4
Ucala'dxi binidxaba nusaba Jesús
(Mt. 4.1-11; Mr. 1.12-13)
1 Ora bigueta Jesús de ra guiigu Jordán dxá ladxidó' de Espíritu Santu, ne yené Espíritu que laabe ndaani gui'xhi'.
2 Biaana be raqué cuarenta dia ne ira ca dxi que ucala'dxi binidxaba nuquiinde laabe. Qué ño be idubi naca cuarenta dia que, ne ora bi'ya binidxaba ma candaana dxita be,
3 na rabi laabe:
―Pa dxandí Xiiñi Dios lii la? gudxi guie ri gaca pan.
4 Oraque rabi be laa:
―Cá lu Xqui'chi Dios: “Cadi pan si nga ibani né binni, sínuque ne stiidxa Dios.”
5 Oraque yené binidxaba laabe lu ti dani soo, ne tobi biluí' si laabe idubi naca guidxilayú,
6 ne na rabi laabe:
―Zudiee lii irá ca guidxi sicarú ca, purti stinne cani, ne zanda udiee cani tutiica acaladxe'.
7 Yanna stiu' cani pa uzuxibi lu xañee' usisaca lu naa.
8 Peru óraque rabi be laa:
―Bixele de naa, binidxaba', purti cá lu Xqui'chi Dios: “Dios si nga naquiiñe usisaca cabe, ne guni cabe ni na.”
9 Bigueta ucuaa binidxaba laabe, yené laabe Jerusalén, bidxiiba laabe ique yu'du ro' ne na rabi laabe:
―Pa dxandí Xiiñi Dios lii la? uyuu bí de racá.
10 Purti cá lu Xqui'chi Dios, zuseenda ca ángel sti' gapa lii,
11 cu' ná xi'que lu' ti cadi gacaná lu lu guie.
12 Para rabi be laa:
―Laca cá lu Xqui'chi Dios: “Cadi inaba cabe xiixa Dios para quite si cabe laa.”
13 Biiya si binidxaba ma qué idxela ximodo usaba laabe, bisaana laabe caadxi.
Ra bizulú xhiiña Jesús
(Mt. 4.12-17; Mr. 1.14-15)
14 Uca si irá nga bigueta be neza Galilea ne stale enda nandxó' purti dxá ladxidó' be de Espíritu Santu. Irá xixé guidxi neza que ma cayuí' cabe stiidxa be.
15 Ne bisiidi be ndaani ca yu'du sti ca judíu ne irá ca bisisaca ca laabe.
Ra nuu Jesús Nazaret
(Mt. 13.53-58; Mr. 6.1-6)
16 Ne zaqué canazá be dede yendá be Nazaret guidxi ra biniisi be. Raqué nuu be beda ganda dxi enda riziila'dxi', para biuu be ndaani yu'du casi runi be irá dxi enda riziila'dxi', ne bizuhuaa be para gu'nda be Xqui'chi Dios.
17 Bidii cabe laabe gui'chi ni bicaa profeta Isaías ne bixhele be ni biyubi be ra cá ca diidxa ri':
18 Nuu né Espíritu sti Dios naa,
purti ma ulí naa güe nia ca pobre diidxa ni usieche laaca'.
Biseenda be naa gueda ndee yuuba ladxidó' binni,
ne gabe cani nundiibi pecadu laa ximodo zanda iree ca de laani,
ne usinaya cani nacheepa lú,
ne ula'ya cani cuxhii cabe laa,
19 ne gabe binni ma bidxiña dxi gudixhe Dios para ilá ca'.
Irá nga cá ra biinda be que.
20 Biluxe si biinda be ni, bizeechu be ni, bidii be ni ni runi dxiiña ndaani yu'du que ne gurí be. Peru biiya si be cayuuya dxí irá ni nuu ndaani yu'du que laabe la?
21 bizulú be byui' né be laaca diidxa', rabi be laaca':
―Yanadxí pe cayaca ni cá lu Xqui'chi Dios ni bina diaga tu nagasi ca.
