3
1 Leewe, ru ba di ñaḻ ntibdadzyr noꞌ, beeiydí ptzoo noꞌ diidz biaꞌn noꞌ noꞌzy ciuda-Atenas,
2 no pshahl noꞌ dirman nó Timoteu ni nu lo xtziiñ Dioz no tohzy rigyuno noꞌ meññ xtiidz Crist no leeme. Güya me ru nu laꞌd lehdy gacno me laꞌd no ni ba bylíladzy laꞌd no lehdy ma gyxilyno laꞌdu,
3 lehdy di gyrugan ndruhty lahd laꞌd por gyre ni nadz yahc ni gadedy laꞌd. Ba nanndoo laꞌd gyre nó rahp de ni tedy zâ nirieꞌ yahc.
4 No dze-nu ziaꞌr noꞌ no laꞌd, ra noꞌ laꞌd ni nadz yahc tedy gyre nó; no naꞌ, ni ba nann laꞌd, leexu ba gayahc naabz mod-ra noꞌ laꞌd.
5 No leezuwe, ru ba di ñaḻ ntibdadzyraꞌ, pshaalaꞌ diidz lehdy gannaꞌ xnahc nu laꞌd de ni bylíladzy laꞌd, duhn nquihly bêndzab laꞌd ntzoo laꞌd ni nehx riuꞌladzy Dioz, no baty ñaꞌn dziiñ ni ptzoo noꞌ xleꞌ.
6 Per naꞌ ba gubyguiat Timoteu, byruu me ru nu laꞌd Tesalónyc. Byxilyno noꞌ bie me diidz dlo noꞌ de ni nehx rrugan laꞌd de ni ba bylíladzy laꞌd no de ni ndzi laꞌd meññ. No ne me rxihly laꞌd hor-ritsêlou laꞌd noꞌ, no ne me modni riuꞌladzy laꞌd güieꞌ laꞌd noꞌ mod-riuꞌgahcdadzy noꞌ güieꞌ noꞌ laꞌd.
7 No leezuwe, rman, lóhgni gyrehzy gazahc noꞌ no ni nadz ni gadedy noꞌ, modni rxihly noꞌ hor-gunn noꞌ nehx rrugan laꞌd de ni rlíladzy laꞌd Dioz.
8 Beeiy to guîlmbañ-coby leeu par noꞌ, porni ba nann noꞌ nu laꞌd zaꞌgndzi no Crist ni rtzoo mdad.
9 ¿Biahx mód‑e ndee noꞌ xquix Dioz por laꞌd, mod-racladzyu por gyre mod-risshihly laꞌd noꞌ lo Dioz?
10 Dzé no guiaal rnab noꞌ lo Dioz gdee me lsenzy güieꞌ noꞌ laꞌd, lehdy gacno noꞌ gyzaꞌ ni gayaadz ziaꞌr de ni ba galíladzy laꞌd.
11 Rnab noꞌ gacno Dioz gahc ni nac dTad nó, no Jesucrist ni rtzoo mdad nó, lehdy dzictixlo noꞌ laꞌd.
12 Rnab noꞌ lo Crist gacno me gyniꞌzy laꞌd de ni guîntzi saꞌ laꞌd ma xroꞌ no zegahcu no nyug, beeiy gahc mod-ndzi noꞌ laꞌd.
13 No rnab noꞌ gacno Crist xguîlmbahñ laꞌd, lehdy tzu laꞌd nunzy par leeme no di zdzial mbehty ni nahcsy chehsh laꞌd lo Dioz ni nac dTad nó, dze-Jesucrist ni rtzoo mdad guiaad me no gyre xmeññ me.