9
Pshahl Jesúz gydiby tzipychop xmeññ me
(Mt. 10:5-15; Mr. 6:7-13)
1 Ptohp Jesúz gydiby tzipychop xmeññ me, ptzoo me leeyâme meññ ni beeiy ctzoo xroꞌ cos, no ni beeiy ctzoo mdad gyruu mbenahcsy meññ, no ni beeiy csiaḻ xguîlguihdz meññ.
2 No luxu, pshahl me leeyâme dzigyuno yâme meññ mod-rtzoo Dioz mdad, no dzicsiaḻ gahc yâme meññ-gayac-ure.
3 No ra me leeyâme:
―Na tziyno laꞌd mbehty par lo ñahz: ni yagca, ni bush, ni paṉ, ni medy, ni chohp shab laꞌd; nunzy ni nutz laꞌd, lâ tziyno.
4 Yuꞌ ru gydzihñ laꞌd, uga lâ tzu xtâ glo gyruu laꞌd leññ guiedzy-caḻ.
5 No ru di ne yâme gdee ñahz gydzihñ laꞌd, lâ gyruu de uga no lâ cuihby yudé ni queꞌ nieꞌ laꞌd, lehdy gann yâme ni nahcsy‑e ptzoo yâme porni di ntzucas yâme laꞌd.
6 Were zahdy yâme, rruu yâme to guiedzy, za yâme sto guiedzy. Gayuno yâme meññ xtiidz Dioz no gasiaḻ yâme meññ-gayac-ure gyre ru ria yâme.
Mod-guhty Juaṉ ni rchôbnihs
(Mt. 14:1-12; Mr. 6:14-29)
7 Gunn gobernador-Herody gyre ni gatzoo Jesúz. Per nehx nann me dxuhb we Jesúz, porni nu meññ ne Juaṉ ni rchôbnihs‑e gübahñ gyzac,
8 zrieñ yâme ne Elíaz‑e gübahñ, zrieñ yâme ne dxuhch de lahd profet yahc ni güyuꞌ ba xtze we gübahñ gyzac.
9 Nehdy Herody:
―Dac‑e Juaṉ leeme, porni Juaṉ ptzon mdad pchuꞌ yâme ihqy. ¿Dxuhx‑e leeme mpyquie-rieꞌ ni rieññaꞌ de lee xtahl cos?
No gayo Herody mód par güieꞌ me Jesúz.
Bdee Jesúz ni güdahgü gaay mily mpyquie
(Mt. 14:13-21; Mr. 6:30-44; Jn. 6:1-14)
10 Gubyguiat apóstl yahc de ru pshahl Jesúz leeyâme, no bie yâme diidz lo me gyre ni ptzoo yâme. Luxu, ziyno Jesúz leeyâme diby lad to ru ndruhty nehx nu, gahsh gá to guiedzy ni le Betsaida.
11 Hor-gunn meññ bá glo za Jesúz, luegü gahc za yâme ru za me; no byxihly Jesúz ru bwieꞌ me gadzihñ yâme, no bieno me leeyâme de mod-rtzoo Dioz mdad, no psiaḻ me meññ-gayac-ure.
12 Ru ba udzie we naꞌ, gydiby tzipychop apóstl gübigy yâme, ra yâme Jesúz:
―Gu meññ-rieꞌ yahc tza yâme guiedzy-yaañ no zrieñ ru gahsh de neꞌ, lehdy beeiy guisladzy yâme no gyo ni gahgü yâme. Porni neꞌ lo camp, gydi mbehty.
13 Ra Jesúz leeyâme:
―Lâ gdee ni gahgü yâme.
Ra yâme leeme:
―Nehx rahp noꞌ mbehty guîlrahgü, nunzy gaay paṉ no chohp mbaḻ. ¿Racladzyiꞌ dzicshii noꞌ ni gahgü gyre meññ-rieꞌ la?
14 Beeiy gaay mily meññ-mpyquie ni zu yahc uga. Were ra Jesúz leeyâme:
―Lâ ga gyre meññ cuia yâme cuib por cuib, cincuent gá yâme.
