22
Jud-Iscariot gdee Jesúz lo ña meññ
(Mt. 26:1-5, 14-16; Mr. 14:1-2, 10-11; Jn. 11:45-53)
1 Ba gadzihñ lni-Pascü ni rtzoo meññ-Isṟael, dze-rahgü meññ paṉ ni nehx rahp levadur.
2 Xjefy bahl yahc naꞌ, no muextr ni ruuḻ yahc xleiy Moiséz guzlo gayo yâme xnahc dzictzoo yâme lehdy igaꞌdy yâme Jesúz, porni rdzie yâme meññ-guiedzy.
3 To dzé güyuꞌ bêndzab Jud-Iscariot, to lahd gydiby tzipychop xmeññ Jesúz.
4 Güya me ru nu xjefy yahc bahl no ru nu zrieñ xjefy meññ-rahp ruꞌ idoró, bictzoo me diidz no meññ-wé yahc bia mód gdee me Jesúz lo ña yâme.
5 Modni rxihly yâme, no ptzoo yâme diidz gdee yâme medy ycaꞌ Jud.
6 “Yo” ne Jud, no xtâ glo dze-caḻ ba guzlo gayo me to mód lehdy gdee me Jesúz lo ña yâme sinn di gann meññ-guiedzy.
Güetzie Jesúz no xmeññ me
(Mt. 26:17-29; Mr. 14:12-25; Jn. 13:21-30; 1Co. 11:23-26)
7 Ba bydzihñ dze-wé naꞌ, dze-rahgü meññ paṉ ni nehx rahp levadur, dze-rgaꞌdy yâme xiily ni rdee yâme gun Dioz lo lni-Pascü.
8 Were, pshahl Jesúz Pedr no Juaṉ, ra me leeyâme:
―Lâ tza, lâ dziguistziaawy gyreu lehdy gotzie nó ni rahc lo lni-Pascü.
9 Ra yâme leeme:
―¿Bá glo racladzyiꞌ dziguistziaawy noꞌ leeu?
10 Ra Jesúz leeyâme:
―Ru gydzihñ laꞌd ciuda, uga güieꞌ laꞌd to mpyquie ni ziyno to rieꞌ nzeꞌ. Ba náḻ laꞌd leeme xtâ ru tzu me yuꞌ,
11 no ga laꞌd xbixwaan yuꞌ mod-rieꞌ: “Ze ne Muextr: ¿Bia leññ yuꞌ we ru gotzien no dmeññaꞌ ni rahc lo lni-Pascü?”
12 Uga gluu me laꞌd to leññ yu-ro sto pis guia ni ba nu puexd. Uga lâ guistziaawy gyreu.
13 Güyaty yâme no guhc gyre mod-ra Jesúz leeyâme. No uga bistziaawy yâme gyre ni rahc lo lni-Pascü.
14 Ru biygahl hór‑e naꞌ, were gürie Jesúz no x‑apóstl me ruꞌ miax.
15 No ra me leeyâme:
―Dgann laꞌd blaty‑e riuꞌdadzyaꞌ gotzien no laꞌd xguîlrahgü lni-Pascü antzy ni gatyaꞌ.
16 Porni gapyaꞌ laꞌd, ba nehx zibyguiat gahgüraꞌnu xtâ dze-ba diaa gayahcu ru rtzoo Dioz mdad.
17 Luxu cuaꞌ me to cop lo ña me, bdee me xquix Dioz, no ra me leeyâme:
―Lâ ycaꞌ nirieꞌ, no lâ goo de leeu gyre laꞌd.
18 Porni gapyaꞌ laꞌd, ba nehx zibyguiat gooraꞌ nirieꞌ ni riaa no blatzy xtâ ba diaa bydzihñ dzé ni rtzoo Dioz mdad, were goonu.
19 No cuaꞌ me paṉ lo ña me no bdee me xquix Dioz, no ptzulaꞌy meu, bdee meu cuaꞌ xmeññ me, no ra me leeyâme:
―Nirieꞌ we dcuerpaꞌ ni rdedyaꞌ por laꞌd. Mod-rieꞌ ctzoo laꞌd, mod-gatzoo nó ngâstoo, lehdy di guiaaḻladzy laꞌd naa.
