8
Guîlmbahñ ni rdee xiSpirt Dioz
1 Leewe naꞌ, meññ ni nu tohzy no Crist Jesúz ba nehx znihty yâme lo guîlquie, ba dac‑e mbahñ yâme par ctzoo yâme ni nehzy ihqy yâme, mazyg mbahñ yâme par ctzoo yâme ni ne xiSpirt Dioz.
2 Porni xiSpirt Dioz ni rdee guîlmbahñ por Crist Jesúz, wé we bislaa naa de lo ni ptzoo guîlquie mdad naa, no de ladzyña guîlguhty.
3 Dioz ptzoo me ni di ñaḻ ntzoo xleiy Moiséz, porni meññ di ñaḻu lee nsaan de ni rtzoo ni nehzy ihqy. Leewe Dioz pshahl me Xiiñ me guhc beeiy meññ-guiedzylie, bidguiehty me par güdix me xguîlquie meññ, no modé Dioz bnidylo me de ni rtzoo guîlquie mdad.
4 Ptzoo me ze lehdy beeiy ctzoo nó ni nac xñahzû mod-ne leiy, no ba dac‑e mbahñ nó par ctzoo nó ni nehzy dihqy nó, mazyg mbahñ nó par ctzoo nó ni ne xiSpirt Dioz.
5 Meññ ni mbahñ lehdy ctzoo ni nehzy ihqy la, pur leeu nu lo xguîlriehñ yâme; per meññ ni mbahñ lehdy ctzoo ni ne xiSpirt Dioz la, ni ne xiSpirt Dioz nu lo xguîlriehñ yâme.
6 Meññ ni ryo nunzy ni nehzy ihqy la, guîlguhty‑e ridnou; per meññ ni ryo ctzoo nunzy ni ne xiSpirt Dioz la, guîlmbahñ‑e ridnou, no ziuꞌ yâme dzie tziaawy.
7 Meññ ni rtzoo ni nehzy ihqy la, nu yâme contr Dioz, porni nehx rtzoo yâme ni ne xleiy Dioz, no di raḻu leeyâme.
8 No meññ ni mbahñ par ctzoo ni nehzy ihqy la, di raḻ ctzoo yâme ni rxilyno Dioz.
9 Per laꞌd naꞌ, ba dac‑e mbahñ laꞌd par ctzohd ni nehzy ihqy laꞌd, mazyg par ctzoo laꞌd ni ne xiSpirt Dioz, porni nu xiSpirt Dioz laꞌd. Bâḻ dxuhch nehx nu xiSpirt Crist lee la, dac‑e xmeññ Crist leeme.
10 No gumm nu Crist no laꞌd la, zegahc‑e mbahñ xispirt laꞌd, porni ba rdedy laꞌd beeiy ni nehx nzahby guîlquie, nîcze xcuerp laꞌd rahp de ni gaty por xtoḻ guîlquie.
11 Bâḻ xiSpirt Dioz ni bispahñ Jesúz de lahd mînguty nu no laꞌd la, were Dioz gahc ni bispahñ Crist Jesúz, zegahc zispahñ me xcuerp laꞌd ni rehty; no stzoo meu por xiSpirt me ni nu no laꞌd.
12 No leewe rman yahc, ba nehx nu bia nacu ctzoo nó ni nehzy dihqy nó.
13 Porni bâḻ gybahñ laꞌd par ctzohd ni nehzy ihqy laꞌd la, zehty laꞌd‑e; per bâḻ por xiSpirt Dioz csaan laꞌd togahcs de ni rtzohd ni nehzy ihqy laꞌd la, were gap laꞌd guîlmbahñ.
14 Gyre meññ ni rtzoo ni ne xiSpirt Dioz, wé we xiiñ Dioz lee.
15 Porni xiSpirt Dioz ni bdee me laꞌd, dac‑e par gac laꞌd beeiy mós ni byzee no ndzie laꞌd gyzac; mazyg cuaꞌ laꞌd Spirt ni por lee nac laꞌd xiiñ Dioz. No Spirt risnii nó, ra nó Dioz: “¡DTad-mosaꞌ!”
16 No xiSpirt gahc Dioz rdee diidz dguîlmbahñ nó ba xiiñ me we nó.
17 No sca-ze ba xiiñ Dioz nó, zegahc‑e ycaꞌ nó ni ba günii me, no tohzy no Crist ycaꞌ nóu, bâḻ tedy no ni nadz mod-güdedy Crist, lehdy tzu nó tohzy no leeme lo xguîlbyniꞌ me.
Ni mos ni ziaad ziaꞌr par nó
18 Naa rwien gyre ni nadz ni rdedy nó ni naꞌ, mbehty‑e leeu par to guîlbyni-ro ni scaꞌ nó dzé ni ziaad ziaꞌr.
19 Gyre ni bzaa Dioz lee ni lép gabiahzu gydzihñ dzé ni gluu Dioz dxu gyre we xiiñ me lee.
20 Porni gyreu guhc mdad bynihty mod-nac diidz gacu, no dac‑e leeyahcu biuꞌladzy gacu ze, mazyg Dioz‑e günii gacu ze; per gabiahz yahcu
21 gylaau de ni gynihtyu, lo ni gac ni mos de ni gylaa xiiñ yahc Dioz.