15 Were ptzoo yâme mod-wé par gürie gyre meññ-caḻ yahc.
16 Luxu, cuaꞌ Jesúz gydiby gaay paṉ-caḻ lo ña me no gyrop mbaḻ. No gülesy lo me gybaa, bdee me xquix Dioz, no ptzulaꞌy meu, no bdee meu xmeññ me lehdy quiiz yâmeu ycaꞌ meññ-dxie yahc uga.
17 Gyre yâme güdahgü glo bydzeꞌ yâme. No ptohp xmeññ Jesúz tzipychop dzomby guîlrahgü ni biaꞌn.
Günii Pedr dxu we Jesúz
(Mt. 16:13-19; Mr. 8:27-29)
18 To dzé ganino Jesúz Dioz to ru diby lad, no zegahc güiyno me xmeññ me, ra me leeyâme:
―¿Dxu we ne meññ naa?
19 Ra yâme leeme:
―Nu yâme ne Juaṉ ni pchôbnihs meññ‑e lii; zrieñ yâme ne Elíaz‑e lii ni güyuꞌ ba xtze; no zrieñ yâme ne dxuhch de lahd profet ni güyuꞌ ba xtze we gübahñ.
20 Ra Jesúz leeyâme:
―Naꞌz laꞌd, ¿dxu we ne laꞌd naa?
Ra Pedr leeme:
―Lii we nac Crist, ni pshahl Dioz lee.
Günii Jesúz ni gaty me
(Mt. 16:20-28; Mr. 8:30—9:1)
21 Were ra Jesúz leeyâme na di ga yâme ndruhty dxu we leeme,
22 no ra me:
―Naa, Mpyquie-Pshahl Dioz Lee, rapaꞌ de ni tedyaꞌ xtahl guîlné; mînguhl yahc ni nac guxtisy, no xjefy yahc bahl, no muextr ni ruuḻ yahc xleiy Moiséz zruu yâme contr naa no zgaꞌdy yâme naa; per lo tzonn dzé zbahñaꞌ gyzac.
23 Luxu, ra me gyre yâme:
―Dxu racladzy gac dmeññaꞌ lee la, csaan gyre ni nahcsy ni nac, no gbooladzy xtâ xguîlmbahñ, no ctzoo ni ren gyre dzé.
24 Dxu gacladzy guislaa xguîlmbahñ leegahc la, zniꞌdyu; per dxu gniꞌdy xguîlmbahñ por naa la, wé zahp guîlmbahñ ni nehx zluhx.
25 Mbahty nehx nquihñu par to meññ ñahc xchieñ me gyre ni nu lo guiedzylie, no luxu por leeu nniꞌdy xguîlmbahñ me.
26 Porni dxu qytuno naa no dtiidzaꞌ la, zegahc‑e naa, Mpyquie-Pshahl Dioz Lee, stuꞌn gynin dmeññaꞌ leeyâme dze-guiaḻaꞌ lo dguîlbyniꞌn, no lo xguîlbyniꞌ dTadaꞌ no gyre x‑ángel me.
27 Dziguiapyaꞌ laꞌd ni uli, nu lahd meññ-rieꞌ ni nu yahc neꞌ, nehx zehty sinn güieꞌ mod-rtzoo Dioz mdad.
Bwieꞌ xmeññ Jesúz bydzee mod-nac lo me
(Mt. 17:1-8; Mr. 9:2-8)
28 Güdedy beeiy shun dzé de ni günii Jesúz mod-wé, güiyno me Pedr, Juaṉ no Jacob ihqy to dahñ par zigynino me Dioz.
29 Ru ganino me Dioz, bydzee mod-nac lo me, no gucnquitzybo shab me, lé rcampytzeꞌu.
30 Lohg hor-wé bydzihñ chohp mpyquie ni güyuꞌ yahc ba xtze ni le Moiséz no Elíaz, guzlo gahc gayuno me lee diidz.
31 No guionn yâme zu to lo byni-ro, gayu yâme lguia de ni dziguiehty Jesúz Jerusaléṉ.
32 Per Pedr naꞌ nu mpcaaḻ lo me no schohp meññ-zuno me; no nîcze ze leeu, ptibladzy yâme lehdy bwieꞌ yâme xguîlbyniꞌ Jesúz no gyrop mpyquie-zuno me lee.