20 No bylux güetzie yâme, mod-wé gahc ptzoo me no cop-wé, cuaꞌ meu no ra me leeyâme:
―Cop-rieꞌ we ni rdee diidz nu sto mod-coby lehdy tzu meññ tohzy no Dioz, no gacu por drieñaꞌ ni gyxieꞌ par laꞌd hor-gatyaꞌ.
21 ’No ruꞌ gahc miax-dxie nó we, dxie mpyquie-gdee naa lo ña meññ-rdziadzyno naa.
22 Naa, Mpyquie-Pshahl Dioz Lee, rapaꞌ de ni tedyaꞌ gyre ni ba nac diidz. Per ¡baazy dzii de mpyquie-gdee naa lo ña meññ-rdziadzyno naa!
23 Were guzlo günabdiidz saꞌ yâme, ne yâme: “¿Dxuhx de nó we ctzoo ze?”
Meññ-ne ma qysahc
24 No guzlo gadeḻydiidz yâme dxu de lahd yâme ma qysahc.
25 Were ra Jesúz leeyâme:
―Ṟeiy yahc ni rtzoo mdad lo guiedzylie-rieꞌ, rtzoo yâme xmeññ yâme gyre mod-ne yâme; no zrieñ meññ ni rahc ni rnii la, riuꞌladzy yâme ga meññ meññ-tziaawy we leeyâme.
26 Per laꞌd, na di gac laꞌd beeiy gahc leeyâme, mazyg dxu racladzy ma qysahc lahd laꞌd la, rahp de ni gac scâsy ni ndruhty nehx nac. No dxu rtzoo mdad, rahp de ni gac scâsy to mós ni racno zrieñ meññ.
27 ¿Dxu ma rsahc: ni rbia ruꞌ miax roo la, o mós ni rbahqy guîlroo? Ni rbia ruꞌ miax, wé we ma rsahc. Per naa nun lahd laꞌd par gacnon meññ scâsy to mós.
28 ’Laꞌd güyuno laꞌd naa lo gyre ni nadz ni ba güdeedyaꞌ.
29 Leewe, gdedyaꞌ laꞌd ru ctzohd mdad mod-bdee gahc dTadaꞌ ru rtzon mdad,
30 lehdy were gahgü laꞌd no goo laꞌd ruꞌ miax ru ctzon mdad. No uga cuia laꞌd par ctzoo laꞌd guîlguxtisy lguia gyre meññ-ziaad de lo xfamily gydiby tzipychop xiiñ Isṟael.
Günii Jesúz stzoo Pedr beeiy ni nehx rzaclo leeme
(Mt. 26:31-35; Mr. 14:27-31; Jn. 13:36-38)
31 Luxu, zegahc ne Jesúz:
―Simóṉ, Simóṉ, bwieꞌ güieꞌzyiꞌ. Ba günab bêndzab gdedyaꞌ lgar ctzoo me laꞌd gyre gyzasy, beeiy rtzoo meññ trigü ru rboo yâme xguixu.
32 Per ba günabaꞌ lo Dioz gacno me lii lehdy di csaꞌniꞌ de ni rlíladzyiꞌ naa. Per dze-ba gubyguiat gyohbyiꞌ naa sto, gucno zrieñ meññ-xirmaniꞌ par di gyrugan yâme.
33 Ra Simóṉ leeme:
―Lii ni rtzoo mdad, naa ru tzaꞌy‑e tzan. Bâḻ tzaꞌy lidzyguiib la, noc naa wé tza, no ru gatyiꞌ la, wé gahc‑e gatyaꞌ.
34 Were ra Jesúz leeme:
―Pedr, gapyaꞌ lii ni uli, guial-rieꞌ gahc‑e ni dgueññ ziaꞌ cuiadz rig, lii ba tzonn vuelt güniiy nehx rzacloꞌy naa.
