21
Jesúz, bwieꞌ gahdzy lahd xmeññ me leeme
1 Bylux niwé, Jesúz gaññ bydzihñ gyzac ru nu xmeññ me coo nisdo-Tiberias, no guhcu mod-rieꞌ:
2 Nuty Simoṉ-Pedr, tohzy no Tomáz, ni ra yâme lee Dídimo, no Natanael, xguiedzy me le Caná ni nu lo ṟegioṉ-Galilea, no xiiñ yahc Zebedeu no schohp xmeññ Jesúz.
3 Ra Simoṉ-Pedr leeyâme:
―Naa tzan dzigynaazyaꞌ mbaḻ.
Ra yâme leeme:
―Zehg‑e tzo noꞌ no lii.
Güyuꞌ yâme leññ to barcü no za yâme; per guial-caḻ di nnahzy yâme mbehty mbaḻ.
4 Hor-ba zidtzu byniꞌ, bwieꞌ yâme Jesúz zu coo nisdoo, per nehx bzaclo yâme bâḻ Jesúz leeme.
5 Were ra Jesúz leeyâme:
―Shiꞌñ, ¿ba günahzy laꞌd mbaḻ la?
Ra yâme leeme:
―Yac, dgueññ gynahzy noꞌ mbehty maꞌ.
6 Ra Jesúz leeyâme:
―Lâ gráḻ xgueshmbaḻ laꞌd lad-drech de barcü lehdy gynahzy laꞌd leemaꞌ.
No ze ptzoo yâme. Luxu ba di raḻ gboo yâme xgueshmbaḻ yâme, porni xtahl mbaḻ nu leññu.
7 To xmeññ gahc Jesúz, ni ndzi me lee, ra me Pedr:
―¡Jesúz‑e, leeme ni rtzoo mdad!
Scâsy bieññ Simoṉ-Pedr Jesúz leeme, bihtz shab-xtziguia me (porni güloo meu leññ barcü), no cüchahs me güyuꞌ me lo nzeꞌ.
8 No zrieñ yâme bistzihñ barcü coo nzeꞌ, no gazûbyñu yâme gueshmbaḻ ni bydzeꞌ mbaḻ leññ; no de lo nzeꞌ ru naḻ barcü ni nu yâme leññ, rahpu beeiy diby gayuu metr par gydzihñu lo yudahñ.
9 Ru biaht yâme lo yudahñ, bwieꞌ yâme ba dxie gue no nash mbaḻ gayagy, no dxie paṉ.
10 Ra Jesúz leeyâme:
―Lâ guidno chohp tzonn mbaḻ ni leer günahzy laꞌd.
11 Güyehpy Simoṉ-Pedr leññ barcü no gazûbyñu me gueshmbaḻ ni nu mbaḻ leññ lo yudahñ, bydzeꞌu de mbaḻ-roob, diby gayuu cincuentaytrez maꞌ, no nîcze xtahl maꞌ, per nehx bygaax gueshmbaḻ ni nu yâmaꞌ leññ.
12 Ra Jesúz leeyâme:
―Lâ te, gagü-rsily laꞌd.
No ndruhty de leeyâme nehx ptzoo par nnabdiidz dxu leeme, porni nann yâme Jesúz‑e leeme ni rtzoo mdad.
13 Luxu gübigy Jesúz, cuaꞌ me paṉ no güdiiz meu, cuaꞌ xmeññ me, no zegahc güdiiz me mbaḻ.
14 Nirieꞌ we ni bionn vuelt Jesúz gaññ bydzihñ ru nu xmeññ me bylux de ni gübahñ me de lahd mînguty.
Ganino Jesúz Simoṉ-Pedr
15 Bylux güersily yâme, ra Jesúz Simoṉ-Pedr:
―Simóṉ, xiiñ Jonáz, ¿ndziy naa mazy de ni ndzi gyre meññ-rieꞌ naa la?
Ra Pedr leeme:
―Lii nanniꞌ, Señor, ndzin lii.
Ra Jesúz leeme:
―Bwieꞌ dmeññ yahcaꞌ; zidguiahc yâme beeiy xiily.
16 Gyzac ra Jesúz leeme:
―Simóṉ, xiiñ Jonáz, ¿ndziy naa la?
Ra Pedr leeme:
―Lii nanniꞌ, Señor, ndzin lii.
Ra Jesúz leeme:
―Bwieꞌ dmeññ yahcaꞌ; zidguiahc yâme beeiy xiily.
17 Ni bionn vuelt ra Jesúz leeme:
―Simóṉ, xiiñ Jonáz, ¿ndziy naa la?
Güyuꞌ Pedr trixd, porni ba tzonn vuelt gaya Jesúz bâḻ ndzi Pedr leeme. Were ra Pedr leeme:
―Señor, lii nanniꞌ gyreu; lii nanniꞌ ndzin lii.
Ra Jesúz leeme:
―Bwieꞌ dmeññaꞌ; zidguiahc yâme beeiy xiily.
18 Gapyaꞌ lii ni uli, dze-miꞌñ ziaꞌ lii ruhtz shabiꞌ tohguiꞌ no riay rutisy neꞌy; per dze-ba mînguhl lii, stzihly xihcuiꞌ, no zrieñ dxu iguhtz shabiꞌ no tziyno lii ru nehx riuꞌladzyiꞌ.
19 Nirieꞌ günii Jesúz, gaya me Pedr bia mód gaty lehdy Pedr, no xguîlguhty me, cuguia me Dioz. Bylux günii Jesúz ze, ra me Pedr:
―Náḻiꞌ naa.
To xmeññ Jesúz ni ndzi me lee
20 Hor-bidzguiat lo Pedr, bwieꞌ me ziaad sto xmeññ Jesúz ni ndzi Jesúz lee, ni gürie gahc coo Jesúz ru güdagü-tzie yâme últim guiaal, no ni gu Jesúz: “Señor, ¿dxu leeme ni gdee lii lo ña meññ-rdziadzyno lii?”
21 Pedr, hor-bwieꞌ leeme, ra me Jesúz:
―Señor, naꞌz mpyquie-rieꞌ ni náḻ dchehsh nó, ¿bia mód gac me?
22 Ra Jesúz leeme:
―Bâḻ gacdadzyaꞌ guiaꞌn me no nehx zehty me xtâ glo guibyguiataꞌ la, nehx rahpiꞌ de ni ganniꞌ leeu. Mazyg lii, náḻiꞌ naa.
23 Nirieꞌ ni ra Jesúz Pedr gunn zrieñ xmeññ yahc Jesúz, per ba gydze mód bieññ yâmeu; nlâdzy yâme günii Jesúz‑e, ra me Pedr, nehx zehty mpyquie-wé. Per nehx günii Jesúz ze, mazyg ne me: “Bâḻ gacdadzyaꞌ la, guiaꞌn me no nehx zehty me xtâ glo guibyguiataꞌ, nehx rahpiꞌ de ni ganniꞌ leeu.”
24 Meññ-rieꞌ, leegahcme we xmeññ Jesúz ni gadee diidz de nirieꞌ yahc, no bzaa meu lo guehtzy. No nann noꞌ ni uli ni rnii me.
25 No zegahc nur xtahl ni ptzoo Jesúz; bâḻ gyreu ñaa lo guehtzy to por tohbyu, zoꞌ naa nehx ñuꞌ lgar gydo lo guiedzylie ru ñuꞌ gyre guehtzy ni ñaau lo.