10
1 Gu' co' ndxàc mèn huesen por cón che'n Jesucrist, con' ndxè' nac co' ndryo' ndlyen' lezon no co' nac di's co' mbezen Diox cón che'n mèn nación Israel, ndlyazen le' mèna lyá' loo con' ryes.
2 Ndan cuent loo gu' cón che'n con' ndac co' nac cón che'n mèn nación Israel le' mèna anze'f mènley' nac loo Diox. Per ndxe'leque', indxác ndacte mèna cón che'n Diox xal ñibe' Diox.
3 ¡Prob mèn nación Israel! Inda'de mèna cuent xá mod ndyal Diox par yòo chol mèn loo cón che'n Diox par gàc mèna mèn nalì no mèn nambìi loo Diox. Ndxe'leque', más ndxòo lezo' mèn nación Israel li mèna mod che'n mèna par tataa mod li mèn nación Israel cuent nac mèna mèn nalì no mèn nambìi loo Diox por mod co' mbli mèna cuent nzi tee ban nalì no nambìi mèna loo Diox. Ndxe'leque', nac mèna mèn naad no mèn nguud loo Diox, co' nee di's, ne'ndalte mèna gàc mèna mèn nalì no mèn nambìi loo Diox xal nac mod co' mbli Diox par mdyal Diox yòo mèn loo cón che'n Diox par gàc mèna mèn nalì no mèn nambìi loo Diox.
4 Tac co'se' mbi'th Crist, Crist mbli ya inquinte tolo li mèn cas loo ley no tolo tyubdi's mèn loo ley co' mxo'f Moisés loo mèn nación Israel. No mbliguè' Crist le' mèn co' ante yila's loo Crist, Diox mdyal yòo mèna loo cón che'n Diox par gàc mèna mèn nalì no mèn nambìi loo Diox.
5 Moisés mblu' loo mèn nación Israel cón che'n xá mod gàc mèna mèn nalì no mèn nambìi loo Diox por cón che'n ley co' mxo'f Moisés loo mèn. Ndxab Moisés: Chele' mèn que tee ban xalque' ñibe' ley loo mèn, mèna toloque' gàc mèn nalì no mèn nambìi loo Diox chele' mèna, lìcque', tyubdi'sque' loo con' ñibe' ley loo mèna.
6 Per cón che'n xá mod tyal Diox gàc chol mèn mèn nalì no mèn nambìi loo Diox ante por ndxela's mèn loo Diox por cón che'n Jesucrist, di's co' ndub loo libr co' nac xti's Diox mbez taandxè':
Ne'gabte gu' loo lezo' gu': Ché' nzo chó mbi' co' quée loo bé', co' nee di's, par ya xi thìb mbi' Crist loo bé'? Con'a nee di's nden' mèn ya xi thìb mèn Crist loo bé' tac tarte yi'th Crist loo izlyo', ndyac mèn. Thìba con'a.
7 Le' tediba na, ne' ne' gab gu' loo lezo' gu': ¿Chó mèn nzo co' lyàa co'te' nac lugar co'te' nzo alm mèn no xpii mèn co' nguth loo izlyo' ndxè', co' nee di's, co' mèna Crist làth mèn nguth tya tac nden' mèn le' Crist tarte ryo xban làth mèn nguth?
8 Per hui' gu' nexa. ¿Ché' inda'de gu' cuent xal mbez di's co' ndub loo libr co' nac xti's Diox? Di'sa mbez: Di's co' nac xti's Diox mzinle' xàn' nza gu' no tlate tyoodi's gu' cón nee di'sa. Mté'th gu' cón che'n di'sa no ndxan' cón che'n di'sa le'n lezo' gu'. Di's ndxè' nac cón che'n di's ndac co' ndlu' loo mèn xá mod tyal Diox yòo mèn loo cón che'n Diox por cón che'n Crist. Cón che'n di's ndaca ngo nu' yalbàn nalle'.
9 Tac chele' thìb thìb gu' ta' cuent no co ro gu' le' Jesús nac Tad loo ryethe con', no chele' gu' yila's dib nzo yéc gu' no dib nzo lezo' gu' le' Diox mblo xban Tad Jesús làth mèn nguth, lyá' gu' loo con' ryes.
10 Mèn co' dib nzo yéc no mèn co' dib nzo lezo' ndxela's loo Tad Jesús, ndyal Diox yòo mèna loo cón che'n Crist par gàc mèna mèn nalì no mèn nambìi loo Diox. Lomisque' ne, mèn co' nda' cuent no ngo ro mèn le' Jesús nac Tad loo ryethe con', mèna nac mèn co' mblyá'le' loo con' ryes.
11 Loo libr co' nac xti's Diox ndub di's co' mbez:
Ryete mèn co' ndxela's loo mbi'a, mèna ne'tyóode yiloa par ya ye'th lezo' mèna no par tyoo xà' lezo' mèna. Ne' ne' xi lezo' mèna yiloa por cón che'n mbi'a.