Bush, medy, no spad
35 Luxu, ra Jesúz leeyâme:
―Dze-güyat ru pshaalaꞌ laꞌd, nehx güiyno laꞌd bush, ni medy, ni chohp pár guidguial, ¿biaadz laꞌd behch la?
Ra yâme leeme:
―Mbehty di ñaadz noꞌ.
36 Were ra Jesúz leeyâme:
―Per ngâstoo, dxu laꞌd ni rahp bush la, lâ tziyno leeu, no lâ tziyno medy zegahc. No dxu nehx rahp spad la, ctoꞌ xchomp me, par sii me leeu.
37 Porni gapyaꞌ laꞌd, nirieꞌ we ni nu lo Guehtzy ru queꞌ xtiidz Dioz ni ganii de mod-rapaꞌ de ni gácaꞌ, neu: “Pteedy yâme leeme por meññ-guîlquie.” Ni nu lo xtiidz Dioz ni ganii de naa la, rahpu de ni gacu.
38 Were ra yâme Jesúz:
―Lii ni rtzoo mdad, neꞌ nu chohp spad.
Ra me leeyâme:
―Ba niwéhzy.
Günino Jesúz Dioz Getsemaní
(Mt. 26:36-46; Mr. 14:32-42)
39 Luxu, byruu Jesúz, za me dañ-Oliv mod-rtzoo gahc me, no náḻ xmeññ me leeme.
40 Bydzihñ yâme uga, ra me xmeññ me:
―Lâ gnab lo Dioz lehdy gacno me laꞌd par di ctzoo laꞌd ni racladzy bêndzab.
41 No luxu, za me beeiy mdid-rráḻt meññ to guie. Bydzihñ me, bisshiby me, guzlo ganino me Dioz,
42 ra me:
―Dad, bâḻ racladzyiꞌ la, bislaa naa de lo ni nadz ni gabiahz naa; per dac‑e gac ni ren, mazyg gac ni neꞌy.
43 Lo hor-ganino me Dioz, biahd to ángel ni byruu gybaa gucno leeme.
44 No lo hor-ma gazaczi me, ma ndip ganino me Dioz, no garuu nisluhn leeme, lé beeiy mod-rdzuhñ rieñ lo yu.
45 Ru bylux günino me xTad me, biahs me, güya me ru biaꞌn xmeññ me. Bydzihñ me, bwieꞌ me nishcahsy yâme porni nu yâme trixd.
46 Were, ra me leeyâme:
―¿Bia nacu nishcahsy laꞌd? Lâ guiahs, no lâ gnab lo Dioz lehdy gacno me laꞌd, par di ctzoo laꞌd ni racladzy bêndzab.
Günahzy yâme Jesúz
(Mt. 26:47-56; Mr. 14:43-50; Jn. 18:2-11)
47 Ganii ziaꞌ Jesúz ze, tohzy bydzihñ xtahl meññ. No Jud, ni lee nac to lahd gydiby tzipychop xmeññ Jesúz, leeme zunier lo yâme. Ru bydzihñ me, gübigy gahc me lo Jesúz par pcuruꞌ me lee.
48 Were ra Jesúz leeme:
―Jud, ¿pcuruꞌy naa par gdeedyiꞌ naa, Mpyquie-Pshahl Dioz Lee, lo ña meññ-rieꞌ la?
49 Hor-bwieꞌ xmeññ me ni ba gayahc, ra yâme Jesúz:
―Lii ni rtzoo mdad, ¿squelo noꞌ leeyâme no spad la?
50 Byruu to lahd yâme, güloo me rid to xmós xjefy gyre bahl, pchug me gydiag-drech mós.
51 Were ra Jesúz leeyâme:
―¡Zî-nu yâme! Ba niwéhzy.
No güdan Jesúz ru byrug gydiag mpyquie-wé no biaḻ gahcu.
52 Luxu, ra me xjefy yahc bahl, no zrieñ xjefy meññ-rahp ruꞌ idoró, no zrieñ mînguhl yahc ni nac guxtisy ni zidnahzy leeme:
―¿Zidnot spad no garrot lehdy gynahzy laꞌd naa beeiy to meññ-gübaan la?
