3
Más tsak Jesús lo Muisés
1 Rë go wech no bizan, men che'n Jesukrist nela da ga', bitsila go cho nak Jesukrist: lo Me mika'b Dios di'zh Me widi'zh che'n Dios lo be, mbaino nak Me ngulëi' ro lo be, Me kwa'n nidi'zh be ñila be.
2 Jesukrist mile' rë kwa'n nzhab Dios lo rë zhi'n nazhon kwa'n mika'b Dios lo Me, nela mile' Muisés rë kwa'n nzhab Dios lo xa' lo rë zhi'n nazhon kwa'n mizo Dios xa' lo rë men Israel, xa' ngok men che'n Dios.
3-4 Nela rë yo', por tu men ngokxao'we; rë kwa'n nzho, por Jesukrist ngokxao'we, no yub ska Dios Me. Kuze', ngok xigab che'n Dios, más ñal di'zh men wen por Jesukrist ke por Muisés, nela nak tu men xa' nichao' yo'; más tsak xa' ke yo' kwa'n nichao' xa'.
5 Mile' Muisés rë kwa'n nzhakla Dios, dub miwi' xa' lo rë men che'n Dios, nela tu mos xa' nile' kwa'n nzhab xa' nile' mandad lo xa'. Por mbin Muisés ro' Dios, mile' Dios midi'zh Muisés kwa'n laore le' Dios por Jesukrist.
6 Per se'gaka kile' Jesukrist kwa'n nzhakla Dios, dub kikina Me rë men che'n Dios, nela xga'n galo tu men, lë' xa' nikina más rë wech win xa'. No be nak wech win Jesukrist, lë' Me nikina be, chi lë' be se'gaka yila Me, di'zh bei lo rë men, lë' Me yë'd dub kimbëz be yë'd Me.
Nagakt go nayi'lazh; bin go ro' Dios
7 Kuze', nela xmod nzobni' ka lo Yech che'n Dios:
Chi lë' go gon kwa'n ne Dios nal,
8 nagakt go nayi'lazh, nela pla xa' nkizë le'n yuo bizh.
Nguzenbe' bixa' Da (miwi' bixa' xmod nak Da) no mikixian bixa' Da;
9 ze' plo nguzenbe' rë xuz go Da.
No ter une bixa' rë kwa'n nazhon milen za cho' li'n xid bixa'.
10 Kuze', dub niyi'xian Da kun rë men ze',
nzhapa lo bixa':
“Dox zit nzo xigab che'n go lon,
no gat nzhaklat go, li'be' go nez Da.”
11 Orze' dub niyi' Da lo rë men ze',
midizha por mis Da:
“Nayot zhë yo bixa' plo kinun,
par xax bixa' lo rë kwa'n ngwazha bixa'.”
12 Kuze', rë go wech no bizan, bikina go go, par nayo rë xigab gat lë' yek go, napa' la' go Dios Me ngwayila go, no Dios Me kinu yalnaban par dubta'.
13 Más wen zilita' haxta plo gak, gaknu go wech tu go kun xtu go, par nagak go men nayi'lazh, xa' gat nzhont ro' Dios, rë xa' nix laka nile' rë kwa'n gat lë', rë kwa'n nayi' par lo Dios.
14 Per chi zo be wen lo widi'zh che'n Dios kwa'n ngwayila be dizde or galo, orze' lë' be gal kwa'n nazhon kwa'n kinu Jesukrist par be.
15 Nela nzobni' ka lo Yech che'n Dios:
Chi lë' go gon kwa'n ne Dios lo go nal,
nagakt go nayi'lazh nela rë men nguzenbe' Da,
no miki'xian bixa' Da.
16 No nal, ¿cho rë xa' mbin widi'zh che'n Dios per ngok nayi'lazh bixa'? Gat rë xa' ngulo' Muisés lazh men egiptoi, rë xa' ze' ngok sa'.
17 Mbaino, ¿cho lo rë xa' miyi' Dios dub cho' li'n? Gat lo rë xa' mile' kwa'n gat lë' lo Diose, kuze' ngut bixa' le'n yuo bizh.
18 No, ¿par cho rë men nzhab Dios: Nayot bixa' plo kinu Dios yo bixa' par gax ga' yë'd laxto' bixa' lo rë kwa'n nizak bixa'? Rë xa' nangont ro' Diose.
19 No nane ka be, nangayot ka bixa' plo kinu Dios ngaxax bixa' lo rë kwa'n nizak bixa', por nangon bixa' ro' Dios.