33 Hor-ba za Moiséz no Elíaz‑e naꞌ, ra Pedr Jesúz:
―Muextr, ¡lehgxu zuu nó neꞌ! Gzaa noꞌ tzonn ṟamad, tohbyu par lii, stohbyu par Moiséz, no stohbyu par Elíaz.
Per Pedr naꞌ, nehx nann me bia ganii me.
34 Ganii ziaꞌ me ze, tohzydzi gúḻ to zá ru zu yâme, modni bydzie yâme ru bwieꞌ yâme ba nu yâme leññ zá.
35 No lo za-wé bieññ to riedz ni ne:
―Nirieꞌ we dShiñaꞌ ni ndzin lee. Lâ guieññ ni ga me laꞌd.
36 Luxu, hor-biandzie riedz-caḻ, ba nunzy Jesúz bwieꞌ yâme, no di nnii yâme mbehty. No leññ dze-caḻ, nehx bie yâme lo ndruhty ni bwieꞌ yâme.
Psiaḻ Jesúz to ñobywiñ ni nu mbenahcsy lee
(Mt. 17:14-21; Mr. 9:14-29)
37 Sto dzé, ru ziaht yâme dahñ, bigydzil-lo xtahl meññ Jesúz.
38 Lahd yâme ziaad to mpyquie, pquee me riedz, ne me:
―Muextr, bwieꞌ dñoobyaꞌ ni ngacguie ni rapaꞌ;
39 rnahzy mbenahcsy leeme, lé rquee me riedz. No rzoobu mbeꞌ leeme, no rguiñguieu leeme lo yu, lé rboou mboo ruꞌ me; rtzoo rsahcu leeme, no nehx rruuw de leeme.
40 Ba günabaꞌ xmeññiꞌ mboo leeu leeme, per di ñaḻu leeyâme.
41 Were ne Jesúz:
―¡Laꞌd ni nu ni naꞌ, nehx rlíladzyt naa no meññ-dirquihñ laꞌd! ¿Xtâ buc rapaꞌ de ni tzun lahd laꞌd, no xtâ buc beeiy ctibdadzyaꞌ laꞌd?
Were ra me mpyquie-wé:
―Dno xiiñiꞌ neꞌ.
42 Ru ba gadziñgahsh ñobywiñ ru zu Jesúz, güdiñguie mbenahcsy leeme lo yu, no bzoobu mbeꞌ leeme. Were güdeḻy Jesúz mbenahcsy no psiaḻ gahc me ñobywiñ, no luxu, bdee me lee xtad.
43 Ptzunadz gyre yâme, porni bwieꞌ yâme rtzoo Dioz ni nehx beeiy rtzoo ndruhty.
Gyzac günii Jesúz de ni gaty me
(Mt. 17:22-23; Mr. 9:30-32)
Lóhgni gatzunadz gyre meññ-caḻ yahc de gyre ni rtzoo Jesúz, ra me xmeññ me:
44 ―Lâ guieññ zaꞌgndzi ni dziguiapyaꞌ laꞌd. Naa Mpyquie-Pshahl Dioz Lee; zdee dxuhch naa lo ña meññ-rdziadzyno naa.
45 Per di ñieññ yâme ni ne me, porni nehx ziaꞌ rdee Dioz lsenzy gann yâme bia leeu. No rdzie yâme gnabdiidz yâme leeme bia leeu ni günii me.
¿Dxu ma rsahc?
