14
Dij ni roḻ te gayuu tiubitajp miḻ
1 Che bahuiä stee, bahuiä suga' Xiil xten Dios yejc dajn ni laa Sión. Suganäjni te gayuu tiubitajp miḻ bejṉ nani caj lo cuajreni laj Xiil näj laj Xtadni.
2 Biejn diagä rubej xhaguibaali, rubeduxh, riejnni si'c rubej xhidajl gueuro, näj te guziro; riejnzani si'cni riejn che cayoḻ xhidajl bejṉ ni roḻ arp.
3 Cayoḻreni te dicoob nez loj troṉ cadro rbej nani rnibee, näjza nez loj guidap reni najc si'c man ni nabajṉpac, näjza nez loj rebeṉgool. Rutliidi gujc bisieeddi dijga, xtebtis tegayuu tiubitajp miḻ bejṉ nani guḻaa lo rebeṉ guedxliuj.
4 Reniguiire najc renani gajd xhiṉ con gunaa; nicla tejreni di niesnäj te gunaa, najcreni beṉ dxan. Laareni rinajlreni Xiil xten Dios cadrotis sääni. Redee guḻaa lo rebeṉ guedxliuj si'c te gojn lo Dios näjza lo Xiil xten Dios. Gojnre najc si'c gonganid ni rudeed bejṉ xten te cose'ch.
5 Nicla tej didx-xhii di guirii ro'reni, sa'csi xhetliidi xtojḻreni, nayareni suga'reni nez loj troṉ cadro rnibee Dios.
Rediidx nani bazule' jioṉ rexangl Dios
6 Dxejcti bahuiä loj stee xangl Dios, rutajtni nez galäii xhaguibaa, siädnäni diidx ni najc par tejpas xten Dios te gusule'nini loj rebeṉ guedxliuj, guiraa lo reguedxro, guiraa lo reguedxbäz, loj rebeṉ ni najc garen-garen ṟaz, nani rnii garen-garen xtiidreni.
7 Dipduxh guniini, räjpni:
―Coḻguidxejb Dios, coḻguiliä'p xpala'n Dios sa'csi abidzujṉ oṟ gunni yäḻguxhtis guiraa rebejṉ. Coḻguzuxhijb loj nani benchee xhaguibaa, näjza guedxliuj, näjza nisdoo, näjza cadro rliejn nis.
8 Dxejcti siädnajl stee angl nani canii:
―Abiajb, abiajb guejdxroga nani laa Babilonia, sa'csi baquiilni guzojz guiraa reguejdx xten guedxliuj xcuent xcäḻ-latsiajni, xcuent dojḻ ni bejnni guideb lagaa; najcni si'c reni rä' nejp.
9 Dxejc biädnajl ni riojṉ xangl Dios, dipduxh guniini, Räjpni:
―Palga yu' chu bejṉ guzuxhijb loj manroga o loj banäjb ni najc si'c manroga, o xcäjbni xca'ni xseen manro lo cuajni o lo ṉaani,
10 sidxechduxh Dios lojni, di xcäḻguxhtisduxh Dios tedcaj lojni. Sidejdpacni trabajwduxh neṉ balro näjza azufr nez loj rexangl Dios näjza nez loj Xiil xten Dios.
11 Luxh gujxh xten reni cayejc sä'p nez lojreni guixe-guixee par tejpas. Digacdi gusilajzreni dxej-yääl, renani guzuxhijb, reni gojṉ manroga näjza reni gojṉ banäjb ni najc si'c manroga, chutisza ni rca' seen xten lajni.
12 Ni'cni renani huililajz xtidx Dios, reni rusoobza xtidx Dios, ni rinuutis lo xnezyuj Jesucrist, nanab di guidxajgreni.
13 Biejn diagä xse' te ni caniini loä xhaguibaali:
―Scree bacuaa: “Chicbaa rebejṉ ni guet ṉajli nani rililajz xtidx Jesucrist.” “Guliini”, naj Sprit Dxan xten Dios: “Te gusilajzreni, na'cru gunreni dzuun, sa'csi anancheenu xhi dzuun bejnreni.”
Yäḻnasa'c ni rudeed guedxliujre
14 Dxejcti bahuiä tre' te bänol, loj bänolga sobga' te ni najc si'c Xi'n Dios ni gujc Niguii. Yu' te coroṉ ganaxduj oor yejcni, dxejcti ṉaani ca'ni te guiboz ni caduxh ro'ni.
15 Dxejcti birii te xangl Dios loj xquidoo Dios, dipduxh caniini loj ni sobga' loj bäjga, räjpni:
―Basäḻ xquibozlu, batiuug, te batie' yäḻnasa'c, sa'csi agojl oṟ guire' yäḻnasa'c, guideb guedxliuj aguyajḻni.
16 Dxejcti nani sobga' lo bäjga basniibni xquibozni, batiuugni yäḻnasa'c ni caj lo guedxliujre.
17 Dxejcti stee xangl Dios birii neṉ guidoo ni yu' xhaguibaa, ca'zani te guiboz ni caduxh ro'ni.
18 Dxejcti birii stee xangl Dios nez loj piändxan xten Dios. Laani rajpni yäḻrnibee lo balro. Dipduxh guniini, räjpni loj ni ca' guiboz ni caduxh ro'ni, räjpni:
―Basäḻ xquibozlu nez ni' reyaguub, batiuug guiraa reresim̲ uub ni yu' lo guedxliujre, sa'csi aguyajlreni.
19 Dxejc batiuug anglga guiraa reresim̲ uub ni yu' lo guedxliujre nalajznu rebeṉguijdx, basäḻnireni neṉ tanc cadro guläjreni yejcni sa'csi rdxechduxh Dios lojreni.
20 Dxejcti baläjreni yejc reuub nez orii te guejdx. Biriiduxh rejn yejcreni, gutiäs rejnga, bidzujṉ rejnga ro'li recabaii, gujcni si'c che riu' nisro gueuu, biäjtni si'cti choṉ gayuu mil metr guideb gabi cadro baläjreni yejc reuub.