2
1 No leewe, lâ csaan gyre ni nehx mos, gyre guîlrisquiee, di gac laꞌd meññ-ne meññ-tziaawy lee nîcze nehx uliu, no lâ csaan guîlmvidy, no di gynii laꞌd ni nahcsy contr meññ.
2 Lâ gac beeiy mbiux ni leer guhl, riuꞌladzy yâme lech; no modé gahc lâ gyo ni ziaad de xiSpirt Dioz ni zidguiahc beeiy lech ni nyar, lehdy por leeu gyniꞌzy ni nu leññ xguîlmbahñ laꞌd par gylaa laꞌd,
3 porni ba nann laꞌd guîlmbañ-tziaawy‑e rahp Dioz.
Zidguiahc Crist beeiy to guie ni mbahñ
4 Lâ gybigy gahsh de Crist ni zidguiahc beeiy to guie ni mbahñ ni di ne meññ nquihñ; per lo Dioz la, leeme we beeiy to guie ni gübee no guie ni ma rsahc.
5 Laꞌd zegahc‑e zidguiahc laꞌd beeiy guie ni mbahñ, lâ gdee ñahz yquihñ Dioz laꞌd par tzaa ni zidguiahc beeiy xiryuꞌ xiSpirt me, no gac laꞌd bahl ni nac nunzy par leeme, no por Jesucrist gdee laꞌd gun ni riuꞌladzy Dioz.
6 Leewe zegahc rnii lo Guehtzy ru queꞌ xtiidz Dioz neu:
Leññ ciuda-Sioṉ gaguishaꞌ to guie ni rquihñ gaa squiñp lehdy tzaa yuꞌ zaꞌgndzi, ni gübee no ni ma rsahc;
dxu gylíladzy leeme nehx ziuꞌ dzé nisquiee me lee.
7 No par laꞌd ni rlíladzy leeme, nac me beeiy guie ni ma rsahc; per par meññ ni nehx rlíladzy la, rahc ni rnii lo Guehtzy ru queꞌ xtiidz Dioz, ru neu:
Guie ni di ne meññ-rzaa yuꞌ nquihñ,
naꞌ lehbu ba nash squiñp ru raa guie ni ma rquihñ lehdy tzaa yuꞌ zaꞌgndzi.
8 No zegahc lo Guehtzy ru queꞌ xtiidz Dioz neu:
Zidguiahc me beeiy guie ni gyraḻ nieꞌ meññ, no guie ni csiahb meññ.
Riahb yâme porni nehx rzobdiidz yâme ni günii Dioz. No rahp de ni gac yâme ze mod-ba nac diidz.
Nac laꞌd meññ-xguiedzy Dioz
9 Per laꞌd nac laꞌd to family ni gübee, to cuib bahl ni gatzoo xtziiñ Ṟeiy, to nacióṉ ru nu pur meññ-nac nunzy par Dioz, no nac laꞌd meññ-xguiedzy Dioz. No mod-wé guhcu, lehdy guno laꞌd meññ de ni Dioz rtzoo me ni nehx beeiy ntzoo ndruhty no modni mosu, leeme we ni pquee riedz laꞌd gyruu laꞌd de lo beeiy guibcawy no tzu laꞌd beeiy lo byni-mos.
10 Ba xtze nehx guhc laꞌd meññ-to guiedzy, per naꞌ ba nac laꞌd meññ-xguiedzy Dioz; ba xtze nehx bioob ndruhty laꞌd, per naꞌ ba rioob Dioz laꞌd.
Lâ ctzoo ni nac xñahzû
11 Dirmanaꞌ ni ndzin leeyahc, ganabaꞌ laꞌd beeiy ni ñahc laꞌd meññ-mbiuhz no doozy dzé nu laꞌd lo guiedzylie-rieꞌ, di gdee laꞌd ñahz ctzohd ni nahcsy ni nehzy ihqy laꞌd, porni rdeḻynou xguîlmbahñ laꞌd.
