2
Paba mteni re zha tsa ne zha naa xomod ndoblo tediz zha lo Diox
1 Tim, ndoblo gaba lo re zha kuu nyelaaz Jesús thibka ndoblo tediz zha lo Diox, ne naab zha lo Diox kwent chaan reta men, ne taa zha texkix lo Diox.
2 Ndoblo naab zha lo Diox kwent chaan re rey ne reta zha kuu nak tsiin, tsa wen kwinaa ne tak golaa lo Diox, ne nali bana taxal nlaaz Diox, ne ndoblo gakaa zha wen lo re men.
3 Tak koree nak kuu wen, kuu nyow leettsoo Diox kuu mtelaa reʼaa.
4 Tak lee Diox nlaaz lee reta men keno yalnaban kuu thitanax, ne lebee zha kuu wli.
5 Yent raa tedib Diox thibka Diox nzo, ne thibka zha ni kwent chaanaa lo Diox nzo, zha ree nak Jesucrist.
6 Tak lee Jesucrist mndaa yalnaban chaan, tsa mtuyy zha falt chaan reta men, ne Diox mtsow koree wiz kuu mli Diox tsow Diozhe.
7 Diox mlin ne mtaalʼn, tsa gakʼn apóstl chaan Jesucrist, tsa tan kwent kuu wli lo re zha kuu nagt zha Israel, tsa yelaaz zha Jesucrist. Wlin kuu nin nkeditʼn.
8 Kona nlazʼn lee re mbyi, loka ta ndo zha ndoblo tediz zha lo Diox, ne xap zha yaa zha. Ndoblo tsow zhay thib mod nali, ndoblot yii zha neeka ndoblot yodiz zha tsow zhay.
9 Ne lee re ngot ndoblo zha gok zha lar taxal ndobloy; ndoblot gok zha lar kuu kwathoz naap neeka ndoblot tee zha bow yek zha kwathoz narub. Neeka ndoblot lortsin zha re kuu or ne neeka re ke perla kuu kwathoz nataak.
10 Lee kuu nlazʼn nak: Lee re ngot kuu nyelaaz Diox, ndoblo tsow zha kuu wen, taxal ndoblo ban re ngot kuu nali ne ntsow kuu nlaaz Diox.
11 Lee re ngot ndoblo zheta tsow zha leen gwodoo, ne gon zha diiz kuu nzhon zha.
12 Ne kuu nin nak, ndoblot loo ngot lo re mbyi ne neeka ndoblot nabee ngot lo mbyi, sinke zheta ndoblo tsow ngot.
13 Tak ner Adán mdexkwaa Diox, tsaraa Ev;
14 ne nagt Adán ngwalaaz kuu nzhab Maxuuy, sinke ngot ngwalaaz kuu nzhab Maxuuy, kona mndaa ngot falt.
15 Per lee ngot telaa ngot, leettsa gap ngot mbet, os lee zha thibka yelaaz zha Jesucrist, ne nkeno zha yalnkelaaz, ne gak zha, zha nambi lo Diox taxal ndobloy.