53 Gyre dzé güyun ruꞌ idoró no laꞌd, per nehx günahzy laꞌd naa. Per ngâstoo were ba bydzihñ hór par gac ni ne laꞌd, no par gac ni ne ni rtzoo mdad lo guibcawy.
Günii Pedr nehx rzaclo me Jesúz
(Mt. 26:57-58, 69-75; Mr. 14:53-54, 66-72; Jn. 18:12-18, 25-27)
54 Were günahzy yâme Jesúz, ziyno yâme leeme xiryuꞌ xjefy gyre bahl, no náḻt Pedr ziht gá.
55 Ru bydzihñ yâme we naꞌ, gülahqy yâme gue glaꞌy stziuꞌ, luxu gürie yâme gybiu. Noc Pedr gürie lahd yâme.
56 Tohzy byruu to criad, bwieꞌ dxie me coo gue, no ra:
―Mpyquie-rieꞌ zegahc güyuꞌ me tohzy no Jesúz.
57 Per Pedr naꞌ günii me, ra me ngüna-wé:
―Yac. Ni nehx rzacloꞌn leeme.
58 Leññ stiby ṟat byruu sto mpyquie, ra leeme:
―Lii zegahc xmeññ Jesúz lii.
Gyzac ra Pedr leeme:
―Nehx uliu, ño. Dac‑e xmeññ me naa.
59 Güdahpu beeiy stiby hór, byruu sto lahd yâme, ne:
―Ni ulihbu, mpyquie-rieꞌ zehg ziaad me no Jesúz, porni meññ-Galilea we leeme.
60 Were ra Pedr mpyquie-wé:
―Ni nehx nannaꞌ de bia ganiiy.
Ganii ziaꞌ Pedr ze, tohzydzi güriedz rig.
61 Bidzguiat gahc lo Jesúz, bwieꞌ me ru dxie Pedr. Were bitsêlou Pedr de ni ra Jesúz leeme: “Dgueññ ziaꞌ cuiadz rig, lii ba tzonn vuelt güniiy nehx rzacloꞌy naa.”
62 Byluxu byruu Pedr de uga, biin me gyre gylux.
Rtzuburl yâme Jesúz
(Mt. 26:67-68; Mr. 14:65)
63 Gyre meññ-gayahp Jesúz guzlo gatzuburl yâme leeme, no gaguihñ yâme leeme.
64 Psaagü yâme lo me no luxu rgahp yâme lo me, no ra yâme leeme:
―¡Günii dxu güdihñ lii!
65 No günii yâme xtahl ni nahcsy lguia me lehdy ptzuburl yâme leeme.
Güiyno yâme Jesúz lo guxtisy
(Mt. 26:59-66; Mr. 14:55-64; Jn. 18:19-24)
66 Ni byre guiaal, bydohp gyre mînguhl yahc ni nac guxtisy lahd meññ-Isṟael, no xjefy yahc bahl no zrieñ muextr ni ruuḻ yahc xleiy Moiséz. No luxu, ziyno yâme Jesúz ru dxie gyre xguxtisy yâme, no uga ra yâme leeme:
67 ―¿Lii we nac Crist la? Guhdzyu noꞌ naꞌ.
Ra Jesúz leeyâme:
―Nîcze ñapyaꞌ laꞌd uliu, nehx zlíladzy laꞌd.
68 No bâḻ nnabdiidzaꞌ laꞌd behch la, di zdzial laꞌd bia ga laꞌd naa, ni di zislahd naa.
69 Glohg ngâstoo naa, Mpyquie-Pshahl Dioz Lee, ba dzicchien xlad-drech Dioz ni beeiyu lee gyreu.
70 Ra gyre yâme leeme:
―¿Lii we, pue, Xiiñ Dioz la?
Ra me leeyâme:
―Laꞌd gahc‑e ne ze leeu.
71 Were ra saꞌ yâme:
―¿Bia mazy racdadzy nó tzu dxu gynii? Nó ba bieññ nó bia ne me.