12 Cona, ngue niin loo gu': Indyu'de mèn nación Israel más loo Diox leque taamas mèn co' inacte mèn nación Israel. Leque yub Diox nac Diox co' ñibe' loo rye mèn. No nda' Diox rye loothe con' ndac loo mèn co' mbez lèe Tad Diox.
13 Por cona, ryete mèn co' cuez lèe Tad Jesús, mèna lyá' loo con' ryes.
14 Hui' gu' nexa. ¿Xá mod cuez mèn lèe Tad Jesús co'se' tarte yila's mèn loo Tad Jesús, à'? No ¿xá mod yila's mèn loo Tad Jesús co'se' tarte gòn mèn cón che'n Tad Jesús, à'? No ¿xá mod gòn mèna cón che'n Tad Jesús co'se' yende chó mèn tarte co yalbàn cón che'n Tad Jesús loo mèn, à'? Yende moda, ¿lé'?
15 No ¿xá mod co mèn yalbàn loo xtàa mèn co'se' yende chó mèn nzo co' tel' xtàa mèn par ya lo mèna yalbàn loo mèn? Yende moda, ¿lé'? Ndxàca loo mèn co' nda lo yalbàn xal ndub di's loo libr co' nac xti's Diox co' mbez taandxè':
Susque' mèn ndac nac mèn loo Diox, mèn co' ngo yalbàn cón che'n di's ndac. No anze'f huen nda mèna.
16 Per fte' lezo' gu' iryede mèn nación Israel ndyubdi's loo di's ndac co' ndlu' cón che'n Crist. Ndxàca loo mèn nación Israel xal ndub di's loo libr co' nac xti's Diox co'te' mque' Sayi ye's. Sayi ndxab:
Yende chó mèn ngola's di's co' mde'th nu' loo mèn, Tad.
17 Per nase nzoque' mod yila's mèn no gàp mèn yalxla's cón che'n Crist co'se' gòn mèn cón che'n di's ndac co' co mèn yalbàn cón che'n Crist.
18 Ñibdizen thìb con' loo gu': ¿Ché' ndli gu' cuent tarte gòn mèn nación Israel cón che'n di's ndac ndxè', cà'? ¿Xá mod ne' tar gòn mèn nación Israel cón che'n di's ndac ndxè', à'? Loo libr co' nac xti's Diox ndub di's co' mbez:
Dib athu loo izlyo' ndxathle' no ndxènle' cón che'n di's ndac che'n Diox co' mde'thle' mèn no co' mblole' mèn yalbàn. Axta dib vuelt ro izlyo' mbyath mbyèn di's co' mde'th mèna, ne.
Aa. Nonque' mèn nación Israel cón che'n di'sa, ¿lé'?
19 Beren, ñibdizen loo gu' tedib vez: ¿Ché' ndyac gu' tarte ta' mèn nación Israel cuent cón che'n di's ndac ndxè', cà'? Yende xàa. Nonque' mèn nación Israel cón che'n di's ndac ndxè'. Con que nerleque' cón che'n di's ndac ndxè' nac di's co' mda' Moisés cuent loo mèn nación Israel co'se' mde'th Moisés di's co' ndxab Diox co' mbez taandxè':
Daa li gàc con' ndac loo mèn che'n tedib nación co' inacte mèn nación Israel co' ndyac gu' yende cón ntac loo Diox. Le' gu' na, angnziri' gu', yan lezo' gu' ñèe gu' mèn naciona por cón che'n con' ndac co' lin loo mèna. No lin con' ndac loo mèn thìb nación co' ndyac gu' nac mèn nguud no mèn naad. Con' ndac co' lin loo mèn naciona, le'i càb le' gu' yecloo tín' ñèe gu' mèn naciona.
20 Nde nxon', mbli Sayi ryes. Ndxab Sayi cón che'n di's co' ndxab Diox loo mèn nación Israel. Ndxab Sayi:
Mèn co' alithe mque tee ban no ne'ncua'nte mèna daa tac mèna tarte ñee no tarte gòn mèna le' con' co' nac cón chenen ngro xo'f loo mèna. Mblin par ngòca loo mèna, ne, xal mèn co' mblu' loo loo mèna, loo mèn co' iñibdi'ste cón chenen.
21 Lomisque' ndxab Sayi cón che'n mèn nación Israel xal ndxab Diox:
Ryete huiz msilen yan no nalyat mbezen loo mèn co' nac mèn nacionpe' daa, mèn co' ngòc mèn co' indyubdi'ste no mèn co' ngòc mèn naad no mèn nguud par ngòo mèna loo cón chenen tedib vez. Per ne'nglide mèna cas con' ndxaben. Thìba con' ndxè'.