12 Lâ ctzoo ni nac xñahzû lahd meññ-nehx rzaclo Dioz, lehdy nîcze rnii yâme contr laꞌd beeiy ni ñahc laꞌd meññ-dirquihñ, zwieꞌ yâme ni mos ni rtzoo laꞌd, no zguguia yâme Dioz dze-ctzoo me guîlguxtisy.
13 Por guîlrzacbeeiy ni rahp laꞌd Crist, lâ gzoob xtiidz gyre guxtisy ni nu lo guiedzylie, guhcu guxtisy ni rtzoo mdad nacióṉ porni ma rsahc me que gyre zrieñ,
14 no zegahcu gobernador yahc, porni guxtisy ni rtzoo mdad nacióṉ pshahl me gobernador par gdee beeiy guîlné meññ-rtzoo ni dirquihñ, no cuguia me meññ ni rtzoo ni mos.
15 Porni Dioz racladzy me ctzoo laꞌd ni mos, lehdy meññ-waty ni ndaagü xguîlriehñ di gynii yâme contr laꞌd.
16 Lâ gac beeiy meññ ni nehx nu dxu rtzoo mdad lee, per dac par ctzoo laꞌd ni dirquihñ. Mazyg Dioz‑e rtzoo mdad laꞌd.
17 Lâ gap xpeeiy laꞌd no gyre meññ. Lâ guîntzi meññ-rman. Lâ gzacbeeiy Dioz. Lâ gap xpeeiy laꞌd guxtisy ni rtzoo mdad nacióṉ.
Ni ctzoo laꞌd hor-tedy laꞌd ni nadz
18 Laꞌd ni nac mós ni byzee, lâ gzoob xtiidz meññ-rtzoo mdad laꞌd no lâ gap xpeeiy laꞌd no leeyâme, dac nunzy bâḻ meññ-tziaawy leeyâme, mazyg nîcze meññ-dirquihñ leeyâme ni nehx ndzi xmós.
19 Dioz gyxilyno me laꞌd bâḻ nu ihqy laꞌd ctzohd ni ne me, no ctibladzy laꞌd hor-rtzoo rsahc meññ laꞌd nîcze nehx rahp laꞌd doḻ.
20 Nehx nu bia ñuguia laꞌd bâḻ nguihñ yâme laꞌd por behch ni nahcsy ni ptzoo laꞌd. Per bâḻ rtzoo laꞌd ni nac xñahzû no aaḻ rtzoo rsahc yâme laꞌd no rtibladzy laꞌd la, niwé riuꞌladzy Dioz lee.
21 Dioz pquee me riedz laꞌd ctibladzy laꞌd hor-rdedy laꞌd ni nadz nîcze rtzoo laꞌd ni nac xñahzû, porni Crist zegahc güdedy me ni nadz por nó, no ze bluu me nó ctzoo nó mod-ptzoo me.
22 Crist nehx ptzoo me guîlquie, ni nehx bisquiee me ndruhty.
23 Hor-günii meññ didz-nahcsy contr leeme, nehx bidzguiat me didz-nahcsy contr leeyâme; hor-ptzoo psahc yâme leeme, nehx pquelo me, mazyg psaꞌn meu lo ña Dioz, ni rtzoo guîlguxtisy mod-nac xñahzu.
24 Crist gahc güiyno me dguîlquie nó lo xcuerp me dze-cueꞌ me lo cruzy, lehdy gac nó beeiy ni gaty de lo guîlquie, no gybahñ nó par ctzoo nó ni nac xñahzû. Por guîlné ni güdedy me leewe biaḻ laꞌd.
25 Bidguiahc laꞌd beeiy xiily ni bynityxñahz, per naꞌ ba gubyguiat laꞌd no Crist, ni gayahp laꞌd beeiy rahp meññ xiily no rla me xguîlmbahñ laꞌd.