11
Güjt Lazr
1 Guyu tijb bénragxuu, brii lajman Lazr. Laaman con re bizanman Li con Mart, na̱j ladx reeman Betania.
2 Abiꞌ Li bizan Lazr, laam baroob perfum guiaꞌ Jesús abiꞌ bacwiidximin con guidxguijquim.
3 Dxel grop bël reem guxhaal ruson loj Jesús, rëb reem:
―Dad, ragxuu xmiwil Lazr.
4 Chi biguiejn Jesús zian, rëbaman:
―Guialguijdx guin ad zëëdtan par gugüjtan, zëëdan din gac guguiaa bejn xguialrniabee Dios në par guguiaa reeman xguialrniabee Xiꞌn Dios.
5 Majsi rën daꞌt Jesús Mart con Li në Lazr,
6 per chi cwaꞌman ruson ragxuu Lazr, sta goglaaman zatioꞌp dxej lod zaꞌman.
7 Dxel rëbaman loj ree xbejnman:
―Yoꞌ ree niz Judea zatijb.
8 Abiꞌ rëb reeman lojman:
―Mextr, ad wayajct xchej guyën ree bén zojb niz ni nucaaguiaj reeman lüj. ¿Abiꞌ chel ni zatijb ya?
9 Dxel rëb Jesús:
―Lëjt ragbee guial chiptioꞌp hor yuꞌ tibdxej. Abiꞌ bén rza radxe, achet rirejl guiaꞌman, din yuꞌ bajl rusni loj guidxliuj guie.
10 Per bén rza guxhin, yuꞌ ni rirejl guiaꞌman, din achet bajl guin rajpaman.
11 Rëb tëë Jesús loj reeman:
―Ma nagaꞌyëjs dux miw ree Lazr, per chicwëënan laax.
12 Dxel rëb ree xbejnman:
―Dad, bal naayëjsix, rën guiëban yayajquix.
13 Per ni rëb Jesús rën guiëban guial ma güjt Lazr, guiáad ree xbejnman gunaladx reeman rëbaman nagaꞌyëjsizix.
14 Dxel bagojn Jesús laa reeman, rëbaman:
―Ma güjt Lazr.
15 Rabaan por lëjt guial ad guzutan ni din chililadxidi naj. Yan, yoꞌ ree yugnaj reex.
16 Dxel Tumajs, bén rniee reeman cwajch, rëbaman loj los demazri xbejn Jesús:
―Yoꞌ ree yunëꞌ reeman, din lod guiëtaman, yayëjtnëꞌ reeman.
Jesús na̱j bén rusban bejn runee tëëman guialnaban
17 Chi bidxin Jesús Betania, ma gojc tajp dxej biguieꞌch Lazr.
18 Betania guin rayaꞌnan gajxh Jerusalén, ziꞌct choon kilometro.
19 Abiꞌ zien ree bén Israel bignaj Mart con Li din yaguꞌ reeman luxdoo reem guial güjt bizan reem.
20 Chi gogbee Mart ma zëëd Jesús gajxh, briim bigchaaglojm laaman, guiáad Li bayaꞌnm lënü.
21 Dxel rëb Mart loj Jesús:
―Dad, bal nizujl guie, ad ziant niëjt da zanan.
22 Per naj ragbee guial niꞌqui yan zunee Dios ni guiniabil lojman.
23 Dxel rëb Jesús:
―Naj rni yaban bizanl.
24 Badxiꞌmin rëbim:
―Ma qui ragbeen, yabanm dxej yaban gra ree bengüt. Chi guidxin dxej güün xguialguxtis Dios.
25 Abiꞌ rëb Jesús:
―Naj na̱j bén rusban ree bengüt rudë tëën guialnaban loj ree bejn. Bén chililadx naj, majsi guiëtaman, per zajpaman guialnaban loj Dios.
26 Guiáad gra bén naban rliladx tëë naj, zajpaman guialnaban loj Dios. ¿Rliladxil ni canin lüj ya?
27 Dxel rëbim lojman:
―Rliladxanan Dad. Rliladxan lüj na̱j Cristo, Xiꞌn Dios, bén na̱j guiꞌt loj guidxliuj.
Biin Jesús roꞌ xbaa Lazr
28 Chi gulox rëb Mart zian, dxel bignee xbëlim Li, rëbim ralan:
―Ma biꞌt Jesús, abiꞌ caneeman lüj.
29 Biguiejnzi Li zian, laa bisugajquim bigchaaglojm Jesús.
30 Abiꞌ Jesús gadzaman chuꞌ luguiedx guin, sta zaꞌman lod bigchaagloj Mart laaman.
31 Guiáad ree bén Israel zojbnë Li raguꞌ reeman luxdoom, chi baguiaa reeman cari daꞌt bisum zëm, binal reeman laam. Gunaladx reeman roꞌ xbaa Lazr ziguiaanm.
