3
Pab ngue lu' xá mod li mèn co' tyoo ner loo mèn co' ndxela's, mèn co' nqueltàa loo cón che'n Diox.
1 Di's co' ngue niin lool ndxè' nac lìcpe', Timote. Chele' chol mèn ndryo' ndlyen' lezo' xo'f zin' mèna zin' par tyoo ner no tyoo naa mèna loo mèn co' ndxela's co'se' queltàa mèn le'n templ, lìcque', con' ndac nac zin' co' ndryo' ndlyen' lezo' mèna li mèna.
2 Por cona, ngue niin lool, Timote: Mèn co' ndyoo ner no co' ndyoo naa loo mèn co' nqueltàa loo cón che'n Diox, mèn co' nxo'f zin' zin' cón che'n Crist loo mèn co' nqueltàa loo cón che'n Diox, ndxàalque' que tee ban mèna thìb mod ndac co' yende chó mèn yoo mèna. Gàc mèna mèn co' ndyub no thidte xa'got co' nac xin' sa'l. Gàc mèna mèn co' nagàl yòo lezo' ñèe xtàa. Gàc mèna mèn co' altant ndyoo loo zin' co' ndli mèna liz mèna. No ndxe'sleque' li mèna xtùuz co' nac xtùuz co' ndli mèna. Gàc mèna mèn co' gàp mod par gab taamas mèn le' mèna nac mèn guryath no mèn guryèn. No naquinque' tyoo lezo' mèna ta' mèn posad loo chol mèn tith co' nde too naa chop son huiz. Gàc mèna mèn ndac co' nalas nac par lu' mèna loo taamas mèn cón che'n Crist.
3 Ne'gàcte mèna mènguy co' ndxu chol nítguy. Ne' ne' gàc mèna mèn co' yáp di's no mèn co' ncua'n di's. Ndxe'leque', gàc mèna mèn nado' no mèn co' ne'yòode lezo' yoo di's. Ne' ne' gàc mèna mèn co' nde yath ñèe tmi co' ndlixù' mèn gan. Ndxe'leque', naquin gàc mèna mèn ndacpe', mèn co' cue no xtàa rye nda mèn no rye ndye'th mèn. Gàc mèna mèn co' ne'gath lyuxte par ñèe mèna tmi.
4 Naquinque' gàc mèna thìb gundan ndac co' ñibe' ndac loo mèn guliz mèna. No li mèna le' xin' mèna gàc myen' nado' no gàp myen' mod loo rye mèn.
5 Tac chele' mèn co' gàc mèn co' tyoo ner no co' tyoo naa loo mèn co' nqueltàa loo cón che'n Diox ne'gácte ñibe' loo mèn gulizpe' mèn, ¿xá mod gác mèna quenap mèna no ñibe' mèna no tyoo ner no tyoo naa mèna loo mèn co' nqueltàa loo cón che'n Diox, sya? Yende mod ñibe' mèna chele' mèna tataa nac, ¿lé'?
6 Mèn co' gàc mèn co' tyoo ner no co' tyoo naa loo mèn co' nqueltàa loo cón che'n Diox, indxàalte gàc mèna mèn co' diz ngola's loo cón che'n Diox no co' diz ngòo loo cón che'n Diox. Tac ne'stolque', làth xtau'a aseli mèna tye's mèna xalque' mdye's Mebizya. No yiloa, quexù' Diox mèna xal mquexù' Diox Mebizya' par tyactìi mèna yiloa xalque' tyactìi Mebizya yiloa.
7 Lomisque' ne, nquinque' gàc le' mèn co' tyoo ner no co' tyoo naa loo mèn co' nqueltàa loo cón che'n Diox gàp mod loo mèn co' tarte yòo loo cón che'n Diox par gàp mèn yalxla's loo Diox par nec thìb mod no nec tedib mod yende mod quexù' mèn co' tarte yila's mèn co' tyoo ner no co' tyoo naa loo mèn co' nqueltàa loo cón che'n Diox. Chele' mèn co' tyoo ner no co' tyoo naa li tataa mod, le' sya, càba loo mèna ne'thyonte mèna no ne'yigàade mèna loo Mebizya xal co'se' ndlyàa má' guli quìi loo thìb tramp.
Pabl ngue lu' trè' xá mod li mèn co' nquenap templ no mèn co' ndlyath no taamas mèn le'n templ.
