12
Ni rguixogueꞌn cabëꞌ reyaꞌalaꞌ hue benꞌ quie Diuzi, benꞌ naca laꞌiya
1 Naꞌra, bichaꞌ, babeyëchiꞌlaꞌadyiꞌ Diuzi leꞌe. Quie lenaꞌ du guicho du laꞌadyaꞌ iniaꞌ leꞌe reyaꞌalaꞌ tzesanle cuinle lao Diuzi, huele cuinle ca gun quie Diuzi ta biyeyula yelen. Gacale benꞌ naca laꞌiya, canaꞌ yeyulaꞌadyiꞌ Diuzi leꞌe. Canaꞌ reyaꞌalaꞌ huele tzionlaꞌadyiꞌle Diuzi.
2 Bireyaꞌalaꞌ yenaole pensari mala quie ja benꞌ nitaꞌ lao yedyi layu. Reyaꞌalaꞌ yetzaꞌle pensari quiele, yenaole xneza Diuzi cuenda yetzaꞌnan quiele yugulu ca ruele. Canaꞌ inezile ca reꞌen Diuzi huele, porque ca reꞌen Diuzi huero nacan ta gacalën raꞌo, nacan ta yeyulaꞌadyiꞌnëꞌ raꞌo, nacan tadyaꞌa gula.
3 Yelaꞌ benꞌ huen quie Diuzi ulionëꞌ nëꞌëdiꞌ ta uzioñeꞌedaꞌ leꞌe. Lenaꞌ iniaꞌ leꞌe bireyaꞌalaꞌ huele cuinle benꞌ z̃e. Du guicho du laꞌadyiꞌle reyaꞌalaꞌ huele pensari dyaꞌa según cabëꞌ nue Diuzi quie quiele barue quiele xtiꞌidzaꞌnëꞌ.
4 Porque cani nacan: Tuzi cuerpo quiero naca, pero taz̃e netzaꞌ tu tu parte quien, taz̃e netzaꞌ dyin quie quien.
5 Lëscanꞌ canaꞌ naca quie raꞌo benꞌ nao xneza Jesús. Laꞌacazi nacaro benꞌ zë, nacaro tu cueꞌ benꞌ nacalë Cristo tuz̃e. Laꞌacazi netzaꞌ dyin quie Diuzi huero quie quiero, naca yuguluro tuz̃e.
6 Netzaꞌ ta banegun Diuzi quiero tu turo. Reyaꞌalaꞌ huero dyin dyaꞌa según ta banegun Diuzi quiero tu turo. Chi banegun Diuzi quiero uzioñeꞌero benëꞌ con cabëꞌ rna diꞌidzaꞌ laꞌiya quienëꞌ, naꞌra lenaꞌ reyaꞌalaꞌ huero según cabëꞌ nue Diuzi quie quiero barue quiero xtiꞌidzaꞌnëꞌ.
7 Chi banegun Diuzi quiero gacalëro benëꞌ, naꞌra reyaꞌalaꞌ gacalërojëꞌ dyëꞌëdi. Chi neziro uzioñeꞌero benëꞌ con cabëꞌ rna xtiꞌidzaꞌDiuzi, canaꞌ reyaꞌalaꞌ huero.
8 Chi neziro hueꞌro benëꞌ diꞌidzaꞌ z̃elaꞌadyiꞌ, canaꞌ reyaꞌalaꞌ huero. Chi de dumi quiero, reyaꞌalaꞌ gacalëro benëꞌ, bihuero cuenda chi yeyuejëꞌ laohue. Chi neziro udzeꞌro xnezi bi dyin hue ja benëꞌ, canaꞌ reyaꞌalaꞌ huero du guicho du laꞌadyiꞌro. Chi neziro yeyëchiꞌlaꞌadyiꞌro benꞌ yëchiꞌ, canaꞌ reyaꞌalaꞌ huero du guicho du laꞌadyiꞌro, bihuerojëꞌ stuꞌ.