32 Chi bidxinm lod zaꞌ Jesús, bazuxibim lojman rëbim:
―Dad, bal nizujl guie, ad ziant niëjt da zanan.
33 Chi baguiaaman roon Li con ree bén Israel nal laam, dád gognaa luxdooman guyu naya tëëman.
34 Dxel gunabdiidxaman rëbaman:
―¿Ban biquieꞌchidi laax?
Abiꞌ rëb reeman:
―Dad, guda nial din guguiaal.
35 Dxel biinman.
36 Abiꞌ rëb ree bén Israel guin:
―Gol baguiaa nial dád guyënman laax.
37 Per yuꞌ reeman rëb:
―Bén guinan baxhal guiaaloj tijb bén ad ranit loj. Yan, ¿niche niajc nüjnman yaꞌn chitëë niëjt Lazr?
Basban Jesús Lazr
38 Dád guyu naya luxdoo Jesús stijb, chi gubigaman roꞌ xbaa Lazr. Najn tijb guiajbiliaa, nadaꞌcw tijb guiaj roꞌn.
39 Dxel rëbaman:
―Gol biquied guiaj guin.
Per Mart, bizan xingüt guin, rëbim:
―Dad, ma rliaam nadxuudx, din ma gojc tajp dxej ni gütim.
40 Badxiꞌ Jesúsan rëbaman:
―¿Nid rnin ya, bal rliladxil, guguiaal xguialrniabee Dios?
41 Dxel bisüd reeman guiaj guin. Zianz gules loj Jesús xanyabaa rëbaman:
―Dad, quixtëë lüj guial ma bacaagdiajguil ni rnin.
42 Naj ragbeechaaw guial zianczi rucaagdiajguil ni rnin. Per rnin zian por ree bén rigaꞌ guie, din chililadx reeman guial lüj guxhaal naj.
43 Chi gulox rëbaman zian, dxel guridxaꞌman rëbaman:
―¡Lazr, barii yagaj!
44 Dxel barii Lazr lën baa guin nalüüb vend yaax con guiaꞌx, guiáad lojx nayaaw lajd. Dxel rëb Jesús loj reeman:
―Gol baxhiequix, gol baslaax yaguiajx.
Bayaꞌn reeman diidx xhienaag guiniaaz Jesús
(Mt. 26:1‑5; Mr. 14:1‑2; Lc. 22:1‑2)
45 Dád zien ree bén binal Li bililadx Jesús, guial baguiaa reeman milagr beenman.
46 Per yuꞌ reeman bicojn bénfarisew ree ni been Jesús.
47 Dxel bénfarisew ree në ree bixhioz rniabee, bachajg lasaꞌ reeman con los demazri ree guxtis, rëb reeman:
―¿Xhienaag yaguieen ree yaꞌn, din dád zien milagr cayüjn xin guin?
48 Bal yadëëd ree mod, graczi bejn guililadx laax, dxel guxtis Rom ree guidganijt reeman dux yadoo ree në dux nacion ree.
49 Per loj reeman yuꞌ bén la Caifás, bixhioz zojbloj rniabee loj ijzsii, rëbaman loj reeman:
―¿Nid ragbeedi ya,
50 nid rigniaꞌ tëëdi ya, zagdxe na̱j guiët tijbzi bejn por gra bén Israel, luar nit dux nacion ree?
51 Per Caifás guin ad ni naladxtzaman rëbaman. Guial najman bixhioz zojbloj rniabee loj ijzsii, zeel badëëd Dios ni guneeman, guial guiët Jesús por gra ree bén Israel.
52 Abiꞌ ad por laatzi reeman, par gac reeman tijbzi con gra ree xbejn Dios, bén rigaꞌ ree guidib guidxliuj.
53 Zeel diizd dxejzii bayaꞌn reeman diidx gugüjt reeman Jesús.
54 Zianan zeel ad contzi rulüülojtraman loj ree bén Israel, bazaman yagaj ziaman guiedx la Efraín, najn gajxh yujbidx, yagaj guzunë ree xbejnman.
55 Dxejzii ree ma zidyob pascw, lanij rüjn ree bén Israel, dád zien ree bén guiedx ree zë Jerusalén din güün reeman ziꞌc na̱j xcostumbr reeman par gac reeman naya loj Dios chi gad pascw gal.
56 Dxel raguiil reeman Jesús, abiꞌ rniabdiidx loj lasaꞌ reeman lën yadooroꞌ Jerusalén, rëb reeman:
―¿Xhie nadi? ¿Ziꞌtaman lanij ya o ad ziꞌttaman?
57 Bénfarisew ree con ree bixhioz rniabee, gunabee reeman bal chutëëz bén ragbee ban zaꞌ Jesús, gugojnman din chileꞌ guiniaaz reeman laaman.