze ti modo cubi chu' né binni laa tobi si.
21 Peru lu mexa ri tobi si nexhe naya ne ná ni chi utoo naa.
22 Dxandí naquiiñe tidi Hombre Biseenda Dios irá ni nexhe tidi', peru gapa gá si ni chi utoo laabe que laa.
23 Oraque bizulú ca discípulu canaba diidxa saa ca tu de laaca chi guni ni.
Tu jma zasaca
24 Ne laca ucuaa yu ca' uná de laaca jma zasaca.
25 Peru rabi be laaca':
―Nanna tu modo runi mandar ca rey ndaani guidxilayú, runi stica irá ni runi mandar ca', ne rudxiiba cabe laaca purti na cabe cayaca né ca laacabe.
26 Peru laatu cadi guni tu zacá, sínuque ni jma risaca lade tu la? gaca casi tobi ni jma huaxié', ne ni sa niru la? gaca casi jmozo ca xcaadxi.
27 Uná nga ni jma risaca, ni zuba ruaa mexa la? o ni caguixhe endaró. Ni zuba ruaa mexa xa. Peru naa nuaa lade tu casi tobi ni riguixhe endaró.
28 Laatu huayuu né tu naa lu irá ni nagana huadide'.
29 Nga runi zudiee guni mandar tu casi bidii Bixhoze ni naa,
30 ti gue né tu naa ne go né tu naa ruaa mexa ra gune mandar. Ne zaca tu juez sti irá ni za de idubi doce xiiñi Israel.
Na Jesús zaní' Pedru qué runibiá' laa
(Mt. 26.31-35; Mr. 14.27-31; Jn. 13.36-38)
31 Oraque na be:
―Simón, Simón, biiya gá lii, ma gunaba binidxaba laatu para uniibi dxacha laatu casi ora riguibi cabe semiá.
32 Peru ma unaba lu Dios pur lii cadi guiaadxa fe lii. Ne ora ma biasa lu sti tiru la? ucané ca hermanu stiu' uzuhuaa chaahui ca'.
33 Para na Pedru:
―Señor, ma nuaa listu cadi para guieguayuaa nia sia' lii, sínuque dede para gate nia pia' lii.
34 Oraque rabi be laa:
―Pedru, gabe ca' lii, yanna gueela ca, zaníu' qué runibióu' naa chonna tiru ante guunda gallu.
Ma zeda dxiña ni nagana
35 Ne rabi be laaca':
―Dxi biseenda laatu xie ñee tu ne qué niné tu ixhiapa nin vueltu, ñee biaadxa laatu xiixa la?
―Gasti qué ñaadxa laadu, na ca'.
36 Para rabi be laaca':
―Yanna, tu napa ixhiapa la? icaa ni, ne tu napa vueltu la? icaa xpueltu. Ne tu qué gapa espada la? utoo xhaba sí tobi.
37 Purti napa xidé gaca ni cá lu Xqui'chi Dios ra ruzeete ni de naa, na ni: “Bitiidi cabe laabe de malu.” Irá ni cá lu Xqui'chi Dios de naa napa xidé gaca yanna.
38 Oraque na ca':
―Señor, rarí nuu chupa espada.
―Ne nga si zugaanda, rabi be laaca'.
Ra ze cabe lu dani Olivo
(Mt. 26.36-46; Mr. 14.32-42)
39 Ne óraque biree be ze be lu dani Olivo casi runi be irá tiru, ne yenanda ca discípulu stibe laabe.
40 Ora yendá cabe raqué rabi be laaca':
―Lainí' né Dios ti cadi uquiinde binidxaba laatu.
41 Para bixele be de laaca bia' rilá ti guie, ne bizuxibi be uní' né be Dios,
42 na be:
―Bixhoze', pa racala'dxu la? bilá naa de enda naná ni cabeza naa ri'. Peru cadi gaca ni rabe', sínuque ni na lu'.
43 Oraque bidxiña ti ángel de ibá' ra nuu be, bidii stipa laabe.
44 Ne jma rusi bizulú be uní' né be Dios bia' gunda ti', purti nabé nuu yuuba ladxidó' be. Dede biasa ti nisa luna mboolo luguiá be, ruluí' rini ne biaba cani layú.
45 Biluxe uní' né si be Bixhoze be, biasa be uyé be ra nuu ca discípulu. Ne yendá be laaca nisiaasi ca', purti nuu ca triste.
46 Para rabi be laaca':
―Xiñee nisiaasi tu. Laguiasa ne lainí' né Dios ti cadi uquiinde binidxaba laatu.