(Mt. 18:1-5; Mr. 9:33-37)
46 Guzlo gadeḻydiidz xmeññ Jesúz dxu de lahd yâme ma qysahc.
47 Per Jesúz naꞌ, nann me bia ganii leññ ihqy yâme. Were biycaꞌ me to ñôbydxuur, bzu me lee coo me.
48 Luxu, ra me leeyâme:
―Bâḻ dxuhch, porni rzobdiidz naa, gacno me mbiux-rieꞌ la, scâsy ñacno yâme naa we. No dxu ycaꞌ dtiidzaꞌ la, gacáꞌ yâme xtiidz Dioz ni pshahl naa. Porni lahd laꞌd dxu nehx rguguia leegahc la, wé we ni ma rsahc.
Dxu nehx néladzy nó la, gayacno nó we
(Mr. 9:38-40)
49 Bylux günii Jesúz, ra Juaṉ leeme:
―Muextr, bwieꞌ noꞌ to mpyquie ni ganii ley lehdy gboo me mbenahcsy meññ, no ra noꞌ leeme ba di ctzoor me mod-wé, porni dac me ni ganzeno nó lee.
50 Were ra Jesúz leeyâme:
―Di ycar laꞌd leeu leeme; porni dxu nehx néladzy nó la, gayacno me nó we.
Güdeḻy Jesúz Jacob no Juaṉ
51 Dze-ba bydziñgahsh ni gybiꞌ Jesúz gybaa, ba nu ihqy me tza me Jerusaléṉ.
52 No pshahl me meññ ni guznier zigyo ru gydzíe yâme to guiedzy-yaañ ni nu lo ṟegioṉ-Samary.
53 Per hor-gunn meññ-nu leññ guiedzy-caḻ Jerusaléṉ tza me, di ndee yâme lgar ndzihñ me uga.
54 Ru bwieꞌ Jacob no Juaṉ di ne meññ-wé yahc ndee lgar ndzihñ me uga, were ra yâme Jesúz:
―Lii ni rtzoo mdad, ¿riuꞌladzyiꞌ gnab noꞌ gyruu gue gybaa par gniꞌdy leeyâme la, mod-ptzoo Elíaz ba xtze?
55 Were bwiedzie Jesúz lo yâme no byduhsh lo yâme, ra me:
―Nehx nann laꞌd dxu gaquihly laꞌd gynihd ze.
56 Dac‑e pshahl Dioz naa lo guiedzylie par zidnityaꞌ meññ. Pshahl me naa we par guislaan leeyâme.
Luxu, güdedyñahz gahc yâme, za yâme sto guiedzy.
Meññ-racladzy ñuꞌ coo xmeññ Jesúz
(Mt. 8:19-22)
57 Hor-za yâme lo ñahz‑e naꞌ, byruu to mpyquie, ra me Jesúz:
―Lii ni rtzoo mdad, tzan no lii rutisy tzaꞌy.
58 Ra Jesúz leeme:
―Mbiaz rahp xcuev yahc maꞌ, no zegahc mashiily rahp xguehsh yahc maꞌ; per naa, Mpyquie-Pshahl Dioz Lee, nehx rapaꞌ ru rdzíen.
59 Ra Jesúz sto mpyquie:
―Náḻiꞌ naa.
Ra mpyquie-caḻ leeme:
―Señor, lii ni rtzoo mdad, bdee ñahz nier tzan dziycatzyaꞌ dtadaꞌ.
60 Ra Jesúz leeme:
―Psaꞌn meññ-nac yahc beeiy mînguty ycaꞌdzy yâme xmeññ yâme ni ba guhty. Per lii, güya bicsieññ meññ mod-rtzoo Dioz mdad.
61 Gyzac byruu sto, ra leeme:
―Lii ni rtzoo mdad, riuꞌdadzyaꞌ gácaꞌ xmeññiꞌ no tzo nó rutisy tzaꞌy. Per gax ndeedyiꞌ ñahz ñan nigynen difamilyaꞌ.
62 Ra Jesúz leeme:
―Meññ ni rcaꞌ xtiidz Dioz no luxu nehx rsaan ni nahcsy ni nac, leeyâme we zidguiahc beeiy meññ-ridzguiat lo traz lóni gaquee rad. Zâ meññ-wé nehx rquihñ par tzu lahd xmeññ Dioz ni rtzoo mdad.