8 Lomisque' ne, cón che'n mèn co' li sirv loo mèn co' nqueltàa loo cón che'n Diox, mèna ndxàal gàc mèn co' ndxàp mod par gab taamas mèn le' mèna nac mèn guryath no mèn guryèn. No ne'gàcte mèna mèn ye'rsin' xal nac mod co' ndyoodi's mèn. Ne'gàcte mèna mèn co' ndyuuz. Ne'gàcte mèna mèn co' ndli huan' loo xnaa co'se' ndi' mèn no ntho' mèn, co' nee di's, ngo mèn má' xi'tha par xexte li mèn gan tmi loo xtàa mèn.
9 Ndxàalque' gàc mèna mèn co' nda' cuent co' huenleque' cón che'n con' co' indxòn ndacte mèn loo cón che'n Crist co' ndxela's na'. No ndxàal que tee ban ndac mèna thìb mod co' yende con' ten' mèna le'n lezo' mèna cón che'n xtùuz co' ngue no mèna cón che'n Crist.
10 Nerleque' naquin gàc preb mèna ñeene' xal nac mèn co' li sirv loo mèn co' nqueltàa loo cón che'n Diox, ñeene' ché' nzo chó falt ndxàp mèna. Chele' mèna yende chó falt no mod ndxàp, nzoque' mod xo'f zin' mèna zin' co' nac cón che'n Crist.
11 Lomisque' ne, le' xa'got co' nac sa'l mèn co' li sirv loo mèn co' nqueltàa loo cón che'n Diox, gàc xa'gota mèn nado' co' ne'yòode loo cuent yix. Ndxe'leque', gàp mèngota mod no li nèe mèngota mèngota loo cón che'n Crist co' ndxela's na'. No gàc mèngota mèn ndacpe' co' ndyoo altant loo ryethe con'.
12 Bnibe' loo mèn co' li sirv loo mèn co' nqueltàa loo cón che'n Diox gàc mèna mèn co' ndyub no thidte xa'got co' nac xin' sa'l mèna. No gàc mèna gundan co' ñibe' ndac loo mèn gulizpe' mèna.
13 Tac mèn co' ndlyath no mèn co' nqueltàa loo cón che'n Diox co' nabe'ste ndyoo naa loo zin' co' ndli mèna, mèna ndli gan ndxàc con' guryath no con' guryèn loo mèna. No sate más con dibaxla's tyoodi's mèna cón che'n xá mod ndxela's mèna loo Crist no loo cón che'n Crist.
Trè' ngue lu' Pab cón che'n co' ndxela's na', con' co' inonte huax mèn no con' co' inda'de huax mèn cuent.
14 Ngue que'en ye's ndxè' lool, Timote, mastale' ndub quee lezon xaste gal neen máal par nedrè'.
15 Tac antale'i, chele' daa lyen' no ne'yilode gal neen máal, cona ngue tel'en cart ndxè' lool par ñeel xá mod ndxàal tyoo naal no tyoo nerl loo mèn co' nac mèn gulizpe' Diox. Fte' lezo'l mèna nac mèn che'n Diox co' lìcpe' naban. Mèn co' nqueltàa loo cón che'n Diox chol lugar, mèna ngue ta' fuerz par nda' mèna cuent cón che'n Crist co' nac con' lìcpe' loo taamas mèn co' tarte yila's, co' nee di's, nac mèna xal thìb cimient no thìb pílar co' nda' fuerz loo thìb yòobé'.
16 Lìcpe' ba'i, con' roo no con' xèn nac alux con' co' nac cón che'n con' co' be' nacasloo loo huax mèn co' nac xley' co' ndxela's na' loo Diox no loo cón che'n Diox, co' nee di's:
Leque Diox mblu' Diox loo mèn co'se' mbi'th yáal Crist loo izlyo' ndxè' xal ndxáal chol mèn loo izlyo' ndxè'. Diox mblo ro no mblu' Diox loo mèn nalì no nambìi nac Crist tac yub Diox mblo xban Crist. Mbyú' loo Crist loo angl. Mbyath no mbyèn cón che'n Crist loo mèn le'n chol nación dib athu loo izlyo'. Ngola's mèn co' nziri loo izlyo' loo Crist. Ngoloa, nguáp Crist loo bé' co'te' nac yòoba'.