22 Nabé biaba be ca binni que ne bidxagayaa ca pabiá' galán riní' be ne na ca':
―Ñee cadi ndi nga dxa xiiñi José que la?
23 Para rabi be laaca':
―Nuu ti dichu na: “Doctor, bisianda laca lii.” Yanna seguru nga ca cayabi tu naa, gune irá ni bine Capernaum ndaani xquidxe'.
24 Peru gabe ca' laatu, qué rulabi cabe ti profeta ndaani xquidxi.
25 Casi uca chiqué dxi nabani profeta Elías, chonna iza aronda qué ñaba nisa guie ne uca ti gubiña ca guidxi que. Stale viuda uyuu lade ca judíu,
26 ne qué nuseenda Dios Elías ra nuu nin tobi de laacabe, sínuque ra nuu ti viuda ndaani guidxi Sarepta de Sidón.
27 Ne zaqueca dxi nabani profeta Eliseo, stale judíu gupa lepra, peru nin tobi qué ñanda sínuque Naamán, binni Siria.
28 Ora bina diaga cani nuu ndaani yu'du que xi na be, gudó dí laaca',
29 ne biasa ca', ulee ca laabe de ndaani guidxi que, yené ca laabe punta dani ra dxi'ba guidxi que para nibee yaande ca laabe.
30 Peru udi'di be galahui de laaca', ze be.
Sti ti hombre riguite binidxaba ique
(Mr. 1.21-28)
31 Uyé be sti guidxi de Galilea, lá Capernaum. Ne bisiidi be ca binni que dxi enda riziila'dxi'.
32 Nabé bidxagayaa ca binni que modo rusiidi be, purti riní' be casi tobi ni zanda guni mandar.
33 Ndaani yu'du que nuu ti hombre riguite binidxaba ique, ne bicaa ridxi:
34 ―Biree de laadu. Xi napa neu laadu, Jesús de Nazaret. Ñee zeda unitilú lu laadu la? Runebia'ya lii. Lii nga hombre cha'hui sti Dios.
35 Oraque udinde né be binidxaba que, na be rabi be laa:
―Bigani, ne biree de hombre ca.
Oraque bigaze binidxaba que hombre que layú, ne biree ze', sin ñuniná hombre que.
36 Nabé bidxagayaa irá binni que, ne na ca':
―Ximodo ndi caní' hombre ri'. Ne stale enda nandxó' runi mandar be ca binidxaba' ne riree ca'.
37 Ne nisi stiidxa be cayuí' irá binni de ca guidxi neza que.
Ra bianda suegra Pedru
(Mt. 8.14-15; Mr. 1.29-31)
38 Biree be de ra yu'du que, uyé be ralidxi Simón. Nexhe né suegra Simón xhindxá' ne unaba cabe Jesús usianda laabe.
39 Para bidxiña Jesús ra nuu be, ne udinde né xhindxá' que, biree. Oraqueca biasa be ne bidii be ni gudó ca'.
Bisianda Jesús stale binni huará
(Mt. 8.16-17; Mr. 1.32-34)
40 Bia' ziyaazi gubidxa yené cabe stale binni huará de irá clase enda huará ra nuu Jesús, para gudixhe ná Jesús luguiá ca' ne bianda ca'.
41 Ne laca stale binni ulee be binidxaba de laa, ne laga caree ca binidxaba que cucaa ca ridxi:
―Lii nga Xiiñi Dios.
Peru udinde né be laaca', qué nudii be lugar niní' ca', purti nanna ca laabe nga Cristu ni ulí Dios.
Ra uzá Jesús Galilea
(Mr. 1.35-39)
42 Ma zeda yaba biaani biree be de ndaani guidxi que, uyé be ti lugar ra iruti guinni. Peru stale binni canayubi laabe ne yendá ca ra nuu be. Ucala'dxi ca nucueeza ca laabe para cadi ñe be.
43 Peru rabi be laaca':
―Napa xidé chaa xcaadxi guidxi. Chi güe nia binni modo runi mandar Dios, purti para nga bendá'.
44 Ne zacá uzá be Galilea, yeusiidi be irá ra yu'du'.