Ni rguixogueꞌn cabëꞌ reyaꞌalaꞌ hue benꞌ nao xneza Cristo
9-10 Bireyaꞌalaꞌ idyëꞌëro laguedyiro de ladzazi, pero du guicho du laꞌ adyiꞌro reyaꞌalaꞌ idyëꞌëro benꞌ bichiro, benꞌ nacalëro Cristo tuz̃e. Puro tadyaꞌa reyaꞌalaꞌ huero, bihuero tamala. Reyaꞌalaꞌ gaparo laguedyiro balaꞌana yuguluro.
11 Bireyaꞌalaꞌ huero yelaꞌ huëdi, denꞌ dulaꞌadyiꞌro reyaꞌalaꞌ huero dyin. Lëscanꞌ dulaꞌadyiꞌro reyaꞌalaꞌ huero cabëꞌ mandado reꞌen Diuzi huero.
12 Reyaꞌalaꞌ suro contento cuezaro dyëꞌëdi dza yeziꞌ Diuzi raꞌo. Reyaꞌalaꞌ siꞌz̃ero biidzaꞌro cati raca zëdi quiero. Bireyaꞌalaꞌ usanro ulidzaro Diuzi.
13 Reyaꞌalaꞌ gacalëro laguedyiro benꞌ nao xneza Cristo, benꞌ bide quie. Reyaꞌalaꞌ gapachiꞌro nu benꞌ zaꞌ z̃an yuꞌu quiero.
14 Reyaꞌalaꞌ yëbiro Diuzi huelaꞌiyanëꞌ nu benꞌ zaꞌ rdila rnë len raꞌo. Bireyaꞌalaꞌ udzeꞌdeꞌro benëꞌ.
15 Reyaꞌalaꞌ yedaohuelëro laguedyiro cati raca tadyaꞌa quieyaquëꞌ. Reyaꞌalaꞌ yeyëchiꞌlaꞌadyiꞌlëro laguedyiro cati raca tazëdi quieyaquëꞌ.
16 Reyaꞌalaꞌ huero tuz̃e yuguluro. Bireyaꞌalaꞌ yez̃ëꞌro laguedyiro. Bireyaꞌalaꞌ huero yaladyiꞌ benꞌ yëchiꞌ. Bireyaꞌalaꞌ huero cuinro benꞌ z̃e.
17 Bireyaꞌalaꞌ gacalëro lëbi benꞌ mala. Reyaꞌalaꞌ huero bala tzuꞌulëro laguedyiro dyëꞌëdi.
18 Por tu parte quiero, huero bi huero tacuenda nitaꞌlëro yugulu benëꞌ dyëꞌëdi, ta bibi zëdi gataꞌ.
19 Naꞌra bichaꞌ, nedyëꞌëdaꞌ leꞌe, iniaꞌ leꞌe bireyaꞌalaꞌ yeyuero laohue quie benꞌ mala. Naoyubi Diuzi bi huenëꞌ quie benꞌ mala. Canaꞌ rguixogueꞌn lëꞌë guichi laꞌiya quie Diuzi de que nacan cuenda quie Diuzi huenëꞌ benëꞌ castigo, cala raꞌo. Canaꞌ una Diuzi.
20 Lëscanꞌ una Diuzi de que chi rdue benꞌ rudie raꞌo, reyaꞌalaꞌ hueꞌrojëꞌ ta gaojëꞌ. Chi rbilijëꞌ, reyaꞌalaꞌ hueꞌrojëꞌ ta yoꞌojëꞌ, porque chi huero canaꞌ, huacabëꞌjëꞌ nacaro benꞌ huen yedueꞌjëꞌ. Canaꞌ una Diuzi.
21 Bihueꞌro lato hue tamala raꞌo gan, reyaꞌalaꞌ huero gan lao tamala, huero puro tahuen.