22 Nann nó gyre ni bzaa Dioz zidguiahcu beeiy ni gazacnou, lé rxuu beeiy to ngünaa ni gadedy yoob de ni ba gyruu de xcuidad.
23 No dac‑e nunzy leeyahcu gazacno, mazyg zegahcu nó ni ba rahp xiSpirt Dioz ni ba gudy ga nó lee, zegahc‑e nó, rxuu nó leññ dguîlmbahñ nó lóni gabiaaz nó ycaꞌ Dioz nó, gac nó xiiñ me no ctzuncoby me dcuerp nó.
24 Nó bylaa nó porni gabiaaz nó ni dgueññ güieꞌ nó; per bâḻ meññ gabiahz ni gawieꞌ la, were nehx ulihbu gabiahz yâmeu. ¿Beeiyz mbiahz meññ ni ba gahc gawieꞌ la?
25 Per bâḻ gabiaaz nó ni dgueññ güieꞌ nó lee la, were nehx sshacdadzy nó de ni cuiaaz nó leeu.
26 No modé gahc racno Spirt-Sant nó sca-ze nehx gyreu beeiy nó; porni nehx nann nó bia gnab nó lo Dioz, ni nehx nann nó mod-racladzyu; per Spirt-Sant gahc rnii por nó lo Dioz no to mód ni nehx nu diidz ñieññ mu.
27 No Dioz rzaclo me xguîlmbahñ gyre meññ, no rieññ me ni ne Spirt-Sant, porni rnab Spirt-Sant lo Dioz mod-racladzy Dioz por gyre xmeññ me.
Mahbu que meññ-rtzoo gan
28 Nann nó Dioz racno me meññ ni rzacbeeiy leeme, lehdy gyre ni rahc yâme racnou leeyâme, leeyâme we meññ ni pquee me riedz lee mod-racladzy me.
29 Meññ ni ba güle me lee xtâ ba xtze diaa, zegahc‑e ba ne me tedy yâme beeiy gahc Xiiñ me, lehdy leeme gac lguhl lahd xtahl rman.
30 No meññ ni ba ne Dioz tedy beeiy gahc xiiñ me, wé we pquee me riedz lee zegahc; no ni pquee me riedz lee, pteedy me lee beeiy ni nehx nzahby guîlquie; no ni pteedy me lee beeiy ni nehx nzahby guîlquie la, bidno me lee lo xguîlbyniꞌ me.
31 ¿Bia beeiy nnii nó lguia nirieꞌ? Bâḻ Dioz nu me por nó, ¿dxu beeiy nruu contr nó?
32 Dioz nehx ne me yac, bdee me Xiiñ me guhty por nó, ¿bia mód naꞌ ña nó nehx zdee me nó tohzy no Xiiñ me gyre ni rahp me?
33 ¿Dxu we naꞌ beeiy nruu contr meññ ni ba güle Dioz lee? Dioz gahc rteedy leeyâme beeiy ni nehx nzahby guîlquie.
34 ¿Dxuz‑e naꞌ ctzoo guîlguxtisy chehsh yâme? ¿Crist la? ¡Yac! Leeme we ni guhty; no gübahñ me por nó, no dxie me coo Dioz lad-drech ru ma rsahc, no ganab me por nó.
35 ¿Dxu beeiy mboo nó de lo xguîlndzi Crist ni rahp me nó? ¿De ni rdedy nó gyrehzy ni nadz la, guîlrzacno la, de ni rzîbynáḻ meññ nó la, guîlrlahn la, de ni nehx rahp nó mbehty la, de ni nu nó lo ni ndzieeby la, o de ni ngaꞌdy meññ nó la?
36 Yac, porni lo Guehtzy ru queꞌ xtiidz Dioz neu:
Cuiaaz noꞌ hortisy gacu gaty noꞌ porni rlídadzy noꞌ lii;
no zidguiahc noꞌ we beeiy xiily ni tza to ru igaꞌdy meññ lee.
37 De gyre nirieꞌ nitisy tedy nó, gatzoo gahc nó gan por Crist ni ndzi nó.
38 Por leeu we nannaꞌ nehx nu mbehty ni beeiy mboou nó de lo xguîlndzi Dioz ni rahp me nó: ni guîlguhty, ni guîlmbahñ, ni ángel yahc, ni guxtisy yahc ni nu leññ gybaa, ni zrieñ ni rahc ni rnii, ni mbehty ni nu ni naꞌ, ni mbehty ni ziaad ziaꞌr,
39 ni guhcu ru guia o guhcu ru guiat, ni zrieñ behch ni bzaa Dioz lee, mbehty nehx beeiy mboou nó de lo xguîlndzi Dioz ni rahp me nó por Crist Jesúz, ni rtzoo mdad nó.