17
Ndzieeby bâḻ meññ guiahb lo guîlquie
(Mt. 18:6-7, 21-22; Mr. 9:42)
1 Ra Jesúz xmeññ me:
―Nehx ziaadz ni yquihly meññ par guiatrxan; per ¡baazy dzii de meññ ni por xtoḻ me zrieñ ctzoo guîlquie!
2 Beeiydí nguꞌ meññ duu yañ me, no nlihby yâme to xguie-ro molin lou no nráḻ yâme leeme leññ nisdoo; niwéhdy‑e ñahc meññ ni por xtoḻ guiatrxan to ni leer bylíladzy dtiidzaꞌ no zidguiahc beeiy mbiux.
3 ¡Lâ güieꞌ laꞌd laꞌd gahc!
’Bâḻ to xirmaniꞌ ctzoo guîlquie contr lii la, güluꞌ xguîlriehñ me lehdy di ctzoor meu. No bâḻ ga me csiaaḻladzyiꞌ ni ptzoo me lii la, psiaaḻladzyiꞌ leeu.
4 Nîcze ctzoo me guîlquie contr lii gahdzy vuelt to dzé, per bâḻ to to vuelt guiaad me, ga me lii: “Rnabaꞌ psiaaḻladzyiꞌ ni ptzon lii”, were psiaaḻladzyiꞌ leeu.
Ni beeiy ntzoo meññ bâḻ nlíladzy yâme nîcze uxiee
5 Ra apóstl yahc Jesúz:
―Lii ni rtzoo mdad, gucno noꞌ ma gylídadzy noꞌ.
6 Were ra me leeyâme:
―Bâḻ laꞌd nlíladzy laꞌd nîcze doozy, beeiy ña laꞌd to yag-duug ni zu neꞌ: “Bylahdziꞌ de ru dziibiꞌ, no güya güdzib lo nisdoo”, no nzoobu xtiidz laꞌd.
Ni rahp mós de ni ctzoo
7 ’Bâḻ dxuhch de laꞌd rahp to xmós, no hor-ba biahd me de ni biyquee me rad o bigyaan me yuhz, ¿nehxni ña laꞌd leeme: “Gürie, gooy”?
8 Yac, mazyg ña laꞌd leeme we: “Bzaa dguîlrotzien, bihtz shabiꞌ zaꞌgndzi no bidno lo dmiaxaꞌ gyre ni gahguaꞌ no ni goon. Luxu, were ba gahgüiꞌ no gooy.”
9 ¿Nehxni rdee mu xquix mós porni rtzoo me nunzy ni rahc mdad leeme?
10 No zegahc‑e laꞌd, hor-ba bylux gyre ni ra Dioz laꞌd ctzohd, were ga laꞌd: “Noꞌ we beeiy mos-nehx rquihñ, porni ni psaꞌn Dioz lo dña noꞌ, niwéhzy ptzoo noꞌ.”
Psiaḻ Jesúz tzii mpyquie ni gayudz lady
11 Lóni za Jesúz Jerusaléṉ, güdedy me ru ndziaalu ṟegioṉ-Samary no ṟegioṉ-Galilea.
12 Hor-ba gadzihñ me sto guiedzy-yaañ‑e naꞌ, byruu tzii meññ-gayac-ure ni gayudz lady ru ziaad me, per di ndziñgahsh yâme leeme, ziht gahc güliahz yâme
13 no pquee yâme riedz leeme, ne yâme:
―¡Jesúz, Muextr, bioob noꞌ!
14 Hor-bwieꞌ Jesúz leeyâme naꞌ, ra me leeyahc:
―Lâ tza lo bahl, lehdy güieꞌ me ba biaḻ laꞌd‑e.
No lo hor-za yâme, doozy ziaꞌ güzeꞌ yâme, biaḻ gahc yâme.
15 Were to lahd yâme bwieꞌ ba biaḻ xguîlguihdz, gubyguiat gahc me, gaquee me riedz, gaguguia me Dioz.
16 No bisshiby me lo Jesúz, lé güdihsh ihqy me lo yu, par bdee me xquix. No mpyquie-rieꞌ naꞌ, meññ-samaritan‑e leeme.
17 Were ne Jesúz:
―Tzii yâme ni biaḻ de xguîlguihdz. ¿Óz zguee yâme naꞌ?
