2
Muextr ni risquiee
(Jud 4-13)
1 Zegahc güyuꞌ lahd meññ-Isṟael meññ ni ne lee nac profet per nehx uliu profet leeyâme; no mod-wé gahc tzu muextr lahd laꞌd. No ngaꞌdzy gá gluu yâme laꞌd gydze ni gylíladzy laꞌd no cchaḻ yâme xguîlriehñ laꞌd, no modé neññ ba nehx rzaclo yâme Crist ni bislaa leeyâme; no por nirieꞌ, ni di zizlo yâme, gynihty yâme.
2 No xtahl xmeññ Dioz zisnáḻ leeyâme no stzoo ni nahcsy ni ristuꞌ mod-gatzoo muextr-rieꞌ yahc, no por xtoḻ yâme znii meññ didz-nahcsy chehsh ni ulihbu xñahz Dioz.
3 No por xguîlrzîbyladzy yâme, zisquiee yâme laꞌd no guîlrseedy ni rziññ ihqy yâme, lehdy gdee laꞌd medy leeyâme; per gac guîlguxtisy chehsh yâme mod-ba nac diidz ba xtze, no de ni gynihty yâme ba gabiahzu leeyâme.
4 Dioz pshahl guîlné chehsh ángel ni ptzoo yahc guîlquie, bráḻ me lee infiern no psaꞌn me lee to ru ncawy ndaagü yâme lóni gabiahz yâme xtâ dze-gac xguîlnadz me.
5 No zegahc pshahl Dioz guîlné lo guiedzylie ba xtze, ptzoo me guio-ro, bniꞌdy me gyre meññ-dirquihñ no byla me Noé no zgahdzy meññ. Noé naꞌ, bieno me diidz meññ ctzoo ni nac xñahzû.
6 Zegahc bniꞌdy Dioz ciuda-Sodom no ciuda-Gomorr, pquee me gue leeyahcu lé gürie-déu, lehdy gann meññ modé gahc‑e gac lo meññ-dirquihñ.
7 Per Dioz bislaa me Lot, to mpyquie-tziaawy, no modni rguꞌ ihqy Lot por gyre ni nahcsy ni ristuꞌ ni rtzoo meññ-Sodom no meññ-Gomorr.
8 Lot naꞌ, ni nac mpyquie-tziaawy no ni güyuꞌ lahd meññ-Sodom, gyre dzé rzacno xguîlmbahñ me por gyre ni dirquihñ ni rwieꞌ me no rieññ me rtzoo meññ-wé yahc.
9 No leewe Dioz, nann me xnahc guislaa me meññ ni rzacbeeiy leeme hor-tedy yâme ni ngann, no zegahc nann me xnahc gdee me guîlné meññ-dirquihñ lóni gabiahz yâme dze-gac xguîlnadz Dioz,
10 no mahbu meññ-rtzoo ni nehzy ihqy no riuꞌladzy ni nahcsy ni ristuꞌ, no ne yâme nehx rsahc de ni rtzoo Dioz mdad. Meññ-dirquihñ leeyâme, no nehx rdzie yâme gynii yâme didz-nahcsy chehsh ni rsahc gybaa.
11 Per ángel yahc naꞌ, nîcze ma beeiyu leeyâme no rtzoo yâme mdad mazy que muextr-wé yahc, per nehx rnii yâme didz-nahcsy ngu-dia yâme ni rsahc gybaa ñaz-lo Dioz.
12 Meññ-wé yahc rnii yâme chehsh ni nehx nann yâme bia lee. Zidguiahc yâme beeiy maꞌ ni nehx nu xguîlriehñ, wéhdyx‑e nehx nann bia rtzoo no guhl par igaꞌ no gaty. Per znitylo yâme beeiy gahc rnihty maꞌ yahc,
13 no gyrehzy gac yâme por gyre ni nahcsy ni ptzoo yâme meññ. Rxilyno yâme rtzoo ni riuꞌladzy yâme nîcze yudzé. ¡To guîlrtuꞌ no ni nahcsy‑e hor-rahgü yâme tohzy no laꞌd, no rxilyno yâme rtzoo yâme ni nehx xñahzû!
14 Queꞌzy lo yâme dxu ngünaa “yo” ne seno yâme lee; nehx riahcladzy yâme rtzoo yâme guîlquie. Rquihly yâme meññ ni nehx nu zaꞌgndzi lo xtiidz Crist lehdy ctzoo guîlquie; byzeedy yâme zaꞌgndzi guîlrzîbyladzy, no nac yâme meññ-nu dia lee.
15 Psaꞌn yâme ni zidguiahc beeiy ñaz-ndohp, no bynityxñahz yâme. Naḻ yâme mod-ptzoo profet-Balam, leeme we xiiñ Beor, biuꞌladzy me ptzoo me ni dirquihñ, lehdy ntzoo me gan medy,
16 per byduhsh Dioz lo me por ni dirquihñ ni ptzoo me, no günino to burr leeme beeiy mod-rnii gahc meññ, no nehx bdee maꞌ ñahz ntzoo me ni ne ihqy me.
17 Meññ-rieꞌ yahc naꞌ, zidguiahc yâme beeiy pos ni nehx rahp nzeꞌ, no beeiy zá ni riyno mbeꞌ lee; no ru ma ncawy‑e gybiꞌ yâme togahcs.
18 Rnii yâme didz-nguihdz ni nehx rquihñ, no por guîlrieñ-nahcsy ni rquee ihqy meññ no vicy, rquihly yâme meññ ni leer bylaa de lahd meññ-rtzoo ni nehx xñahzû.
19 Galuu yâme meññ ulihbu gylaa, no luxu ni dzigniꞌdy leeyâme, leegahcu rtzoou mdad leeyâme, porni to meññ ni rtzoo behch no di raḻ csaan meu la, were niwé we rtzoo mdad leeme.
20 No leeyâme naꞌ, bylaa yâme de lo gyre ni nu lo guiedzylie ni rtzubeedy xguîlmbahñ meññ, porni bzaclo yâme Jesucrist ni rtzoo mdad no ni rislaa meññ, no bâḻ gyzac guibyguiat yâme lou no nehx rsaan yâmeu la, ba ma nadz gydibylgaa yâme que dze-dgueññ gylíladzy yâme Crist.
21 Beeiydíx‑e di ñann yâme bia we ni nac xñahzû, no dac dxi ba gaññ nann yâme bia rtzoo Dioz mdad ctzoo meññ, no guiatrxan yâme de ni ba cuaꞌ yâme.
22 Per ni guhc yâme zidguiahcu beeiy ni uli ni rnii to didz-zaaby, ni ne: “Mbahcü ribyguiat rahgü maꞌ ni ba gahc bydzib maꞌ, no ngutzy ni ba guhz, ribyguiat riuꞌ maꞌ lo bann.”