Ra bigaa Jesús
(Mt. 26.47-56; Mr. 14.43-50; Jn. 18.2-11)
47 Caní' ru be biuu jma binni ra nuu cabe. Tihua Judas, tobi de lade doce discípulu stibe que, za niru lú ca', ne casi biuu bidxiña gudó ti bixidu lucuá be.
48 Oraque rabi be laa:
―Judas, ñee ne bixidu guluí' lu Hombre Biseenda Dios la?
49 Ne ora bi'ya cani nuu né Jesús raqué xi chi aca la? na ca':
―Señor, ñee zucá' lú nu laacabe ne espada la?
50 Ne óraque bininá tobi de laacabe ti mozo sti sacerdote gola ne guxha ti diaga mozo que ladu derechu.
51 Para rabi be laaca':
―Lausaana nga, bia' cati'.
Ne óraque guda'na be diaga hombre que para bianda.
52 Oraque rabi be cani beeda ra nuu be que, ca xaíque sti ca sacerdote, ne cani rapa ra yu'du ro' ne ca xaíque sti guidxi:
―Ñee gubaana zeda naaze tu la? Né pe tu espada ne palu.
53 Inque ti dxi uyuaa nia laatu ndaani yu'du ro' ne qué ñuni tu pur ninaaze tu naa. Peru ma bidxiña ora gaca ni na tu ne ni na binidxaba'.
Ra uní' Pedru qué runibiá' Jesús
(Mt. 26.57-58, 69-75; Mr. 14.53-54, 66-72; Jn. 18.12-18, 25-27)
54 Oraque unaaze ca laabe, yené ca laabe ralidxi sacerdote gola, ne yenanda Pedru laabe zitu zitu.
55 Ne bi'ni ca binni que ti gui lu patiu que ne gurí ca idubi vuelta gui que. Laca gurí Pedru lade cabe.
56 Ora bi'ya ti criada zuba be raqué biiya dxí laabe ne na:
―Nguiiu ri laca uzá né laabe.
57 Peru qué niná be niní' be pa xpinni Jesús laabe, para na be rabi be gunaa que:
―Qué runebia'ya dia' hombre ca.
58 Qué nindaa de ngue biiya stobi laabe, ne na rabi laabe:
―Lii laca de laacabe lii.
Peru na be:
―Co' hombre, cadi de laa di cabe naa.
59 Udi'di bia' ti hora de ngue biree stobi cá tema:
―Dxandí ne laabe uzá né be hombre ca, purti binni Galilea laabe.
60 Para bigueta na be:
―Cadi lica cayene xi caní' tu, hombre.
Nin ca'ru lica iluxe iní' be ngue ora bi'nda ti gallu.
61 Ne bidxigueta lú Señor biiya dxí laabe. Oraque bietenala'dxi be ca diidxa ni gudxi Señor laabe que, ante guunda gallu, zaní' be chonna tiru qué runibiá' be laa.
62 Para biree be de raqué, yeguuna be dede uyuu yuuba ladxidó' be.
63 Ucuaa ca hombre ni cayapa Jesús que laa. Gudiñe ca laa ne bini burla ca laa.
64 Bindiibi ca lú be ne gudapa ca laabe, ne na ca iní' be tu gudapa laabe.
65 Ne birá ru ni gudxi ca laabe para guni burla si ca laabe.
Ra zuhuaa Jesús nezalú justicia
(Mt. 26.59-66; Mr. 14.55-64; Jn. 18.19-24)
66 Ora birá gueela sti dxi que, bidxiña ca xaíque sti guidxi que, ne ca xaíque sti ca sacerdote ne ca maistru de ley. Ucuaa ca laabe ne bichiña ca laabe ra nuu irá justicia stica'. Ne raqué na ca':
67 ―Gudxi laadu pa lii nga Cristu, ni nexhe useenda Dios que.
Para rabi be laaca':
―Neca pe gabe laatu qué zuni cre tu.
68 Ne pa inaba diidxa laatu xiixa qué zacabi tu, ne qué zundaa tu naa.
69 Peru dede yanna ma chi tí Hombre Biseenda Dios cue' Dios ni nandxó'.
70 ―Lii nga Xiiñi Dios pue la? na irá ca'.
Para rabi be laaca':
―Laatu caní' tu ni.
71 Oraque na ca':
―Xi jma ru caquiiñe ganna nu, purti ma bina diaga nu de ruaa pe be.