18 Tohzy mpyquie-rieꞌ gubyguiat bdee xquix Dioz, nîcze meññ-stiby lad leeme no ni nehx xfamily meññ-Isṟael lee beeiy nó.
19 Luxu, ra me mpyquie-wé:
―¡Biahsiꞌ, gübiꞌ! Ba biaḻiꞌ we, porni bylíladzyiꞌ.
Ni guibyguiat Mpyquie-Pshahl Dioz Lee
(Mt. 24:23-28, 36-41)
20 Günabdiidz meññ-nac yahc fariseu Jesúz buc sulo ctzoo Dioz mdad. Were ra me leeyâme:
―Dze-sulo ctzoo Dioz mdad, dac‑e ni güieꞌ meññ leeu, sca mod-nwieꞌ yâme behch cos.
21 Ndruhty nehx znii, ña: “Leeu ba gayahc neꞌ”, o “Leexu ba gayahc uga”; porni ba gahc gatzoo Dioz mdad lahd laꞌd‑e.
22 No ra me xmeññ me:
―Ziaad dzé we ni gacladzy laꞌd güieꞌ laꞌd naa, Mpyquie-Pshahl Dioz Lee, nîcze stiby dzé mbí, per nehx zwieꞌ laꞌd naa.
23 No nîcze gynii meññ, ga: “Leeme zu neꞌ”, o “Leeme zu uga”, per di gylíladzy laꞌd ni di tza laꞌd dzigüiehd.
24 Porni beeiy to xgue ngüziee we gydahl no zieññu byzaꞌzy leññ gybaa, ze we gacu dze-naa, Mpyquie-Pshahl Dioz Lee, guibyguiataꞌ.
25 Per nier, rapaꞌ de ni tedyaꞌ gyrehzy ni nadz, no meññ-nu ni naꞌ squelo yâme naa.
26 Mod-guhc gahc dze-güyuꞌ Noé, zegahc‑e gac dze-naa, Mpyquie-Pshahl Dioz Lee, guibyguiataꞌ.
27 Tzcaḻ güyuꞌ meññ ni gayahgü, gayoo, gayidzña xtâ dze-güyuꞌ Noé leññ arc ni bzaa me. No luxu, guzlo guhc guio-ro no bniꞌdyu gyre meññ ni di nlíladzy ni ra me lee.
28 Mod-wé gahc‑e ptzoo meññ dze-güyuꞌ Lot. Tzcaḻ nu meññ ni gayahgü, gayoo, gazii, gatoꞌ, gaguꞌ byni, gazaa yuꞌ.
29 Per dze-byruu Lot leññ ciuda-Sodom, byruu gue gybaa no guie ni gaqueꞌ gue, no gyre meññ-güyuꞌ yahc uga, bniꞌdyu lee.
30 No mod-wé gahc‑e gatzoo meññ dze-naa, Mpyquie-Pshahl Dioz Lee, guibyguiataꞌ lo guiedzylie.
31 ’No dxu dziib ihqy yuꞌ dze-wé, no gyre ni rahp me nu leññ yuꞌ, di guiaht me ycaꞌ me leeu leññ yuꞌ; no dxu gatzoo dziiñ lo lyu, di guibyguiat me ruꞌ yuꞌ lehdy ycaꞌ me behch.
32 ¡Lâ guitsêlou laꞌd ni guhc ndzab-tziahl Lot!
33 Dxu rnâbladzy guislaa xguîlmbahñ leegahc la, zniꞌdyu; per dxu csaꞌnu ladzyña Dioz la, wé zahp guîlmbahñ ni nehx zluhx.
34 ’No gapyaꞌ laꞌd, guiaal ni dziguiahc nirieꞌ, ru nash chohp meññ lo luꞌn, to me tza, sto me guiaꞌn.
35 Chohp ngünaa gayuꞌd tohzy; to me tza, sto me guiaꞌn.
36 Zegahc‑e ru zu chohp mpyquie lo camp, to me tza, sto me guiaꞌn.
37 Ru bieññ yâme ni günii Jesúz, günabdiidz yâme leeme:
―Lii ni rtzoo mdad, ¿bá glo we gac niwé?
Ra me leeyâme:
―Rutisy nash cuerp-guty, wé we rdohp deedy zegahc.